1. Re ka sebetsa le Jehova ka ditsela dife?

MMOPI wa rona o ne a batla hore batho ba phethahetseng ba sebetsemmoho le yena ho finyella merero ya hae. Ho sa tsotellehe taba ya hore batho ha re a phethahala, batho ba tshephahalang ba ntse ba ka sebetsa le Jehova letsatsi le letsatsi. Nka ka mohlala, re “basebetsimmoho le Modimo” ka ho bolela ditaba tse molemo tsa Mmuso le ka ho etsa batho barutuwa. (1 Bakor. 3:5-9) O se o ka inahanela feela hore na ke tlotla e kaakang ho sebetsa le Mmopi ya matla ohle mosebetsing ona oo a sa batleng letho ka ona. Le ha ho le jwalo, ho bolela le ho etsa barutuwa ha se yona tsela feela ya ho sebetsa le Jehova. Sehloohong sena, re tla tshohla ditsela tse nne tseo re ka sebetsang le Jehova ka tsona. (1) Ka ho thusa ba lelapa le badumedimmoho, (2) ka ho amohela baeti, (3) ka ho ithaopela ho kgatha tema mesebetsing eitseng ka mokgatlong le (4) ka ho eketsa tshebeletso ya rona.—Bakol. 3:23.

2. Ke hobaneng ha e se bohlale hore re ipapise le ba bang ha re ntse re sebetsa le Jehova?

² Sehloohong sena, re tlo ithuta hore ha re a lokela ho bapisa tshebeletso ya rona le ya ba bang. Hopola hore re fapane ka dilemo, bophelo, maemo le bokgoni. Ke ka lebaka leo le moapostola Pauluse a ileng a budulelwa ho re: “E mong le e mong a ke a leke seo mosebetsi wa hae o leng sona, jwale o tla ba le sesosa  sa thabo e kgaphatsehang mabapi le yena a le mong, eseng ka ho ipapisa le motho e mong.”—Bagal. 6:4.

3. Ke hobaneng ha ho ka thwe motho ya hlokomelang ba lelapa la hae o sebetsa le Modimo?

³ Jehova o lebelletse hore bahlanka ba hae ba hlokomele ba malapa a bona. Ka mohlala, motho o tla lokela ho sebetsa hore a kgone ho hlokomela lelapa ka tjhelete. Bomme ba bangata ba dula lapeng e le hore ba hlokomele maseanyana a bona. Athe ba bang bona ba lokela ho hlokomela batswadi ba bona ba seng ba fokollwa ke bophelo. Tsena ke dintho tseo re tlamehang ho di etsa. Hobane Lentswe la Modimo le re: “Haeba le ha e le mang a sa lokisetse hore ho be le dintho tse hlokahalang bakeng sa bao e leng ba hae, mme haholoholo bakeng sa ditho tsa lelapa la hae, o latotse tumelo mme o mobe ho feta motho ya se nang tumelo.” (1 Tim. 5:8) Haeba le wena o boemong bo jwalo, mohlomong o ka se kgone ho sebeletsa Jehova jwalo ka ha o ne o ka lakatsa. O se ke wa lahlela thaole. Jehova o a thaba ha o hlokomela lelapa la hao.—1 Bakor. 10:31.

4. Batswadi ba ka etelletsa Mmuso pele jwang, hona ditlamorao e tla ba dife?

⁴ Batswadi ba Bakreste ba sebetsa le Jehova ha ba thusa bana ba bona hore ba etelletse mmuso pele. Batswadi ba ileng ba etsa jwalo, ba a thaba ha hamorao bana ba bona ba le tshebeletsong ya nako e tletseng hole le hae. Ba bang ke baromuwa, ha ba bang e le bopulamadiboho ba sebeletsang tlhokahalong. Athe ba bang bona ba Bethele. Ho ba hole hona ho ka etsa hore ba hlolohelwe hae hobane jwale ba sa kgone ho kopana le ditho tse ding tsa lelapa kgafetsa. Esita le maemong ao a jwalo, batswadi ba hlileng ba ratang Jehova, ba kgothalletsa bana ba bona hore ba mamelle dikabelong tsa bona. Hobaneng? Hobane ba thabiswa le ho kgotsofatswa ke ho tseba hore bana ba bona ba etelletsa Mmuso pele. (3 Joh. 4) Mohlomong batswadi ba bangata ho bana, ba ikutlwa jwalo ka Anna ya ileng a re o “adimane” ka mora wa hae Samuele ho Jehova. Ka sebele ba nka ho sebetsa le Jehova ka tsela ena e le tlotla e babatsehang.—1 Sam. 1:28.

5. O ka thusa ditho tsa phutheho ya heno jwang? (Sheba setshwantsho se qalong)

⁵ Haeba wena ha o na boikarabelo bo boima ba lelapa, na o ka thusa badumedimmoho le wena ba hlokomelang beng ka bona ba fokollwang ke bophelo, ba hodileng kapa ba hlokang thuso e itseng? Mohlomong o ka hla wa qalella ho qamaka phuthehong ya heno hore o bone hore na ke mang eo o ka mo tswelang kgomo. Mohlomong o ka sala le motswadi ya hodileng wa moradi e mong wabo rona ha a ilo phetha mabaka a mang a itseng. Kapa o ka thusetsa ka hore o ye le motho dibokeng, o mo ele dishopong kapa o tsamaye le yena ha o ilo bona motho ya kulang sepetlele. E ka nna yaba ka ho etsa jwalo, o sebetsa le Jehova ho arabela thapelo ya ngwaneo wabo rona.—Bala 1 Bakorinthe 10:24.

6. Ho amohela baeti ho bolelang?

⁶ Basebetsimmoho le Modimo ba tsejwa ka ho amohela baeti. Mangolong a Segerike a Bakreste, polelwana “ho amohela baeti,” e bolela ho bontsha mosa ho batho bao re sa ba tsebeng. (Baheb. 13:2) Lentswe la Modimo le na le ditlaleho tse ngata tse re rutang hore re bontshe lerato le jwalo. (Gen. 18:1-5) Re ka kgona, ebile ha e le hantle re lokela ho batla menyetla ya ho thusa ba bang, ebang ‘ba amana le rona tumelong’ kapa tjhe.—Bagal. 6:10.

7. Ke hobaneng ha e ka ba hantle hore re amohele balebedi ba potoloho?

⁷ Na o ka sebetsa le Modimo ka hore  o amohele balebedi ba potoloho? (Bala 3 Johanne 5, 8.) Dinako tse jwalo, di ka re fa menyetla ya hore re kgothatsane. (Bar. 1:11, 12) Ako nahane ka se ileng sa etsahalla Olaf. O hopola dilemong tsa morao kwana ha phuthehong ya habo, ho ne ho se le ya mong feela ya ileng a amohela molebedi wa bona wa potoloho eo e neng e le lesoha. Yaba Olaf o botsa batswadi ba hae bao e neng e se Dipaki Tsa Jehova hore na mopotolohi a ka fihlela lapeng na. Ba dumela, empa ba re Olaf o tla lokela ho robala sofeng. Olaf ha a a ka a ba le bothata ka seo. O re: “Eo e bile beke e monate ka ho fetisisa. Re ne re tsoha hoseng ka matjeke le mopotolohi ebe re qoqa ka dihlooho tse thahasellisang ha ntse re ja borakafese. Kgothatso eo ke ileng ka e fumana, e ile ya fehla takatso ya ka ya ho batla ho kenela tshebeletso ya nako e tletseng.” Hona jwale, Olaf o se a qetile dilemo tse 40 e le moromuwa.

8. Re na le mabaka afe a hore re be mosa esita le ha qalong batho ba sa ananele seo? Hlalosa.

⁸ Ho na le ditsela tse ngata tseo ka tsona o ka bontshang batho bao o sa ba tsebeng lerato esita le ha qalong ba sa ananele. Nahana ka mohlala ona o latelang. Ha moradiwabo rona e mong wa Spain a ntse a ithuta Bibele le Yesica ya tswang Ecuador, o ile a elellwa hore Yesica o ntse a lla. Yaba o a mo botsa hore na bothata keng. Yesica o ile a mo bolella hore pele ba fallela mona Spain, ba ne ba hula ka thata ditjheleteng, hoo ka nako e nngwe ho kileng ha etsahala hore ba hloke le ha e se e ka ba papa feela ka pitseng. A re seo a neng a kgona ho se fa moradinyana wa hae feela e ne e le metsi. Yesica o ile a leka ho koiyetsa moradi wa hae hore a robale, ha ka nako e tshwanang a ntse a rapella thuso. Nakwana ka mora moo, o ile a etelwa ke baradibabo rona ba babedi, empa o ne a halefile hoo a ileng a ba a tabola le dimakasine tsa bona. Yaba o re: “Hao! Ene e boetse e le dijo tsona ntho tsee hore nka di fepa moradinyana wa ka!” Baradibabo rona ba ile ba leka ho mo kgothatsa, empa ba hamela letanteng. Yaba hamorao ba mo siela baskete ya dijo monyako. Yesica o ile a utlwa bohloko haholo mme a itshola hore ebe o ile a iphapanya ha Jehova a arabela thapelo ya hae. Jwale o ne a se a ikemiseditse ho sebeletsa Modimo. Ruri baradi bana babo rona ba ile ba kgola ditholwana tse monate.—Moek. 11:1, 6.

9, 10. (a) Ke diketsahalo dife tsa mehleng ya ha ho ne ho ngolwa Bibele tseo ho tsona ho neng ho hlokahala hore bahlanka ba Modimo ba ithaope? (b) Ke mesebetsi efe eo hangata e etswang ke banna ka phuthehong?

⁹ Nakong e fetileng Baiseraele ba ne ba na le menyetla e mengata ya hore ba ithaope. (Ex. 36:2; 1 Likron. 29:5; Neh. 11:2) Esita le kajeno ho na le menyetla e mengata e re bulehetseng ya ho sebedisa nako, thepa le bokgoni ba rona ho thusa bara le baradibabo rona. Ha re ithaopa, re tla thaba ebile Modimo o tla re hlohonolofatsa.

¹⁰ Lentswe la Modimo le kgothalletsa banna hore ba sebetse le Jehova ka ho hahamalla boikarabelo ka phuthehong. (1 Tim. 3:1, 8, 9; 1 Pet. 5:2, 3) Ha ba etsa jwalo, ba tla be ba bontsha hore ba batla ho thusa bara le baradi babo bona. (Lik. 6:1-4) Na baholo ba se ba kile ba o botsa hore na o ka lakatsa ho ba mohlokomedi, ho thusa ka dingolwa le ka tshimo? Kapa na mohlomong ba kile ba o kopa hore o lokise moo ho senyehileng teng kapa ka ho etsa mesebetsi e meng eitseng?

11. Moradi e mong wabo rona o ile rua molemo jwang ka botswalle boo a ileng a bo etsa ha a le diprojekeng tse fapaneng mokgatlong wa Modimo?

¹¹ Hangata batho ba ithaopang nakong ya ha ho etswa diprojeke tse itseng mokgatlong  wa Modimo ba etsa metswalle e metjha. Mohlala o mong ke wa Margie, e leng moradiwabo rona e mong ya sebeleditseng dikahong tsa Diholo tsa Mmuso ka dilemo tse 18. O sebeditse le baradibabo rona ba mmalwa ba batjha dilemong hore a ba kwetlisetse mosebetsi. O fumane hore ho ne ho ba monate ebile ba kgothatsana tumelong. (Bar. 1:12) Dinakong tsa mathata, Margie o ile a kgothatswa ke metswalle ya hae eo a neng a ile a kopana le yona ha a ne a sebetsa diprojekeng tsa kaho. Na o se o kile wa ithaopela ho sebetsa diprojekeng tse jwalo ka tseo? Ebang o na le bokgoni kapa tjhe, na o ka itlhahisa ka ho rata?

12. O ka thusa ka ditsela dife nakong ya ho hlaha koduwa?

¹² Ha dikoduwa di hlaha, bahlanka ba Modimo ba sebedisa menyetla yohle ho sebetsa le Modimo ka ho thusa bara le baradibabo bona. Ka mohlala, ba fana ka tjhelete ho thusa ba hlahetsweng ke koduwa. (Joh. 13:34, 35; Lik. 11:27-30) Tsela e nngwe ke ka ho thusa ka ho hlwekisa le ho ntjhafatsa mehaho. Moradiwabo rona Gabriela ya dulang Poland, ntlo ya hae e ile ya harasanngwa ke dikgohola. Empa o ile a thuswa ke bara le baradibabo rona ho tswa diphuthehong tse haufinyane. O re: “Ha ke batle ho bua ka dintho tseo ke lahlehetsweng ke tsona, empa ke batla ho le bolella ka melemo eo ke e fumaneng. Se nketsahalletseng se entse hore ke bone hore ho ba karolo ya phutheho ya Bokreste, ke letlotlo leo ho seng letho leo nka le bapisang le lona, ebile ke mohlodi wa thabo e kgapatsehang.” Batho ba ileng ba hlahelwa ke koduwa, ba ikutlwa ba matlafetse ka mora hore ba fumane thuso. Ba sebetsang le Jehova ka ho fana ka thuso maemong a jwalo, le bona ba a matlafala le ho kgotsofala.—Bala Liketso 20:35; 2 Bakorinthe 9:6, 7.

13. Ho ithaopa ho ka matlafatsa kamano ya rona le Jehova jwang? Fana ka mohlala.

¹³ Stephanie le bahweletsi ba bang ba ile ba thaba ha ba sebetsa le Modimo ka ho thusa Dipaki tse neng di tlile United States e le baphaphathehi. Ba ile ba thusa malapa a neng a tswa dibakeng tse neng di harasantswe ke ntwa, hore a fumane matlo a nang le fenetjhara. Stephanie o re: “Re ile ra ameha maikutlo haholo ha re bona bana bana babo rona ba thabile ha re ba thusa.”  O phaella ka hore: “Malapa ana a utlwisisa hore re a thusitse, empa ha e le hantle ke ona a re thusitseng le ho feta. Lerato, bonngwe, tumelo le ho tshepa Jehova, e leng dintho tseo re di boneng ho bara le baradi bana babo rona, di re thusitse hore re rate Jehova le ho feta. Di boetse di entse hore le rona re ananele sohle seo re se fumaneng ka mokgatlo wa hae.”

14, 15. (a) Moprofeta Esaia o ne a na le boikutlo bofe? (b) Baboledi ba Mmuso kajeno ba ka etsisa Esaia jwang?

¹⁴ Na o ka rata ho sebetsa le Jehova ka ho felletseng? Na ebe o ka rata ho fallela moo ho nang le tlhokahalo? Ha se hore bahlanka ba Modimo ba lokela hore ba be ba ye hole le hae hore feela ba fane. Empa maemo a bara le baradi ba bang babo rona, a ba dumella hore ba fallele hole le hae. Ba na le boikutlo bo tshwanang hantle le ba moprofeta Esaia. Ha Jehova a ne a re: “Ke tla roma mang, mme ke mang ya tla ya bakeng sa rona?” Esaia o ile a re: “Ke nna enwa! Roma nna.” (Esaia 6:8) Na le wena o na le tabatabelo kapa maemo a hao a o dumella hore o ye tlhokahalong? O ka thusa ka ditsela dife?

¹⁵ Ha Jesu a bua ka mosebetsi wa ho bolela le ho etsa barutuwa, o ile a re: “Kotulo e kgolo, empa basebetsi ha ba bakae. Ka hona, le kope Monga kotulo hore a romele basebetsi kotulong ya hae.” (Matheu 9:37, 38) Na ebe o ka ya tlhokahalong mohlomong ebile o le pulamadiboho? Kapa na o ka thusa motho e mong hore a etse jwalo? Bara le baradibabo rona ba bangata ba bone hore tsela e molemo ya ho bontsha hore ba rata Modimo le moahelani, ke ka ho ba pulamadiboho tlhokahalong, e leng moo ho hlokahalang basebetsi bakeng sa kotulo. Na ebe ho na le ditsela tseo o ka eketsang tshebeletso ya hao ka tsona? Ha ho na ntho e monate jwalo ka eo.

16, 17. Ke menyetla efe e meng e o bulehetseng haeba o batla ho eketsa tshebeletso ya hao ho Jehova?

¹⁶ Na o ka rata ho sebeletsa Bethele, kapa wa thusa kahong ya mehaho ya tshebeletso, kapa wa ba moithaopi wa nakwana kapa mohlomong wa sebeletsa o ntse o tloha hae? Ho dula ho na le tlhokahalo ya batho ba ka sebeletsang Jehova hohle moo ba ka iswang teng le ho etsa mosebetsi ofe kapa ofe oo ba o fuwang. Sena se ka ba hloka hore ba sebeletse moo ho nang le tlhokahalo e kgethehileng, le hoja bona ba na le tsebo, boiphihlelo kapa bokgoni bo fapaneng. Le ha ho le jwalo, Jehova o ananela boitelo boo batho ba itlhahisang ka ho rata ba bo etsang ho sebeletsa moo ho nang le tlhokahalo.—Pes. 110:3.

¹⁷ Na o lakatsa ho fumana kwetliso e eketsehileng e le hore o ka kwetla ka ho felletseng hore o phethe tshebeletso e halalelang? Haeba ho jwalo, e ka nna yaba o a tshwaneleha ho ya Sekolong sa Baevangedi ba Mmuso. Se fana ka kwetliso ho banna le basadi ba ikemiseditseng ho sebeletsa Jehova, ba seng ba ntse ba le tshebeletsong ya nako e tletseng, e le hore mokgatlo o ka ba sebedisa haholwanyana. Ba kopang ho ya sekolong sena, ba lokela ho ikemisetsa ho amohela kabelo efe kapa efe ka mora moo. Jwale, na o ka hahamalla boikarabelo bo eketsehileng ka ho ya sekolong sena?—1 Bakor. 9:23.

18. O tla fumanang ha o sebetsa le Jehova letsatsi le letsatsi?

¹⁸ Ka ha re bahlanka ba Jehova, re fana ka seatla se bulehileng, re etsa dintho tse molemo, re mosa ebile re lerato. Re boetse hape re hlokomela ba bang letsatsi le letsatsi. Sena se re tlisetsa thabo le kgotso. (Bagal. 5:22, 23) Ho sa tsotellehe maemo a hao bophelong, o tla thaba ha feela o etsisa Jehova ka hore o fane ka seatla sebulehileng le ka ho sebetsa le yena.—Liprov. 3:9, 10.