SEHLOOHO SE ITHUTWANG SA 6
PINA YA 18 Re a Leboha ka Thekollo
Ke Hobaneng ha re Lokela ho Ananela Hore Ebe Jehova o a re Tshwarela?
“Modimo o ratile lefatshe haholo hoo a ileng a fana ka Mora wa hae ya mong.”—JOH. 3:16.
NTLHAKGOLO
E le hore re ananele taba ya hore Jehova o re tshwarela dibe, re lokela ho utlwisisa haholwanyane hore na o ile a etsang e le hore a re tshwarele.
1, 2. Boemo ba rona bo tshwana le ba mohlankana eo ho builweng ka yena serapeng sa pele jwang?
NAHANA ka mohlankana ya holetseng lelapeng le ruileng ya ileng a welwa ke koduwa ya hore batswadi ba hae ba hlokahale. O ile a utlwa bohloko bo otlang pelo, empa tsena e ne e le dinyane. O ile a fumana hore batswadi ba hae ba kene dikolotong tse ngata. Ho ena le ho ja lefa la bona, o setse le dikoloto tse hlokang ho patalwa empa o sitwa ho di patala.
2 Boemo ba rona bo tshwana le ba mohlankana enwa. Batswadi ba rona ba pele e leng Adama le Eva, ba ne ba phethahetse mme ba phela ha monate paradeiseng. (Gen. 1:27; 2:7-9) Ba ne ba ka phela ka ho sa feleng ba thabile empa dintho di ile tsa fetoha. Ba ile ba lahlehelwa ke lehae la bona le letle le monyetla wa ho phela ka ho sa feleng. Ba ne ba tla siela bana ba bona lefa lefe? Bibele e re: “Sebe se ile sa kena lefatsheng ka motho a le mong mme sa tlisa lefu. Ka hoo, lefu la namela ho batho bohle hobane kaofela ba ne ba entse sebe.” (Bar. 5:12) Lefa leo Adama a re sietseng lona, ke sebe se etsang hore ebe qetellong re a shwa. Sebe sena se tshwana le sekoloto se boima seo ho se nang motho ya ka kgonang ho se patala.—Pes. 49:8.
3. Ke hobaneng ha re ka re dibe di tshwana le dikoloto?
3 Bibele e tshwantsha dibe le dikoloto. (Mat. 18:32-35) Ha re etsa sebe ho tshwana le ha eka re kolota Jehova mme o lebelletse hore re patale sekoloto seo. Haeba Jehova a ne a sa etsa tokisetso ya hore re tshwarelwe dibe, re ne re tla lokela ho patala sekoloto seo ka bophelo ba rona.—Bar. 6:7, 23.
4. (a) Ke hobaneng ha baetsadibe bohle ba hloka thuso? (Pesaleme ya 49:7-9) (b) Ka Bibeleng, lentswe “sebe” le bolelang? (Sheba lebokose le reng “ Sebe.”)
4 Na ho ka kgoneha hore re fumane bophelo boo Adama le Eva ba bo lahlileng ka boomo? E, empa ha ho matleng a rona hore re bo fumane. (Bala Pesaleme ya 49:7-9.) Ntle le hore re fumane thuso, re ne re ke ke ra ba le tshepo ya tsoho ya bafu. Ha e le hantle, lefu la rona le ne le tla tshwana le lefu la diphoofolo tseo hoseng mohla di tla tsoha.—Moek. 3:19; 2 Pet. 2:12.
5. Ntate wa rona ya lerato o re thusitse jwang ho re patalla sebe seo re se futsitseng? (Sheba setshwantsho .)
5 O nahana hore mohlankana eo re buileng ka yena qalong, o ne a ka ikutlwa jwang haeba monna ya ruileng a ne a ka ithaopela ho patala dikoloto tsohle tsa hae? E tlameha ebe mohlankana enwa o ne a tla ananela mpho ena haholo le ho e amohela. Ka tsela e tshwanang, Ntate wa rona ya lerato Jehova, o re file mpho ena e le hore a patale sebe seo re se futsitseng ho Adama. Ha Jesu a hlalosa taba ena o ile a re: “Modimo o ratile lefatshe haholo hoo a ileng a fana ka Mora wa hae ya mong e le hore e mong le e mong ya bontshang hore o dumela ho yena a se ke a timetswa empa a fumane bophelo bo sa feleng.” (Joh. 3:16) Ho ekelletsa moo, mpho ena e re file monyetla wa hore re ka ba metswalle ya Jehova hape.
Jesu o ile bolela ditaba tse monate tsa ka moo Jehova a re tshwarelang ka teng a sebedisa sehlabelo sa tefo ya topollo. (Joh. 3:16) Hape o ile a ithaopela ho tela bophelo ba hae e le hore a ka fana ka tefo ya topollo (Sheba serapa sa 5)
6. Re tlo hlahloba eng sehloohong see, hona hobaneng?
6 Re ka rua molemo jwang mphong ee e babatsehang e etsang hore re tshwarelwe dibe? Karabo ya potso ena re e fumana tseleng eo Bibele e sebedisang mantswe a latelang ka yona, e leng poelano, sehlabelo sa ho tshwarelwa dibe, se entsweng, tefo ya topollo, topollo le ho nkwa re lokile. Sehloohong sena re tlo bua ka hore na mantswe ana a bolelang. Ha re ntse re thuisa ka se bolelwang ke mantswe ana, re tla ananela haholwanyane hore ebe Jehova o a tshwarela.
PAKANE: POELANO
7. (a) Adama le Eva ba ile ba lahlehelwa ke eng hape? (b) Ke eng eo re e hlokang jwalo ka bana ba Adama le Eva? (Baroma 5:10, 11)
7 Ha Adama le Eva ba etsa sebe ka hore ba se ke ba mamela Modimo, ba ile ba lahlehelwa ke monyetla wa ho phela ka ho sa feleng. Hape ba ile ba fetoha dira tsa Ntate wa bona Jehova. Adama le Eva e ne e le karolo ya lelapa la Modimo. (Luka 3:38) Empa ka mora hore ba se ke ba mo mamela, o ile a ba leleka lelapeng la hae le pele ba eba le bana. (Gen. 3:23, 24; 4:1) Ka ha re bana ba bona, re hloka ho boelana le Jehova. (Bala Baroma 5:10, 11.) Ka mantswe a mang, re lokela ho lwanela ho ba metswalle ya hae. Ho ya ka tlhaloso e nngwe, lentswe la Segerike le sebedisitsweng mona e le “ho boelana,” le ka bolela “ho ba motswalle le motho eo e neng e le sera sa hao.” Se thabisang ke hore Jehova o nkile bohato ba ho re thusa e le hore re be metswalle ya hae. Jwang?
TOKISETSO: SEHLABELO SA HO TSHWARELWA DIBE
8. Jehova o ile a etsang e le hore re be metswalle ya hae?
8 Sehlabelo sa ho tshwarelwa dibe ke tokisetso eo Jehova a e entseng e le hore batho ba baetsadibe ba ka boela ba eba le kamano e ntle le yena. O ile a etsa tokisetso ya hore seo Adama a neng a se lahlile re boele re se fumane. Mangolo a Segerike le ona a bua ka tokisetso eo Jehova a e entseng e le hore re ka boela ra ba metswalle ya hae. (Bar. 3:25) Tokisetso ena e etsa hore re be le kgotso le Modimo le hore re be metswalle ya hae.
9. Jehova o ile a etsa tokisetso efe e le hore a ka tshwarela dibe tsa Baiseraele?
9 Jehova o ile a etsa tokisetso ya hore Baiseraele ba tshwarelwe dibe tsa bona e le hore e ka ba metswalle ya hae. Tokisetso ena e ne e tshwarwa hanngwe ka selemo mme e ne e bitswa Letsatsi la Sehlabelo sa ho Tshwarelwa Dibe. Ka letsatsi leo, moprista ya phahameng o ne a nyehela diphoofolo bakeng sa setjhaba. Nnete ke hore mahlabelo a diphoofolo a ne a ke ke a hlakola dibe tsa batho ka ho felletseng hobane batho ba bohlokwa ho feta diphoofolo. Empa ha feela Baiseraele ba ne ba nyehela mahlabelo ho bontsha hore ba bakile e le ka nnete, e leng ntho eo Jehova a neng a ba laetse hore ba e etse, Jehova o ne a ikemiseditse ho ba tshwarela. (Baheb. 10:1-4) Ho ekelletsa moo, tokisetso eo le mahlabelo ao Baiseraele ba neng ba lokela ho a etsa, a ne a ba hopotsa hore ke baetsadibe mme ba hloka tharollo ya moshwelella.
10. Jehova o ile a etsang e le hore a tshwarele batho dibe ka ho felletseng?
10 Jehova o ne a ena le tharollo ya moshwelella e le hore a tshwarele batho dibe. O ile a dumella hore Mora wa hae ya ratwang a ‘fane ka bophelo ba hae e le sehlabelo hanngwe ebile e le la ho qetela hore a jare dibe tsa ba bangata.’ (Baheb. 9:28) Jesu o ile a “fana ka bophelo ba hae e le tefo bakeng sa ho lopolla batho ba bangata.” (Mat. 20:28) Tefo ya topollo ke eng?
TEFO: TEFO YA TOPOLLO
11. (a) Ho latela Bibele, tefo ya topollo ke eng? (b) Tefo ya topollo e ne e lokela ho patalwa ke motho ya jwang?
11 Ho latela Bibele, tefo ya topollo ke tefo e patalwang e le hore dibe tsa rona di tshwarelwe le hore re be metswalle ya Modimo. Ke tefo ya mofuta ofe e neng e lokela ho patalwa e le hore batho ba ka fumana seo Adama a se lahlileng? Hopola hore Adama le Eva ba lahlile bophelo bo phethahetseng le monyetla wa ho phela ka ho sa feleng. Ka hoo, tefo ya topollo e neng e lokela ho patalwa e ne e lokela ho lekana le se neng se lahlehile. (1 Tim. 2:6) E ne e ka patalwa ke motho (1) ya phethahetseng, (2) ya neng a ka kgona ho phela ka ho sa feleng le (3) ya neng a ikemiseditse ho tela bophelo ba hae bakeng sa rona. Bophelo ba motho ya jwalo bo ne bo ka re lopolla sebeng.
12. Ke hobaneng ha Jesu a ne a tshwaneleha ho re lopolla?
12 Nahana ka mabaka ana a mararo a etsang hore ebe Jesu o ne a tshwaneleha ho re lopolla. (1) O ne a phethahetse ebile “ha a ka a etsa sebe.” (1 Pet. 2:22) (2) Ka lebaka leo, o ne a ka kgona ho phela ka ho sa feleng lefatsheng. (3) O ne a ikemiseditse ho re shwela. (Baheb. 10:9, 10) Ka ha Jesu o ne a phethahetse, o ne a tshwana hantle le Adama pele a etsa sebe. (1 Bakor. 15:45) Jesu o ile a kgona ho kgutlisa seo Adama a se lahlileng ka hore ebe o ile a fana ka bophelo ba hae bakeng sa rona. (Bar. 5:19) Jesu e ile ya eba “Adama wa ho qetela.” Ha ho hlokahale hore ho be le motho e mong ya phethahetseng ya ka lefellang seo Adama a se lahlileng hobane Jesu o entse jwalo hanngwe ebile “e le la ho qetela.”—Baheb. 7:27; 10:12.
13. Phapang ke efe pakeng tsa tokisetso ya sehlabelo sa ho tshwarelwa dibe le tefo ya topollo?
13 Jwale phapang ke efe pakeng tsa tokisetso ya sehlabelo sa ho tshwarelwa dibe le tefo ya topollo? Tokisetso ya sehlabelo sa ho tshwarelwa dibe, ke ketso eo Modimo a e etsang e le hore batho ba boele ba be le kamano e ntle le yena. Tefo ya topollo yona, ke tefo e patalwang e le ho etsa hore tokisetso ya sehlabelo sa ho tshwarelwa dibe e kgonehe bakeng sa batho hobane ke baetsadibe. Tefo ena e ile ya patalwa ka hore ho tshollwe madi a bohlokwa a Jesu molemong wa rona.—Baef. 1:7; Baheb. 9:14.
DIPHELLO: TOPOLLO LE HO NKWA RE LOKILE
14. Re tlo bua ka eng, hona ho etsa jwalo ho tla re thusa jwang?
14 Re rua molemo jwang tokisetsong ya sehlabelo sa ho tshwarelwa dibe? Bibele e sebedisa mantswe a seng makae ho hlakisa melemo ya tokisetso ena. Le hoja tlhaloso ya mantswe ana e batla e tshwana, lentswe le leng le le leng le hatisa karolo ya bohlokwa ya tokisetso ya sehlabelo sa ho tshwarelwa dibe, e re thusang hore Jehova a re tshwarele dibe. Ha re ntse re hlahloba mantswe ana, re tla boela re bone hore na a re ama jwang.
15, 16. (a) Bibele e re “ho lopollwa” ho bolelang? (b) Ho lopollwa sebeng le lefung ho etsa hore re ikutlwe jwang?
15 Ka Bibeleng, ho lopollwa ho bolela ho pholoswa nthong e itseng ka lebaka la tefo ya topollo e ileng ya patalwa. Moapostola Petrose o ile a re: “Le a tseba hore ha le a lopollwa ka dintho tse senyehang tse kang silevera le kgauta bophelong ba lona bo se nang thuso boo le bo fetiseditsweng ke baholoholo ba lona. Le lopollotswe ka madi a bohlokwa a Kreste a jwalo ka a konyana e phetseng hantle, e hlwekileng.”—1 Pet. 1:18, 19.
16 Re lopollotswe sebeng le lefung ka lebaka la sehlabelo sa Jesu. (Bar. 5:21) Ke ho utlwahalang hore re ikutlwe re le molato re bile re kolota Jehova le Jesu ka lebaka la ho re lopolla ka madi a bohlokwa a Jesu.—1 Bakor. 15:22.
17, 18. (a) Ho nkwa re lokile ho bolelang? (b) Re rua molemo jwang ha Jehova a re nka re lokile?
17 Ho nkwa re lokile ho bolela hore re tshwaretswe diphoso tsa rona mme le sekoloto sa rona se hlakotswe ka ho felletseng. Sena ha se bolele hore Jehova o tlola molao wa hae wa toka. Ha se hore o re nka re lokile hobane re tshwaneleha kapa hona hore o amohela dibe tseo re di etsang. Empa Jehova o ikemiseditse ho re tshwarela ha re dumela ho seo yena le Jesu ba se entseng, e leng ho fana ka tefo ya topollo e le hore re ka tshwarelwa dibe.—Bar. 3:24; Bagal. 2:16.
18 Re rua molemo jwang ha Jehova a re nka re lokile? Ba bang ba nkwang ba lokile ba kgethelwa ho ya busa le Kreste lehodimong mme e be bana ba Modimo. (Tite 3:7; 1 Joh. 3:1) Jehova o se a tshwaretse dibe tsa bona. Ho jwalo ka ha eka ha ba a ka ba etsa dibe, ka hoo ba a tshwaneleha hore e ka ba karolo ya Mmuso wa Modimo. (Bar. 8:1, 2, 30) Ba bang bona ba nkwang ba lokile ba tla phela lefatsheng ka ho sa feleng. Jehova o se a ba tshwaretse dibe mme e se e le metswalle ya hae. (Jak. 2:21-23) Bongata bo boholo bo tla pholoha Armagedone bo ena le tshepo ya ho phela ka ho sa feleng. (Joh. 11:26) “Batho ba lokileng” le “ba sa lokang” ba ileng ba hlokahala ba tla tsoswa. (Dik. 24:15; Joh. 5:28, 29) Qetellong, bahlanka bohle ba Jehova ba mamelang ba lefatsheng ba ‘tla fumana tokoloho jwalo ka bana ba Modimo.’ (Bar. 8:21) Re tatetse nako eo ka yona re tla beng re le bana ba phethahetseng ba Ntate wa rona Jehova.
19. Boemo ba rona bo ntlafetse jwang ka lebaka la seo Jehova le Jesu ba re etseditseng sona? (Sheba lebokose le reng “ Seo Tshwarelo ya Jehova e se Bolelang ho Rona.”)
19 Boemo ba rona bo ne bo tshwana hantle le ba mohlankana eo ho builweng ka yena qalong, ya ileng a lahlehelwa ke dintho tsohle mme a sala le sekoloto seo a neng a ke ke a kgona ho se patala. Re leboha Jehova ka hore ebe o re thusitse. Boemo ba rona bo fetohile hobane Jehova o ile a etsa tokisetso ya hore re tshwarelwe dibe le hore Jesu a fane ka bophelo ba hae e le tefo ya topollo. Re lopollotswe sebeng le lefung hobane re ena le tumelo ho Jesu Kreste. Ha Jehova a re tshwarela, ho ba jwalo ka ha eka ha re a etsa dibe. Le ha ho le jwalo, ntho ya bohlokwa le ho feta ke hore re ka ba metswalle ya Ntate wa rona ya lehodimong Jehova.
20. Re tlo ithutang sehloohong se latelang?
20 Re ananela Jehova le Jesu haholo ha re nahanisisa ka seo ba re etseditseng sona. (2 Bakor. 5:15) Re na le tshepo ka lebaka la seo ba re etseditseng sona. Sehloohong se latelang re tlo ithuta ka mehlala e hlahang ka Bibeleng, e tlo re thusa ho bona hore ha Jehova a re tshwaretse, ha re a lokela ho ikutlwa re ntse re le molato.
PINA YA 10 Rorisang Jehova, Modimo wa Rona!
