NA O kile wa utlwa eka o tlameha ho itjarela mathata a hao o le mong? Re phela nakong eo ‘bophelo bo leng thata’ mme ka lebaka leo re ka ikutlwa re nyahame ebile eka ha ho na motho eo re ka llelang ho yena. (2 Tim. 3:1) Le ha ho le jwalo, nakong eo re nang le mathata hona le batho bao re ka llelang ho bona. Bibele e bontsha ka moo ho leng bohlokwa ka teng ho ba le motswalle wa nnete “dinakong tsa mahlomola.”—Diprov. 17:17.

Moapostola Pauluse o ile a rua molemo ho metswalle ya hae e ileng ya mo thusa ka ditsela tse ngata ha a ntse a le tshebeletsong ya hae. (Bakol. 4:​7-11) Ha Pauluse a ne kwalletswe teronkong e Roma, metswalle ya hae e ile ya mo thusa ka mesebetsi eo a neng a sa kgone ho iketsetsa yona. Ka mohlala, Epafroditase o ile a isetsa Pauluse dintho tseo a neng a di hloka tse tswang ho Bakrestemmoho le yena ba phutheho ya Filipi. (Bafil. 4:18) Tikikase yena, o ile a isa mangolo a tswang ho Pauluse diphuthehong tse fapaneng. (Bakol. 4:7) Ka lebaka la thuso ya metswalle ya hae, Pauluse o ile a kgona ho kgothatsa diphutheho le ha a ne a fuwe taelo ya hore a se ke a tswa ka tlung kapa a kwalletswe teronkong. Wena o ka ba motswalle wa nnete jwang mehleng ee?

Ho na le mehlala ya kajeno e re bontshang hore na re ka ba metswalle ya nnete jwang. Nahana ka mohlala wa moradi wa bo rona e mong, ya ileng a bontsha hore ke motswalle wa nnete ho Moradi wa bo rona Elisabet eo e leng pulamadiboho ya ka mehla e Spain. Moradi eo wa bo rona, o ile a romella Elisabet melaetsa e kgothatsang e tswang ditemaneng tsa Bibele nakong eo mme wa Elisabet a neng a kulela lefu a tshwerwe ke kankere. Elisabet o re, “Ha ke bona melaetsa eo ke ile ka ikutlwa ke tsotellwa ebile ke se mong.”—Diprov. 18:24.

Re ka matlafatsa setswalle sa rona le Bakrestemmoho ka hore re batle ditsela tsa ho ba tshehetsa ka mesebetsi e amanang le phutheho. Ka mohlala, o ka ithaopela ho felehetsa ba hodileng ka koloi ya hao, mohlomong ho ya le bona dibokeng kapa tshimong. Haeba o ba thusa ka ditsela tseo, o tla be o ba kgothatsa mme le bona ba tla o kgothatsa. (Bar. 1:12) Le ha ho le jwalo, ho na le bana ba bo rona ba bang bao maemo a ba qobellang ho dula ba le ka tlung. O ka ba motswalle wa nnete jwang ho bona?

Ho na le Bakrestemmoho le rona ba bang bao ka lebaka la ho kula kapa maemo a mang ba sa kgoneng ho ya dibokeng ka seqo. Nahana ka mohlala wa Morabo rona David ya ileng a tshwarwa ke kankere. Dingaka di ile tsa mo thusa ka dikgwedi tse tsheletseng ka mokgwa wa phekolo o bitswang chemotherapy. Nakong eo ya phekolo, Morabo rona David le mosadi wa hae Lidia ba ne ba kena diboka ka marangrang.

 Ba ile ba fumana tshehetso efe ho tswa ho metswalle ya bona ka phuthehong? Ka mora seboka se seng le se seng, bara le baradi ba bo rona ba neng ba ile dibokeng ka seqo, ba ne ba etsa boiteko ba ho bua le Morabo rona David le Lidia ka marangrang. Ho ekelletsa moo, ha Morabo rona David le mosadi wa hae ba ne ba arabile dibokeng, ha morao ba ne ba fumana melaetsa e kgothatsang ho tswa ho bara le baradi ba bo rona. Morabo rona David le mosadi wa hae Lidia ba ile ba ikutlwa jwang ka tshehetso eo? Ba ile ba ikutlwa ba sa lahlwa.

Na le rona re ka leka ho sebetsa le ba sa kgoneng ho tswa ka tlung mosebetsing wa boboledi? Re ka etsa diphetoho tse itseng tse nyenyane bakeng sa ho sebetsa le bona, e leng se tla etsa hore ba ikutlwe ba sa lahlwa. (Diprov. 3:27) Mohlomong re ka ipha nako le bona ya ho etsa mosebetsi wa boboledi ka ho ngola mangolo kapa ka ho paka ka fono. Bakrestemmoho le rona ba sa kgoneng ho tswa ka tlung ba ka kgona ho kena sebokeng sa tshimo ba sebedisa marangrang. Morabo rona David le mosadi wa hae Lidia ba ile ba ananela tokisetso ena haholo. Ha Morabo rona David a hlalosa o re: “Ho ba le bara le baradi ba bo rona ba sehlopha sa rona sa tshimo sebokeng se sekgutshwane sa tshimo le ha ho etswa thapelo, ho ne ho re kgothatsa haholo.” Hape, ha maemo a dumela ebile ho bolokehile ho etsa jwalo, nako le nako o ka kopa motho eo o ithutang Bibele le yena hore o yo mo kgannela thuto ya Bible ha mohweletsi ya sa kgoneng ho tswa ka tlung.

Ha re sebetsa ha mmoho le bara le baradi ba bo rona ba sa kgoneng ho tswa ka tlung, re tla bona makgabane a bona mme seo se tla etsa hore re be metswalle ya bona e haufi. Ka mohlala, ha o sebetsa le bahweletsi ba jwalo tshimong mme o bona bokgoni boo ba nang le bona ba ho sebedisa Lentswe la Modimo ho finyella pelo ya motho, seo se tla etsa hore o atamelane haufi le bona le ho feta. Ha re tshehetsa Bakrestemmoho le rona ka hore re ba thuse ho ya dibokeng le tshimong, seo se tla etsa hore re eketse metswalle ya rona.—2 Bakor. 6:13.

Pauluse o ile a ikutlwa a kgothetse ha motswalle wa hae Tite a ne a ilo mo bona. (2 Bakor. 7:​5-7) Tlaleho ena e re hopotsa hore ha ho a lekana ho tshedisa batho ka mantswe feela empa re boetse re lokela ho ba le bona le ho etsa sohle seo re ka se kgonang ho ba tshehetsa.—1 Joh. 3:18.

Bara le baradi ba bo rona ba Russia ba behile mohlala o motle wa ho tshehetsana. Nahana ka se ileng sa etsahalla Morabo rona Sergey le mosadi wa hae Tatyana. Ka mora hore mapolesa a phenyekolle ntlo ya bona, ba ile ba nkwa ba ilo hlonngwa dipotso mapoleseng. Moradi wa bo rona Tatyana ke yena ya ileng a lokollwa pele mme a kgutlela hae. Morabo rona Sergey o re: “Hang ha Tatyana a fihla lapeng, moradi wa bo rona e mong ya sebete o ile a kokota monyako. Metswalle ya rona e meng e ile ya fihla mme ya re thusa ho hlwekisa le ho beha dintho hantle ka tlung.”

Morabo rona Sergey o eketsa ka ho re: “Haesale ke rata lengolo la Diproverbia 17:17 le reng: ‘Motswalle wa nnete o lerato ka dinako tsohle mme ke ngwaneno eo o ka mo tshepang dinakong tsa mahlomola.’ Mantswe ana ebile a sebele ho nna nakong ena ya ha ke hloriswa mme ke sa kgone ho iketsetsa dintho tse ding. Jehova o mphile metswalle e sebete hore e ntshehetse.”

Ha re ntse re feta maemong a boima tjena, re hloka metswalle ya nnete e ka re tshehetsang. Re tlo e hloka le ho feta nakong ya mahlomola a maholo. Ka hoo, a re etseng sohle se matleng a rona ho ba metswalle ya nnete hona jwale.—1 Pet. 4:​7, 8.