DIANA o na le dilemo tse fetang 80. Monna wa hae o ne a na le lefu la ho lahlehelwa ke kelello mme o ne a dula lehaeng leo ho hlokomelwang batho ba kulang ho lona, dilemo tse mmalwa pele a hlokahala. Diana o ile a ba a lokela ho mamella bohloko ba kankere ya matswele le ho hlokahallwa ke bara ba hae ba babedi. Ho sa tsotellehe mathata ana a hae, bara le baradibabo rona ba ne ba dula ba mo bona a thabile ha a le Holong ya Mmuso kapa ha a le tshimong.

John e bile mopotolohi ka dilemo tse fetang 43. O ne a rata kabelo ena ya hae haholo. Le ha ho le jwalo, o ile a lokela ho tlohella ho ba mopotolohi e le hore a kgone ho hlokomela mong ka yena ya neng a kula mme hona jwale o se a kopanela phuthehong e nngwe sebakeng seo. Ha batho ba tsebileng John ka dilemo tse ngata ba kopana le yena dikopanong, ba mo bona e ntse e le motho ya thabileng jwalo ka pele.

Keng e neng e etsa hore Diana le John ba dule ba thabile? Ebe ho tla jwang hore motho ya tetebetseng maikutlo le ya nang le mathata a ho kula a dule a thabile? Hape ho tla jwang hore motho ya seng a sena kabelo e kgethehileng a dule a thabile? Bibele e re bolella hore: “Ya lokileng o tla ithabela ho Jehova.” (Pes. 64:10) Re ka utlwisisa nnete ena ya Bibele haeba feela re hlahlobisisa hore na ke dintho dife tse re tlisetsang thabo ya sebele.

Re a tseba hore thabo eo re bang le yona ka dintho tse itseng e ka ba ya nakwana. Nahana ka batho ba itokiselletsang ho nyalana, ba lebelletseng lesea kapa motho ya fumanang kabelo e ntjha tshebeletsong. Ka ha dintho tsena di tswa ho Jehova, ho hlakile hore di tla re thabisa. Etswe ke yena moqapi wa lenyalo mme o entse tokisetso ya hore banyalani ba be le bana, hape o boetse o re fa dikabelo tse itseng ka phuthehong.—Gen. 2:18, 22; Pes. 127:3; 1 Tim. 3:1.

Le ha ho le jwalo, dintho tsena di ka re tlisetsa thabo ya nakwana. Ho ba leng lenyalong, molekane e mong a ka tswa e mong tlase kapa a hlokahala. (Ezek. 24:18; Hos. 3:1) Athe batswadi bona, ba ka tobana le phephetso ya bana ba sa hlompheng le ba sa mameleng Modimo hoo ba ka qetellang ba kgaotswe. Sena se ile sa etsahalla Samuele, ha bara ba hae ba ne ba fetohela Jehova. Davida le yena o ile a etsa dintho tse  ileng tsa tlisetsa ba ntlo ya hae tlokotsi. (1 Sam. 8:1-3; 2 Sam. 12:11) Diketsahalo tse tjena di ka re nyotobetsa tsa ba tsa re tlisetsa masisapelo. Ka sebele ha di re tlisetse thabo.

Ka ho tshwanang, dikabelo tseo re nang le tsona ka phuthehong di ka fetoha, mohlomong ka lebaka la ho kula, mathata a lelapa kapa diphetoho tse itseng tshebeletsong. Ba bangata ba ileng ba tobana le maemo a jwalo, ba a dumela hore ba ntse ba hlolohela thabo eo mosebetsi wa bona o neng o ba tlisetsa yona.

Ho hlakile hore haeba thabo ya rona e itshetlehile ka dintho tseo re seng re buile ka tsona ka hodimo, e ke ke ya tshwarella. Jwale na ebe ho na le thabo e ka tshwarellang nako e telele le haeba maemo a ka fetoha? Ee, e teng. Hopola hore Samuele, Davida le ba bang, ba ile ba ba le thabo e tshwarellang le ha ba ne ba tobana le diteko.

Jesu o ne a tseba hore na thabo ya sebele keng. Ha a ntse a le lehodimong, o ne a dula ‘a nyakalletse ka pela Jehova’ maemong ohle. (Liprov. 8:30) Empa ha a se a le lefatsheng, o ile a tobana le maemo a lekang tumelo. Ho sa tsotellehe maemo ao, o ne a thabela ho etsa thato ya Ntate wa hae. (Joh. 4:34) Ho thweng ka bohloko boo a ileng a bo utlwa pele a hlokahala? Bibele e re bolella sena: “Ka lebaka la thabo e neng e behilwe ka pela hae o ile a mamella thupa ya tlhokofatso.” (Baheb. 12:2) Ka hona, re na le mabaka a utlwahalang a ho tshepa seo Jesu a se buileng mabapi le hore na thabo ya sebele keng.

Ka le leng, barutuwa ba Jesu ba 70 ba ile ba kgutlela ho yena ba thabile ka mora mosebetsi wa boboledi, hobane ba ile ba etsa dintho tse hlollang tse akaralletsang ho leleka mademona. Empa Jesu o ile a re ho bona: “Le se ke la thabela hore ebe meya e behwa tlasa lona, empa le thabe ka hobane mabitso a lona a ngotswe mahodimong.” (Luka 10:1-9, 17, 20) Ho hlakile hore ho amohelwa ke Jehova, ho bohlokwa ho feta menyetla e kgethehileng eo re e fumanang tshebeletsong. Ka nnete re a thaba ha re tseba hore Jehova o tla dula a hopola bahlanka ba hae ba tshepahalang.

Ka lekgetlo le leng ha Jesu a ne a ruta bongata, mosadi e mong o ile a re e tlameha ebe Mme wa Jesu o lehlohonolo hakaakang hore ebe o ile a ba le ngwana ya jwalo ka yena. Empa ha Jesu a kgalemela mosadi eo o ile a re: “Tjhe, ho e na  le hoo, ho thaba ba utlwang lentswe la Modimo mme ba le boloka!” (Luka 11:27, 28) Ke nnete hore motswadi o ba motlotlo haeba bana ba hae ba mamela Jehova, empa ntho e lokelang ho mo tlisetsa thabo ya sebele, ke hore yena ka boyena a be le kamano e ntle le Jehova.

Ka sebele, ho amohelwa ke Jehova ho tla re tlisetsa thabo ya sebele. Le haeba re ka tobana le diteko tse boima, di ke ke tsa re tsitsinya. Ho e na le hoo, haeba re di mamella, re tla fumana thabo ya sebele. (Bar. 5:3-5) Ho ekelletsa moo, Jehova o fana ka moya wa hae o halalelang ho ba mo tshepang mme o ba tlisetsa thabo. (Bagal. 5:22) Sena se re thusa ho utlwisisa mantswe a ho Pesaleme ya 64:10 a reng: “Ya lokileng o tla ithabela ho Jehova.”

Jwale re utlwisisa hantle hore na ke hobaneng ha Diana le John, ba ne ba dula ba thabile le hoja ba ne ba tobana le maemo a boima. Diana o re: “Ke entse Jehova setshabelo sa ka, feela jwalo ka ha ngwana a etsa motswadi wa hae setshabelo.” Ebe jwale Diana o ile a amohelwa ke Modimo jwang? O di beha tjena: “Ke utlwa eka Jehova o ntlhohonolofaditse haholo ka ho mpha matla a ho tswela pele ke ya tshimong ka mehla ke thabile.” Ha John a hlalosa se ileng sa mo thusa ho dula a tjheseha tshebeletsong le hoja a ile a kgaotsa ho ba mopotolohi, o re: “Ho tloha ka 1998 ha ke ne ke fuwa kabelo ya ho ba morupedi Sekolong sa ho Kwetlisetswa Bosebeletsi, ke ile ka ipha nako e ngata ya ho ithuta ke le mong ho feta le ha e le neng pele.” Yena le mosadi wa hae ba re: “Re ile ra ithuta hore ho sebeletsa Jehova mofuteng le ha e le ofe wa tshebeletso ho bohlokwa. Sena se ile sa re thusa ho amohela diphetoho tse ileng tsa etsahala. Le ka mohla ha re itshole.”

Bara le baradibabo rona ba bangata, ba ile ba bona nnete e hlaloswang ke lengolo la Pesaleme ya 64:10. Nahana ka banyalani ba ileng ba qeta dilemo tse 30 ba sebeletsa Bethele e United States. Ba ile ba lokela ho kgutlela tshimong hore e lo ba bopulamadiboho ba kgethehileng. Ha ba re phethela ba re: “Ka tlhaho motho o a sarelwa ha a lahlehelwa ke ntho eo a neng a e rata, empa bonneteng re ke ke ra sarelwa ho ya ho ile.” Ka pelepele ba ile ba ba mafolofolo tshimong le phuthehong eo ba neng ba e abetswe. Ba phaella ka hore: “Re ile ra lokela ho toba taba ha re kopa Jehova ho itseng. Ya re ha re bona a araba dithapelo tsa rona, ra thaba le ho kgothala haholo. Nakonyana ka mora hore re fihle phuthehong ena, ba bangata e ile ya ba bopulamadiboho, ra ba ra fumana le batho ba thahasellang ho ithuta Bibele.”

Ka ha mathata a dula a le teng, ha ho bonolo hore motho a dule a thabile. Empa re a kgothala ha re utlwa mantswe a ho Pesaleme ya 64:10. Le hoja ka dinako tse ding re ka utlwa re nyahame, re ka kgodiseha hore haeba fela re le ba lokileng mme re tshepahalla Jehova ho sa tsotellehe maemo ao re tobanang le ona, re tla thaba. Ho feta moo, re ka lebella ka tjantjello e kgolo ha Jehova a phethahatsa tshepiso ya hae ya hore, ho tla ba le “mahodimo a matjha le lefatshe le letjha.” Ka nako eo, re tla be re phethahetse. Bahlanka bohle ba Modimo ba tla thaba “mme [ba] nyakalle ka ho sa feleng” ka dintho tsohle tseo Jehova a tlang ho ba etsetsa tsona.—Esa. 65:17, 18.

A ko nahane feela o se o phetse hantle mmeleng mme o na le mafolofolo a ho etsa mesebetsi ya letsatsi le letsatsi. Re ke ke ra hlola re hopola dintho tse bohloko tse ileng tsa re etsahalla nakong e fetileng. Re kgodisehile hore “dintho tsa pele di ke ke tsa hopolwa, kapa tsa fihla ka pelong.” Tsoho ya bafu e tla re kopanya le batho bao re ba ratang. Feela jwalo ka ha batswadi ba ngwanana e mong ya dilemo di 12 “ba [ile] ba hlollwa haholo” ha Jesu a ne a mo tsosa, le batho ba dimilione ba tla ikutlwa ka tsela e tshwanang. (Mar. 5:42) Lefatsheng le letjha, motho e mong le e mong ya phelang, e tla ba “ya lokileng” mme o tla “thaba ka lebaka la Jehova.”