Ho Baroma 5:1-21
5 Ka hona, ka ha jwale re nkwa re lokile ka lebaka la tumelo,+ a re thabeleng kgotso* eo re nang le yona le Modimo ka Morena wa rona Jesu Kreste.+
2 Tumelo eo re nang le yona ho Jesu e re fa monyetla wa ho atamela ho Modimo le ho thabela mosa* wa hae.+ A re thabeng* hobane re na le tshepo ya hore re tla tlotliswa ke Modimo.*
3 Hape a re thabeng* le ha re ena le mathata+ ka ha re a tseba hore mathata a etsa hore re be le mamello,+
4 mamello yona e etsa hore Modimo a re amohele+ mme ha Modimo a re amohela re ba le tshepo.+
5 Tshepo ha e swetse+ hobane Modimo o sebedisa moya o halalelang oo a re fileng wona ho bontsha hore o a re rata.+
6 Etswe Kreste o ile a shwela batho ba sa lokang ka nako e behilweng. O ile a re shwela ha re ntse re le baetsadibe.*+
7 Ho thata hore mang kapa mang a shwele motho ya lokileng empa mohlomong motho a ka batla ho shwela motho ya molemo.
8 Empa Modimo o bontshitse hore o a re rata ka hore ebe Kreste o ile a re shwela re ntse re le baetsadibe.+
9 Ka ha jwale re nkwa re lokile ka lebaka la madi a Jesu,+ re ka kgodiseha le ho feta hore re tla pholoswa kgalefong ya Modimo.+
10 Le hoja re ne re le dira tsa Modimo, re ile ra ba metswalle ya hae* ka lebaka la lefu la mora wa hae.+ Ka ha jwale re se re le metswalle ya* Modimo, re ka kgodiseha le ho feta hore re tla pholoswa ka bophelo ba Jesu.
11 Re a thaba ka lebaka la ntho eo Modimo a re etseditseng yona ka Morena wa rona Jesu Kreste hobane re se re le metswalle ya Modimo ka lebaka la hae.+
12 Sebe se ile sa kena lefatsheng ka motho a le mong mme sa tlisa lefu.+ Ka hoo, lefu la namela ho batho bohle hobane kaofela ba ne ba entse sebe.+
13 Sebe se bile teng lefatsheng pele ho Molao. Le ha ho le jwalo, ha ho na motho ya ka qoswang ka hore o entse sebe ha ho se na molao.+
14 Lefu le ile la busa e le morena ho tloha mehleng ya Adama ho ya mehleng ya Moshe, la busa batho bohle le hoja ba ne ba sa etsa sebe jwalo ka Adama. Adama o ne a tshwana le ya neng a tla tla.+
15 Mpho ya Modimo ha e tshwane le sebe sa Adama. Batho ba bangata ba ile ba shwa ka lebaka la sebe sa motho a le mong. Empa mosa wa Modimo le mpho eo Modimo a fanang ka yona ka lebaka la mosa wa motho a le mong+ e leng Jesu Kreste di kgolo haholo. Modimo o tla sebedisa mpho ena ho tlisetsa batho ba bangata ditlhohonolofatso tse ngata.+
16 Hape mpho ya Modimo le sebe sa motho a le mong di fapana ka tsela ena:+ Sebe sa motho a le mong se entse hore batho bohle ba nkwe ba le molato+ empa mpho eo Modimo a faneng ka yona ka mora hore ho etswe dibe tse ngata e entse hore batho ba bangata ba nkwe ba lokile.+
17 Lefu le ile la busa e le morena ka lebaka la motho a le mong.+ Empa re ka kgodiseha le ho feta hore batho bao Modimo a tla ba bontsha mosa le ho ba fa mpho ya ho loka+ ba tla busa e le marena+ ka lebaka la motho a le mong e leng Jesu Kreste.+
18 Jwalo ka ha batho bohle ba ile ba nkwa ba le molato ka lebaka la sebe se le seng,+ ka tsela e tshwanang ka lebaka la ketso e le nngwe e lokileng, batho bohle+ ba nkwa ba lokile mme ba fumana bophelo.+
19 Jwalo ka ha ho se mamele ha motho a le mong ho ile ha etsa hore ba bangata e be baetsadibe,+ ka ho tshwanang ho mamela ha motho a le mong ho tla etsa hore ba bangata e be ba lokileng.+
20 Molao o bile teng ho bontsha hore na batho ke baetsadibe hakae.+ Empa ha ho ntse ho hlaka hore na sebe se sengata hakae, mosa wa Modimo wa nna wa eketseha le ho feta.
21 Jwalo ka ha sebe se ile sa busa e le morena mme sa tlisa lefu,+ ka ho tshwanang le mosa wa Modimo o busa e le morena ka ho loka, ka tebello ya hore bophelo bo sa feleng bo tla ba teng ka Jesu Kreste Morena wa rona.+
Dintlha tse qetellong ya sehloho
^ Kapa mohlomong: “re na le kgotso.”
^ Kapa mohlomong: “Re a thaba.”
^ Ka Segerike: “fumana kganya ya Modimo.”
^ Kapa mohlomong: “re a thaba.”
^ Ka Segerike: “fokola.”
^ Ka Segerike: “kgutliseditswe ho.”
^ Ka Segerike: “ra kgutlisetswa ho yena.”
