Dipesaleme 4:1-8
Ho motsamaisi, e binwe ka diletsa tse dikgwele. Pina ya Davida.
4 Ha ke o bitsa, o nkarabe hle Modimo wa ka ya lokileng.+O mpulele tsela ya ho tswa* ha ke le tsietsing.Nkgauhele, o mamele thapelo ya ka.
2 Lona bara ba batho, le tla ntlotlolla ho fihlela neng?Le tla rata dintho tse se nang thuso le ho dula le bua leshano ho fihlela neng? (Selah)
3 Tsebang hore Jehova o tla tshwara motho wa hae ya tshepahalang ka tsela e kgethehileng.*Jehova o tla nkutlwa ha ke mo hweletsa.
4 Ha le halefile, le se ke la etsa sebe.+Buelang ka dipelong le le dibetheng tsa lona mme le kgutse. (Selah)
5 Etsetsang Modimo mahlabelo ka dipelo tse ntle,Le tshepe Jehova.+
6 Ho na le ba bangata ba reng: “Ke mang ya tla etsa hore re atlehe?”O re kgantshetse lesedi la sefahleho sa hao, Jehova.+
7 O entse hore pelo ya ka e thabe haholoHo feta batho ba kotutseng koro* e ngata le veine e ntjha.
8 Ke tla paqama ke robale ka kgotso+Hobane Jehova, ke wena feela ya etsang hore ke dule ke sireletsehile.+
Dintlha tse qetellong ya sehloho
^ Ka Seheberu: “Nketsetse sebaka se bulehileng.”
^ Kapa: “o tla qolla motho wa hae ya tshepahalang; o tla ikgethela motho wa hae ya tshepahalang.”
