Ka mora hore Jesu a shwe, monna ya ruileng ya bitswang Josefa o ile a kopa hore Pilato a mo dumelle hore a theole setopo sa Jesu thupeng. Josefa o ile a phuthela setopo sa Jesu ka lesela, a mo tshela ka matswai yaba o mo kenya ka lebitleng. A re ba kwale lebitla leo ka lejwe le leholo. Baprista ba ka sehloohong ba ile ba re ho Pilato: ‘Re tshaba hore balatedi ba bang ba Jesu ba ka nna ba nka setopo sa hae ebe ba re o tsohile bafung.’ Yaba Pilato o re ho bona: ‘Kwalang lebitla mme le le lebele.’

Ka mora matsatsi a mararo, basadi ba bang ba ile ba ya lebitleng la Jesu hoseng yaba ba fumana ho tlositswe lejwe. Lengeloi le ile la re ho basadi bao: ‘Le se ke la tshoha. Jesu o tsositswe bafung. Tsamayang le ilo bolella barutuwa ba hae e le hore ba ka kopana le yena Galilea.’

Maria Magdalena o ile a potlakela ho ya kopana le Petrose le Johanne. A re ho bona: ‘Ho na le motho ya nkileng setopo sa Jesu!’ Yaba Petrose le Johanne ba mathela lebitleng la Jesu. Ha ba fihla ba fumana hore ha ho na letho ka lebitleng yaba ba kgutlela hae.

Ha Maria a kgutlela lebitleng, o ile a bona mangeloi a mabedi yaba o re ho ona: ‘Ha ke tsebe hore na ba isitse Morena wa ka hokae.’ O ile a bona monna eo a neng a nahana hore ke mohlokomedi wa jarete yaba o re ho yena: ‘Ntate, na o ka tseba hore na ba isitse Jesu hokae?’ Empa ha monna eo a re: “Maria!” o ile a tseba hore ke Jesu. O ile a hweletsa a re: ‘Mosuwe!’ yaba o a mo haka. Jesu o ile a re ho yena: ‘Tsamaya o jwetse banabeso hore o mpone.’ Hanghang Maria o ile a matha a ilo bolella barutuwa hore o bone Jesu.

Hamorao letsatsing leo, barutuwa ba babedi ba Jesu ba ne ba tswa Jerusalema ba ya Emmause. Ho na le monna ya ileng a fihla a ba botsa hore na ba ntse ba bua ka eng. Ba re ho yena: ‘Ha o so utlwe? Baprista ba ka sehloohong ba bolaile Jesu matsatsi a mararo a fetileng. Jwale ho na le basadi ba reng o a phela.’ Monna eo a re:  ‘Na le dumela seo baprofeta ba se buileng ha ba re Kreste o tla shwa a be a tsoswe bafung?’ Yaba o tswela pele ho ba hlalosetsa Mangolo. Ha ba fihla Emmause, barutuwa ba ile ba re monna eo a tsamaye le bona. Ka mora hore a rapelle dijo tsa mantsiboya ba ile ba hlokomela hore ke Jesu. Yaba Jesu o a nyamela.

Barutuwa bana ba babedi ba ile ba potlakela Jerusalema ntlong eo baapostola ba neng ba le ho yona mme ba ba bolella dintho tsohle tse etsahetseng. Ha ba le ka ntlong, Jesu o ile a hlaha ho bona kaofela. Qalong, baapostola ba ne sa dumele hore ke Jesu. Yaba o re ho bona: ‘Shebang matsoho a ka; a tshwareng. Boprofeta bo itse Kreste o tla tsoha bafung.’