Josiase e ile ya e ba morena wa Juda ha a le dilemo di robedi. Ka nako eo, batho ba ne ba sebedisa boloi ba bile ba rapela ditshwantsho. Ha Josiase a le dilemo di 16, o ile a ithuta ho rapela Jehova ka tsela e nepahetseng. Ha a le dilemo di 20, a fedisa medimo ya ditshwantsho naheng yohle. Mme ha a le dilemo di 26, a lokisetsa hore tempele ya Jehova e tsosoloswe.

Moprista ya phahameng Hilkia o ile a fumana moqolo o ngotseng Molao wa Jehova, mohlomong o ngotsweng ke Moshe. Mongodi wa morena ya bitswang Shafane o ile a isetsa Josiase moqolo oo mme a qala ho mo balla wona. Ha Josiase a ntse a mametse, a hlokomela hore ke kgale batho ba tlola Molao wa Jehova. Morena Josiase a re ho Hilkia: ‘Jehova o re halefetse haholo. Tsamaya o ilo bua le yena. Jehova o tla re bolella hore na re lokela ho etsang.’ Jehova o ile a ba araba a sebedisa moprofeta ya bitswang Hulda, a re: ‘Batho ba Juda ba mphuraletse. Ke tla ba fa kotlo empa eseng ha Josiase e ntse e le morena, hobane o ile a ikokobetsa.’

Ha Morena Josiase a utlwa ka sena, a bitsetsa Bajuda tempeleng. A ba balla Molao wa Jehova. Josiase le Bajuda ba tshepisa Jehova hore ba tla mo mamela ka dipelo tsohle tsa bona.

Bajuda ba ne ba qetile dilemo tse ngata ba sa etse mokete wa Paseka. Josiase o ile a bala Molaong hore Paseka e lokela ho ketekwa selemo le selemo, kahoo a re: ‘Re tla tshwarela Jehova  Paseka.’ Yaba Josiase o lokisa mahlabelo a mangata mme a hlophisa hore ho be le dibini ka tempeleng. Kahoo, Bajuda ba tshwara Paseka e neng e latelwa ke Mokete wa Mahobe a sa Lomoswang o nkang matsatsi a supileng. Ho ne ho e so ka ho e ba le Paseka e kang eo, haesale ho tloha matsatsing a Samuele. Josiase o ne a rata Molao wa Modimo e le kannete. Na le wena o thabela ho ithuta ka Jehova jwaloka Josiase?