Ho Baroma 4:1-25
4 Ha ho le jwalo, re tla reng ka Abrahama moholoholo wa rona?
2 Ka mohlala, haeba ho ne ho ka thwe Abrahama o ne a lokile ka lebaka la mesebetsi ya hae, o ne a tla ba le lebaka la ho ithorisa empa eseng ka pela Modimo.
3 Etswe lengolo le re: “Abrahama o ile a bontsha tumelo ho Jehova* mme a nkwa e le motho ya lokileng.”+
4 Ha motho a sebetsa ha a fuwe moputso hobane a bontshwa mosa* empa o o fuwa hobane a tlamehile ho o fumana.*
5 Ka lehlakoreng le leng, motho ya sa sebetseng empa a dumela ho Modimo ya bolelang hore motho ya sa lokang o lokile, o tla nkwa a lokile ka lebaka la tumelo ya hae.+
6 Davida le yena o ile a bua ka thabo ya motho eo Modimo a mo nkang a lokile empa e se ka lebaka la mesebetsi ya hae. O ile a re:
7 “Ho thaba bao diketso tsa bona tse sa yeng ka molao di tshwaretsweng le bao dibe tsa bona di kwahetsweng.*
8 Ho thaba motho eo Jehova* a ke keng a hopola sebe sa hae ho hang.”+
9 Na thabo ee e fumanwa ke batho ba bolotseng feela kapa le batho ba sa bollang ba a e fumana?+ Re qeta ho re: “Abrahama o ile a nkwa e le motho ya lokileng ka lebaka la tumelo ya hae.”+
10 O ile a nkwa a lokile neng? Na ke ha a ne a bolotse kapa ha a sa bolla? O ne a eso ka a bolla.
11 Modimo o ile a mo laela hore a bolle e le letshwao.+ Lebollo leo e ne e le sesupo* sa hore o ne a lokile ka lebaka la tumelo eo a neng a ena le yona pele a bolla. Ka lebaka leo, Abrahama e ile ya eba ntate wa bohle ba nang le tumelo+ le hoja ba sa bolla mme Modimo le yena o ba nka ba lokile.
12 Hape e ile ya eba ntate wa ba bolotseng eseng ba bolotseng feela empa le ba latelang mohlala wa tumelo eo ntate wa rona Abrahama+ a e bontshitseng pele a bolla.
13 Tshepiso ya hore Abrahama e tla ba mojalefa wa lefatshe+ ha e a ka ya etsetswa yena kapa ditloholo tsa hae ka lebaka la ho mamela molao empa e ne e le hobane a ena le tumelo mme Modimo a mo nka a lokile.+
14 Haeba tshepiso eo e ne e fumanwa ke batho ba mamelang molao, ho bolela hore tumelo ha e na thuso le hore tshepiso eo e etseditsweng Abrahama ha e na thuso.
15 Ha e le hantle, haeba motho a tlola Molao o tla fumana kotlo+ empa ha ho na motho ya ka tlolang molao haeba o le siyo.+
16 Ka lebaka la mosa wa Modimo,+ re kgona ho bona ha ditshepiso di phethahala hobane re bontsha tumelo. Bana ba Abrahama ba ka kgona ho bona ha tshepiso e phethahala+ eseng feela ba mamelang Molao empa le ba nang le tumelo e kang ya Abrahama eo e leng ntate wa rona bohle.+
17 (Taba ena e jwalo ka ha e boletswe ka Mangolong ha a re: “Ke tla o etsa ntate wa ditjhaba tse ngata.”)+ Abrahama o ile a bontsha tumelo ho Modimo ya tsosang bafu le ya buang ka dintho tse eso be teng jwalo ka ha eka di se di le teng.*
18 Abrahama o ne a ena le tshepo le tumelo ya hore e tla ba ntate wa ditjhaba tse ngata le hoja ho ne ho bonahala eka ha se ntho e ka etsahalang. O ile a dumela hobane ho ile ha thwe: “Bana* ba hao ba tla ba bangata jwalo ka tsona.”+
19 Le hoja tumelo ya hae e ne e ntse e le matla, o ne a nahana hore a ke ke a kgona ho ba le bana (hobane o ne a se a le dilemo tse ka bang 100).+ Hape o ne a tseba hore Sara le yena o se a tsofetse haholo hore a ka ba le bana.+
20 Empa ka ha Modimo o ne a mo tshepisitse, ha a ka a belaela kapa a hloka tumelo. Ho ena le hoo, tumelo ya hae e ile ya eba matla le ho feta mme a rorisa Modimo.
21 O ne a kgodisehile ka ho feletseng hore Modimo o tla phethahatsa tshepiso ya hae.+
22 Ka hoo, “o ile a nkwa e le motho ya lokileng.”+
23 Le ha ho le jwalo, mantswe a reng “o ile a nkwa” a ne a sa ngollwa yena feela+
24 empa a ne a ngoletswe le rona. Le rona re tla nkwa re lokile hobane re dumela ho Modimo ya tsositseng Jesu Morena wa rona bafung.+
25 Ho ile ha fanwa ka yena e le hore a shwele dibe tsa rona+ mme o ile a tsoswa e le hore re ka nkwa re lokile.+
Dintlha tse qetellong ya sehloho
^ Sheba Ntlha ya A5.
^ Kapa: “hobane a kolotwa.”
^ Kapa: “tshwaretsweng.”
^ Sheba Ntlha ya A5.
^ Kapa: “setempe.”
^ Kapa mohlomong: “ya bitsang dintho tse eso ka di eba teng jwalo ka ha eka di teng.”
^ Ka Segerike: “Peo.”
