Ho Baroma 2:1-29
2 Ho sa tsotellehe hore na o mang,+ ha o na mabaka a ho ikemela ha o ahlola batho ba bang. Haeba o ahlola batho ba bang, o a ikahlola hobane le wena o etsa dintho tse tshwanang.+
2 Re a tseba hore Modimo o ahlola batho ba etsang dintho tse jwalo mme o ahlola ka toka.*
3 Na o nahana hore o tla phonyoha kahlolo ya Modimo ha o ahlola batho ba tlwaetseng ho etsa dintho tseo empa le wena o ntse o di etsa?
4 Kapa o nyatsa hore ebe Modimo o na le mamello+ ebile o mosa haholo?+ Na ha o hlokomele hore ka mosa Modimo o leka ho o thusa hore o bake?+
5 Empa ka ha o manganga ebile ha o batle ho baka, Modimo o tla o halefela. O tla o fa kotlo letsatsing leo ka lona a ahlolang batho mme o tla ahlola ka toka.+
6 O tla ahlola e mong le e mong ho ya ka mesebetsi ya hae.+
7 Ba batlang kganya, tlhompho le bophelo bo ke keng ba fela+ ka ho dula ba etsa dintho tse lokileng, o tla ba fa bophelo bo sa feleng.
8 Empa o tla halefela batho ba ratang dikgang, ba sa lateleng nnete mme ba tlwaetse ho etsa dintho tse fosahetseng.+
9 Motho e mong le e mong ya etsang dintho tse mpe o tla ba le mahlomola ho sa tsotellehe hore na ke Mojuda kapa ke Mogerike.
10 Modimo o tla fa e mong le e mong ya etsang dintho tse ntle tlotla le kgotso. O tla qala ka Mojuda,+ a fetele ho Mogerike.+
11 Modimo ha a leeme.+
12 Batho bohle ba etsang sebe hobane ba sa tsebe molao ba tla nne ba shwe le hoja ba sa ka ba o tseba.+ Ba etsang sebe ba ntse ba tseba molao ba tla ahlolwa ka wona.+
13 Batho ba utlwang molao ha se bona bao Modimo a ba nkang ba lokile empa ba phethang molao ke bona ba tla nkwa ba lokile.+
14 Batho ba ditjhaba ha ba tsebe Molao wa Modimo+ empa ba etsa dintho tse hlahang Molaong. Le hoja ba sa tsebe Molao wa Modimo, ba na le molao ka dipelong tsa bona.
15 Ba a bontsha hore ditaba tsa molao di ngotswe ka dipelong tsa bona, le matswalo a bona a a ba pakela. Ha ba ntse ba nahana, ba kgona ho iqosa kapa ho ikemela.
16 Dintho tsena di tla etsahala ha Modimo a ahlola batho a sebedisa Kreste Jesu.+ Dintho tsena tseo ke di buang ke karolo ya ditaba tse monate tseo ke di phatlalatsang.
17 Ba bang ba lona le ipitsa Bajuda+ mme le tshepile molao ebile le ikotla sefuba ka hore le batho ba Modimo.
18 Le tseba thato ya hae ebile le kgona ho elellwa dintho tse lokileng hobane le rutilwe Molao.+
19 Le bua le kgodisehile hore le ka kgona ho tataisa batho ba foufetseng le be le fe batho ba lefifing lesedi.
20 Le nahana hore le ka kgalemela batho ba se nang kelello mme la ruta bana hobane le utlwisisa dithuto tsa motheo tsa Modimo le nnete e tswang Molaong.
21 Wena ya rutang ba bang, ke hobaneng ha o sa etse dintho tseo o di rutang?+ O ruta batho ba bang hore ba se ke ba utswa,+ jwale ke hobaneng ha o utswa?
22 O ruta batho hore ba se ke ba feba,+ jwale o febelang? O re o nyonya ditshwantsho tse rapelwang, jwale ke hobaneng ha o utswa thepa ya ditempele?
23 O ikotla sefuba ka hore o tseba molao, jwale ke hobaneng ha o tella Modimo ka ho tlola Molao?
24 “Lebitso la Modimo le ntse le rohakwa hara ditjhaba ka lebaka la lona” feela jwalo ka ha Mangolo a boletse.+
25 Lebollo+ le molemo haeba feela o mamela molao+ empa haeba o tlola molao, ho tshwana le ha o sa bolla.
26 Haeba motho ya sa bollang+ a etsa dintho tseo Molao o reng di lokile, Modimo o tla mo nka a bolotse.+
27 Ha moditjhaba ya sa bollang a mamela Molao, o a bontsha hore wena ya tlolang Molao, o molato le hoja o tseba Molao ebile o bolotse.
28 Ho ba Mojuda wa nnete ha ho a itshetleha ka tsela eo motho a shebahalang ka yona,+ le lebollo ha le amane le ntho e etswang mmeleng feela.+
29 Mojuda wa nnete ke eo e leng yena ka pelong,+ o boloditswe pelong+ ka moya o halalelang eseng ka Molao.+ Motho eo o roriswa ke Modimo eseng batho.+
Dintlha tse qetellong ya sehloho
^ Ka Segerike: “kahlolo ya hae e tumellanong le nnete.”
