1-3. (a) Ho tla etsahalang ha Jehova a ‘halefile haholo’? (Sheba setshwantsho se qalang.) (b) Re tlo bua ka eng?

 BANNA, basadi le bana, ba eme ha mmoho ba bina pina ya Mmuso. Ka mora moo, moholo o a rapela, o kopa Jehova hore a ba sireletse. Batho kaofela phuthehong ba kgodisehile hore Jehova o tla ba thusa, ho ntse ho le jwalo ba ntse ba hloka ho kgothatswa le ho kgodiswa. Ka ntle ho utlwahala modumo wa batho ba lwanang. Ntwa ya Armagedone e se e qadile!—Tshen. 16:14, 16.

² Nakong ya ntwa ya Armagedone, Jehova o tla fedisa batho a ‘halefile haholo’. (Bala Ezekiele 38:18.) A ke ke a halefela masole kapa setjhaba se le seng feela empa o tla halefela batho ba bangata ba dulang lefatsheng. Letsatsing leo, Jehova o tla be a fedisitse batho “ho tloha pheletsong e nngwe ya lefatshe ho ya ho e nngwe.”—Jer. 25:29, 33.

³ Keng e tla etsa hore Jehova, Modimo ya lerato, ya hlaloswang e le “Modimo ya mohau le ya nang le kutlwelobohloko” le ya “diehang ho halefa,” a ‘halefe haholo’ jwalo? (Ex. 34:6; 1 Joh. 4:16) A re boneng ka moo karabo ya potso eo e ka re kgothatsang ka teng, ya etsa hore re be sebete ya ba ya re susumetsa ho etsa mosebetsi wa ho ruta batho Bibele kajeno.

4, 5. Tsela eo Modimo a halefang ka yona e fapane jwang le tsela eo batho ba halefang ka yona?

⁴ Re lokela ho hlokomela hore tsela eo Jehova a halefang ka yona ha e tshwane le eo batho ba halefang ka yona. Ha motho a ntse a tlalellana ke bohale, o qetella a entse dintho tseo ha morao a ikwahlaelang tsona. Ka mohlala, mora wa Adama wa pele e leng Kaine o ile a halefa haholo hobane Jehova ha a ka a amohela sehlabelo sa hae empa o ile a amohela sa Abele. Ho ile ha etsahalang ka mora moo? Kaine o ile a bolaya ngwanabo. (Gen. 4:3-8; Baheb. 11:4) Nahana le ka mohlala wa Davida, ya ileng a hlaloswa e le monna ya kgahlisang Jehova. (Dik. 13:22) Le hoja e ne e le motho ya lokileng, o ile a batla a etsa phoso e kgolo ha a utlwa hore Nabale o mo rohakile ebile o rohakile le bahlanka ba hae. Davida le masole a hae ba ile ba halefa haholo “ba nka disabole tsa bona,” ba ikemiseditse ho bolaya Nabale le banna bohle ba dulang ntlong ya hae. Empa mosadi wa Nabale e leng Abigaile o ile a thusa Davida le bahlanka ba hae hore ba se ke ba iphetetsa. (1 Sam. 25:9-14, 32, 33) Ke ka lebaka leo Jehova a ileng a susumetsa Jakobo hore a ngole mantswe ana a reng: “Ha motho a halefile ha a etse dintho tse lokileng mahlong a Modimo.”—Jak. 1:20.

⁵ Ho fapana le batho, Jehova ha a halefe feela ntle ho lebaka ebile o kgona ho laola bohale ba hae. Le hoja Jehova a ka halefa haholo, o dula a etsa dintho ka toka. Ha a lwantsha sera, ha a ‘fedise ya lokileng le ya kgopo.’ (Gen. 18:22-25) Jehova ha a halefe a se na lebaka le utlwahalang la ho etsa jwalo. A re bueng ka mabaka a mabedi a etsang hore Jehova a halefe le hore na re ka ithutang ho ona.

6. Jehova o etsang ha lebitso la hae le silafatswa?

⁶ Lebaka la pele: Lebitso la Jehova le a silafatswa. Batho ba reng ba sebeletsa Jehova empa ba etsa dintho tse mpe ba senya lebitso la hae ebile ba a mo halefisa. (Ezek. 36:23) Dikgaolong tse fetileng tsa buka ena, re ile ra ithuta hore setjhaba sa Iseraele se ile sa silafatsa lebitso la Jehova haholo. Boitshwaro le diketso tsa setjhaba sena di ile tsa etsa hore Jehova a halefe. Empa kgalefo ya hae ha e a ka ya tswa taolong, o ile a fa setjhaba sa hae kotlo e se loketseng. (Jer. 30:11) Ha a se a ahlotse batho ba hae, bohale ba hae bo ile ba fela mme ha eba jwalo ka ha eka ha ho a ka ha etsahala letho.—Pes. 103:9.

7, 8. Re ithutang tseleng eo Jehova a ileng a tshwara Baiseraele ka yona?

⁷ Seo re ithutang sona: Re ka ithuta tseleng eo Jehova a ileng a tshwara Baiseraele ka yona. Le rona jwalo ka Baiseraele bao, re na le boikarabelo ba ho emela lebitso la Jehova. Re Dipaki Tsa Jehova. (Esa. 43:10) Dintho tseo re di buang le tseo re di etsang di ka ama tsela eo batho ba nkang Jehova ka yona. Le ka mohla ha re batle ho etsa dintho tse mpe ka boomo tse etsang hore re senye lebitso la Jehova. Ho etsa jwalo ke boikaketsi mme  ho tla etsa hore Jehova a halefe ebile o tla nka kgato ho sireletsa lebitso la hae.—Baheb. 3:13, 15; 2 Pet. 2:1, 2.

⁸ Na taba ya hore Jehova o kgona ho “halefa haholo” e lokela ho re sitisa ho ba metswalle ya hae? Tjhe. Re a tseba hore Jehova o na le mamello ebile o a tshwarela. (Esa. 55:7; Bar. 2:4) Empa re a tseba hore o kgalemela batho ha ho hlokahala. Re hlompha Jehova hobane re a tseba hore o tla re halefela ha re etsa dintho tse mpe. A ke ke a dumella hore batho ba etsang dintho tse mpe ba be hara batho ba hae. (1 Bakor. 5:11-13) Jehova o re boleletse ka ho hlakileng hore na keng e mo halefisang. Ho se ho le ho rona hore re qobe ho nahana le ho etsa dintho tse mo halefisang.—Joh. 3:36; Bar. 1:26-32; Jak. 4:8.

9, 10. Jehova o etsang ha batho ba hae ba hlaselwa? Fana ka mohlala.

⁹ Lebaka la bobedi: Bahlanka ba Jehova ba tshepahalang ba a hloriswa. Jehova o a halefa ha dira di hlasela batho ba hae ba mo tshepileng le ba sireletswang ke yena. Ka mohlala, ka mora hore Baiseraele ba tswe Egepeta, Faro le masole a hae a matla ba ile ba lelekisa Baiseraele bao ho neng ho bonahala eka ha ho na motho ya ka ba thusang lebopong la Lewatle le Lefubedu. Empa ha masole ao a matla a lelekisa Baiseraele bohareng ba lewatle moo ho ommeng, Jehova o ile a ntsha mabidi a dikariki tsa ona yaba o lahlela Baegepeta ka lewatleng. “Ha ho le ya mong wa bona ya ileng a pholoha.” (Ex. 14:25-28) Jehova o ile a halefela Baegepeta haholo hobane a hauhela batho ba hae.—Bala Exoda 15:9-13.

¹⁰ Ka tsela e tshwanang, tsela eo Jehova a ratang batho ba hae ka yona e ile ya etsa hore a thuse batho ba hae le mehleng ya Morena Ezekiase. Masole a Baasiria a neng a le matla ebile a le sehloho ka ho fetisisa mehleng eo, a ne a ikemiseditse ho hlasela motse wa Jerusalema. Bahlanka ba tshepahalang ba Jehova ba ile ba tshoswa ka hore ba tla bolawa ka sehloho. (2 Mar. 18:27) Yaba Jehova o romela lengeloi le le leng mme la bolaya masole a 185 000 a Baasiria ka bosiu bo le bong. (2 Mar. 19:34, 35) Ako nahane feela hore na ho ne ho le jwang kampong ya Baasiria hoseng letsatsing le hlahlamang. Hohle fatshe ho tletse marumo, dithebe le disabole. Ho se na diterompeta tse tsosang masole ebile ho se na balaodi ba laelang masole hore a bokane. Ho thotse ho itse tu! Ebile ho tletse ditopo fatshe.

11. Re ithutang mehlaleng e hlahang ka Bibeleng e bontshang ka moo Jehova a ileng a sireletsa batho ka teng ha ba ne ba hlaselwa?

¹¹ Seo re ithutang sona: Mehlala ena e bontsha seo Jehova a se etsang ho dira tse tshosang batho ba hae ka ho di fa temoso ena: “Ke ntho e tshosang hore motho a otlwe ke Modimo ya phelang” ha a halefile. (Baheb. 10:31) Hape mehlala ena e a re kgothatsa ebile e etsa hore re be sebete. Re a kgothala ha re tseba hore sera sa rona se ka sehloohong e leng Satane, se ke ke sa atleha. Ho setse “nako e kgutshwanyane” pele se fediswa. (Tshen. 12:12)  Ha re ntse re emetse hore nako eo e fihle, re ka sebeletsa Jehova ka sebete, re kgodisehile hore ha ho na motho, mokgatlo kapa mmuso o ka re thibelang ho etsa thato ya Modimo. (Bala Pesaleme ya 118:6-9.) Moapostola Pauluse o ile a hatisa taba ena ka ho bua mantswe ana a tswang ho Modimo a reng: “Ha Modimo a eme le rona, ke mang ya ka re lwantshang?”—Bar. 8:31.

12. Nakong ya mahlomola a maholo, ke eng e tla halefisa Jehova?

¹² Nakong ya mahlomola a maholo, Jehova o tla re sireletsa feela jwalo ka ha a ile a sireletsa Baiseraele ha ba ne ba hlaselwa ke Baegepeta le Bajuda ba neng ba le Jerusalema ba thibeletswe ke Baasiria. Ha dira tsa rona di leka ho re fedisa, Jehova o tla halefa haholo hobane o a re rata. Ha dira tseo di re hlasela, ho tla ba jwalo ka ha eka di thetsa thaka ya leihlo la Jehova! O tla nka kgato ka potlako. (Zak. 2:8, 9) O tla bolaya batho ba bangata ho feta le ha e le neng pele. Empa dira tsa Modimo di tla be di se na lebaka la ho makala ha Jehova a ntshetsa bohale ba hae ho tsona. Hobaneng?

13. Jehova o lemositse batho hore o tla etsang?

¹³ Jehova ke Modimo ya “diehang ho halefa” hape haesale a lemosa batho hore o tla fedisa ba mo hanyetsang le ba batlang ho hlasela batho ba hae. (Ex. 34:6, 7) Jehova o ile a sebedisa baprofeta ba kang Jeremia, Ezekiele, Daniele, Kreste Jesu le moapostola Petrose, Pauluse le Johanne ho lemosa batho ka ntwa e kgolo ka ho fetisisa e tlang.—Sheba lebokose le reng “Jehova o Lemosa Batho ka Ntwa e Kgolo e Tlang.”

14, 15. Ke dintho dife tseo Jehova a di entseng, hona hobaneng?

¹⁴ Jehova o entse bonnete ba hore ditemoso tsena di a ngolwa ka Lentsweng la hae. O ile a etsa bonnete ba hore Bibele e fetolelwa ka dipuo tse ngata ho feta buka le ha e le efe le hore batho ba bangata ba be le yona. Lefatsheng lohle, o entse hore ho be le batho ba bangata ba ithaopelang ho thusa ba bang hore ebe metswalle ya Modimo le ho ba lemosa ka “letsatsi le leholo la Jehova” le tlang. (Sof. 1:14; Pes. 2:10-12; 110:3) O susumeditse batho ba hae ho fetolela dingolwa tse thusang batho  hore ba ithute Bibele ka dipuo tse ngata le ho qeta dihora tse dimilione selemo le selemo ba ruta batho ka ditshepiso le ditemoso tse tswang ka Lentsweng la hae.

¹⁵ Jehova o entse mosebetsi ona wohle “hobane ha a lakatse hore mang kapa mang a timetswe empa o lakatsa hore bohle ba bake.” (2 Pet. 3:9) Ka nnete re thabela ho ba bahlanka ba Modimo ya lerato le ya nang le mamello le ho thusetsa ho phatlalatsa molaetsa wa hae. Empa haufinyane nako ya hore batho ba sa mameleng ditemoso tsa Modimo ba fetohe e tla fela.

16, 17. Na Jehova o se a behile letsatsi la hore na ntwa ya ho qetela e tlo ba neng? Hlalosa.

¹⁶ Jehova o se a behile letsatsi la hore na ntwa ya ho qetela e tla ba neng hape o a tseba hore na batho ba hae ba tlo hlaselwa neng. (Mat. 24:36) Jehova o tseba jwang hore na dira tsa hae di tlo hlasela batho ba hae neng?

¹⁷ Kgaolong e fetileng ya buka ena re ithutile hore Jehova o ile a re ho Gogo: ‘Ke tla . . . o kenya dihakisi mehlahareng.’ Modimo o tla etsa hore ditjhaba di lwane ntweng ya ho qetela.  (Ezek. 38:4) Taba ena ha e bolele hore Jehova ke yena ya tla qala ntwa ena kapa a qobelle dira tsa hae hore di lwane. Empa e bontsha hore Jehova o a tseba hore na dira tsa hae di nahanneng le hore na di tla etsang ha ho hlaha monyetla wa hore di hlasele batho ba hae.—Pes. 94:11; Esa. 46:9, 10; Jer. 17:10.

18. Ke hobaneng ha batho ba tla batla ho lwana le ya Matla Ohle?

¹⁸ Haeba Jehova e se yena ya tla qala ntwa eo kapa a sa tlo qobella dira tsa hae hore di lwane, keng e tla etsa hore batho ba batle ho lwana le Ya Matla Ohle? Ke hobane ka nako eo, ho ka etsahala hore batho ba tla be ba ipolelletse hore Modimo ha a yo kapa ha a na taba le dintho tse etsahallang batho lefatsheng. Mohlomong ba tla nahana jwalo hobane ba tla be ba qeta ho fedisa mekgatlo yohle ya bodumedi ba bohata lefatsheng. Ka hoo, ba ka nna ba ipehela lebaka la hore haeba Modimo o teng, a ka be a sireleditse mekgatlo ena e reng e a mo sebeletsa. Ba ke ke ba hlokomela hore ha e le hantle ke Modimo ya ba sebedisang hore ba fedise madumedi ohle a reng a a mo emela empa a etsa dintho tse mpe.—Tshen. 17:16, 17.

19. Ho tla etsahalang ka mora hore bodumedi ba bohata bo fediswe?

 ¹⁹ Nakwana ka mora hore bodumedi ba bohata bo fediswe, ho ka etsahala hore Jehova o tla re batho ba hae ba phatlalatse molaetsa wa kahlolo oo buka ya Tshenolo e o bapisang le sefako seo boima ba sona bo ka etsang dikhilokramo tse ka bang 20. (Tshen. 16:21, nal.) Ho ka etsahala hore molaetsa ona o tla be o phatlalatsa hore mekgatlo ya dipolotiki le ya dikgwebo e haufi le ho fediswa mme o tla tshosa batho ba o utlwang hoo ba tla rohaka Modimo. Ho ka etsahala hore wona molaetsa oo, o tla susumetsa ditjhaba hore di etse qeto ya ho hlasela batho ba Modimo hohle moo ba leng teng e le hore ba se ke ba phatlalatsa molaetsa oo ka ho feletseng. Ba tla nahana hore ha ho na motho ya ka re sireletsang ebile ba ka re fedisa ha bonolo. Ka nnete ba tla be ba ithetsa!

20, 21. Gogo ke mang, hona ho tla etsahalang ka yena?

²⁰ Kgaolong ya 17 ya buka ena, ha Ezekiele a bua ka ditjhaba tse ikopantseng tse tla re hlasela o di bitsa, “Gogo wa naha ya Magogo.” (Ezek. 38:2) Empa ditho tsa ditjhaba tseo tse ikopantseng di tla be di sa momahana jwalo ka ha eka di mpa feela di rokelletswe ka kgareng. Le hoja ho tla bonahala eka di sebetsa mmoho, di tla nne di qabane, di ikgohomose di be di kgethollane ho ya ka dinaha tsa tsona. E tla ba bosesaane ba kgwele hore Jehova a etse hore di tsohelane matla ka hore ‘di lwantshane’ ka sabole. (Ezek. 38:21) Ditjhaba tseo di ke ke tsa fediswa ke batho empa di tla fediswa ke Modimo.

²¹ Pele dira tseo tsa rona di fediswa, di tla bona letshwao la Mora motho. Mohlomong e tla ba pono e hlollang e ke keng ya etswa ke motho, e tla bontsha matla a Jehova le a Jesu. Bahanyetsi bao, ba tla bona dintho tse tla etsa hore ba tshwenyehe haholo. Ho tla etsahala feela jwalo ka ha Jesu a ne a buile ha a ne a re, “batho ba tla akgeha ke letswalo le hobane ba lebeletse dintho tse tla etsahala lefatsheng.” (Luka 21:25-27) Ba tla tshoha haholo ha ba hlokomela hore ba hlasetse batho ba Jehova ba sa tsebe hore na ba emetswe ke eng. Jwang kapa jwang ba tla tseba hore Mmopi wa rona, e leng Jehova wa mabotho ke lesole le leholo le re lwanelang. (Pes. 46:6-11; Ezek. 38:23) Re kgodisehile hore Jehova o tla lokolla mabotho a hae a lehodimo le matla a tlhaho ka tsela e tla etsa hore a sireletse bahlanka ba hae ba tshepahalang empa a fedise dira tsa hae.—Bala 2 Petrose 2:9.

22, 23. Ke bomang ba tla sireletsa batho ba Modimo mme ba tla ikutlwa jwang ka mosebetsi wa bona?

²² Nahana feela hore na Jesu o tla be a le malalaalaotswe hakae ho etella pele ba tla fedisa dira tsa Modimo le ho sireletsa ba ratang Ntate wa hae le ba mo sebeletsang. Nahana le ka moo batlotsuwa ba tla beng ba ikutlwa ka teng ka nako eo. Nakwana pele Armagedone e qala, batlotsuwa ba setseng lefatsheng ba tla  nkelwa lehodimong e le hore bohle ba 144 000 ba ka tsamaya le Jesu ho ya ntweng. (Tshen. 17:12-14) Ka nako eo, e tla be e le metswalle e haufi ya dinku tse ding ka ha ba tla be ba sebeditse mmoho nakong ya mehla ya bofelo. Batlotsuwa ba tla be ba ena le bolaodi le matla a ho lwanela batho ba ileng ba ba tshehetsa ka botshepehi ha ba ne ba ena le mathata.—Mat. 25:31-40.

²³ Mangeloi le ona e tla be e le karolo ya lebotho la Jesu le lehodimong. (2 Bathes. 1:7; Tshen. 19:14) A ile a mo thusa ho leleka Satane le mangeloi a hae lehodimong. (Tshen. 12:7-9) A boetse a thusa ka ho bokella batho ba batlang ho sebeletsa Jehova mona lefatsheng. (Tshen. 14:6, 7) Ka hoo, re a utlwisisa hore na ke hobaneng ha Jehova a tla kgetha mangeloi ho sireletsa batho ba hae ba tshepahalang. Ntho ya bohlokwa ka ho fetisisa ke hore bohle bao e leng karolo ya lebotho la Jehova ba tla thabela ho halaletsa lebitso la hae ka hore ba thuse ho fedisa dira tsa hae.—Mat. 6:9, 10.

24. Na bongata bo boholo ba dinku tse ding bo tla tshoha?

²⁴ Bongata bo boholo ba dinku tse ding ha bo a lokela ho tshoha hobane lebotho leo le matla le tla ba sireletsa. Bongata boo bo boholo bo tla ‘ema tswee! bo phahamise dihlooho hobane bo [le] haufi le ho lopollwa.’ (Luka 21:28) Ka hoo, pele letsatsi la Jehova le fihla, re lokela ho thusa batho ba bangata ka moo re ka kgonang hore ba tsebe le ho rata Ntate wa rona ya mohau le ya re sireletsang.—Bala Sofonia 2:2, 3.

25. Re tlo bua ka eng kgaolong e latelang?

²⁵ Ka mora hore dintwa tsa batho di fele, ho sala ho le moferefere ebile batho ba utlwile bohloko. Empa ka mora ntwa ya Armagedone, ho tla be ho se na moferefere ebile batho ba tla be ba thabile. Ho tla etsahalang ha bohale ba Jehova bo fedile, masole a hae a se a sa tshwara disabole ebile modumo wa ntwa o se o le siyo? Kgaolong e latelang, re tla bua ka taba ena e thabisang e tla etsahala nakong e tlang.