O ITOKISETSA ho ya tshimong ka letsatsi leo o sa yeng mosebetsing ka lona. O a qeaqea ka motsotswana hobane o ikutlwa o kgathetse. Ekare o ka phomola hanyenyane hoseng hona! Empa o rapella taba ena mme o etsa qeto ya ho tsamaya. O sebetsa le moradi wabo rona ya hodileng mme o angwa ke mamello le mosa wa hae. Ha o ntse o e ya ka ntlo le ntlo, o bua ka molaetsa wa nnete, o a hlokomela hore bara le baradibabo rona lefatsheng ka bophara ba bolella batho molaetsa o tshwanang, ba sebedisa dibuka tse tshwanang, kaofela le kwetliswa ka tsela e tshwanang. Ha o fihla lapeng, o ikutlwa o le mafolofolo. O ikutlwa o thabile hore ebe ha o a lofa tshimo!

Hona jwale, tshebeletso ya Bokreste ke mosebetsi o ka sehloohong o amanang le Mmuso wa Modimo. Jesu o ile a bolela esale pele hore mosebetsi wa boboledi o ne o tla etswa lefatsheng lohle matsatsing a ho qetela. (Mat. 24:14) Boprofeta boo bo ile ba phethahala jwang? Karolong ena, re tla hlahloba batho, mekgwa, le dintho tsa bohlokwa tse ileng tsa nna tsa sebediswa tshebeletsong ya Bokreste, tse thusang batho ba dimilione lefatsheng lohle ho hlokomela hore Mmuso wa Modimo ke wa sebele.