Modimo o ile a hlophisa ditloholo tsa mopatriareka Abrahama hore e be setjhaba mme a se fa melao. O ile a bitsa setjhaba seo “Iseraele” mme a etsa hore se tsebe borapedi ba nnete le lentswe la hae. (Pesaleme ya 147:19, 20) Kahoo, batho ba ditjhaba tsohle ba ne ba ka fumana se molemo ho Baiseraele.—Bala Genese 22:18.

Modimo o ile a kgetha Baiseraele hore e be dipaki tsa hae. Tlaleho ya bona e bontsha kamoo batho ba ka ruang molemo kateng ha ba mamela melao ya Modimo. (Deuteronoma 4:6) Kahoo, Baiseraele ba ne ba ka kgona ho ruta batho ba bang ho tseba Modimo wa nnete.—Bala Esaia 43:10, 12.

Ha nako e ntse e ya, Modimo ha a ka a hlola a amohela Baiseraele, mme Jehova o ile a nkela setjhaba seo sebaka ka phutheho ya Bokreste. (Matheu 21:43; 23:37, 38) Hona jwale Baiseraele ba nketswe sebaka ke Bakreste ba nnete, bao e seng e le bona dipaki tsa Jehova.—Bala Liketso 15:14, 17.

Jesu o ile a hlophisa balatedi ba hae hore ba etse barutuwa ditjhabeng tsohle. (Matheu 10:7, 11; 24:14; 28:19, 20) Hona jwale mosebetsi o na o fihla qetellong ya ona, ha bofelo bo ntse bo atamela. Ka lekgetlo la pele historing, Jehova o entse hore batho ba dimilione ba tswang ditjhabeng tsohle ba kopane borapeding ba nnete. (Tšenolo 7:9, 10) Bakreste ba nnete ke sehlopha se kopaneng e le hore ba kgothatsane le ho thusana. Lefatsheng lohle, ba fumana thuto e tshwanang ya Bibele dibokeng tsa bona.—Bala Baheberu 10:24, 25.

Mokgatlo wa mehleng ena wa Dipaki Tsa Jehova o qadile ka bo1870. Sehlotshwana sa baithuti ba Bibele se ile sa boela sa fumana dinnete tseo e neng e le kgale di lahlehile. Di ne di tseba hore Jesu o ne a ile a hlophisa phutheho ya Bokreste hore e bolele, kahoo di ile tsa qala mosebetsi wa ho bolela ka Mmuso lefatsheng lohle. Ka 1931, di ile tsa ipitsa Dipaki Tsa Jehova.—Bala Liketso 1:8; 2:1, 4; 5:42.

Nakong e fetileng, diphutheho tsa Bokreste tse dinaheng tse ngata di ne di thuswa ke sehlopha se busang se neng se nka Jesu e le Hlooho ya phutheho. (Liketso 16:4, 5) Ka ho tshwanang le kajeno Dipaki Tsa Jehova lefatsheng lohle di fumana thuso ho Sehlopha se Busang se entsweng ka baholo ba nang le boiphihlelo. Sehlopha se Busang se hlokomela diofisi tsa makala tsa Dipaki Tsa Jehova tse etsang mosebetsi wa ho fetolela, ho printa esita le ho fana ka dingolwa tse thusang batho ho ithuta Bibele, ka dipuo tse fetang 600. Kahoo, Sehlopha se Busang se fana ka kgothatso e thehilweng Mangolong le ho tataisa diphutheho tse fetang 100 000 lefatsheng lohle. Phuthehong e nngwe le e nngwe ho na le banna ba tshwanelehang ba sebeletsang e le baholo kapa balebedi. Banna bana ba hlokomela mohlape wa Modimo ka lerato.—Bala 1 Petrose 5:2, 3.

Dipaki Tsa Jehova di hlophiseditswe ho bolela ditaba tse molemo le ho etsa barutuwa. Jwalokaha baapostola ba ne ba etsa, le rona re bolela ka ntlo le ntlo. (Liketso 20:20) Re boetse re ithaopela ho ithuta Bibele le batho ba ratang nnete ka dipelo tsohle. Empa Dipaki Tsa Jehova hase mokgatlo feela tje. Re lelapa le nang le Ntate ya lerato. Re bara le baradi ba motho ba ratanang. (2 Bathesalonika 1:3) Kaha batho ba Jehova ba hlophiseditswe hore ba thabise Modimo le ho thusa ba bang, ke lelapa le thabileng ka ho fetisisa lefatsheng.—Bala Pesaleme ya 33:12; Liketso 20:35.