Ha e le Hantle o Batla ho ba Motswalle wa Mang?
“Modimo hase ya sa lokang hoo a ka lebalang mosebetsi wa lona le lerato leo le ileng la le bontsha bakeng sa lebitso la hae.”—BAHEB. 6:10.
1. Ke takatso efe eo kaofela ha rona re nang le yona ka tlhaho, hona e akarelletsang?
O IKUTLWA jwang ha motho eo o mo tsebang le eo o mo hlomphang a lebala lebitso la hao kapa a sa o hopole le ho o hopola? Ntho eo e ka o nyahamisa haholo. Hobaneng? Hobane ka tlhaho re na le takatso ya ho batla ho tsejwa. Empa re boetse hape re batla hore batho ba tsebe hore na re batho ba mofuta ofe mme ba ananele seo re se finyelletseng.—Num. 11:16; Jobo 31:6.
2, 3. Keng se ka etsahalang ka takatso ya rona ya ho batla ho tsejwa? (Sheba setshwantsho se qalong.)
2 Le ha ho le jwalo, takatso ya rona ya ho batla ho tsejwa e ka ba e feteletseng hobane ha re a phethahala. E ka ba ya etsa hore re batle ho roriswa. Lefatshe le laolwang ke Satane le hlohlelletsa bophahamo le botumo, e leng dintho tseo re lokelang ho di fa Jehova feela.—Tšen. 4:11.
3 Baetapele ba bang ba bodumedi ba mehleng ya Jesu ba ne ba rata maemo. Jesu o ile a hlokomedisa balatedi ba hae a re: “Hlokomelang bangodi ba lakatsang ho tsamaya ba apere diaparo tse telele tsa ka hodimo mme ba rata ditumediso dimmarakeng le ditulo tse ka pele ka disynagogeng le dibaka tse hlaheletseng ka ho fetisisa dijong tsa shwalane.” Ha a tswela pele o ile a re: “Ba tla amohela kahlolo e boima haholo.” (Luka 20:46, 47) Ho fapana le hoo, Jesu o ile a babatsa mohlolohadi ya futsanehileng, eo e ka nnang yaba monehelo wa hae o monyenyane o ne o sa bonwa ke batho. (Luka 21:1-4) Ho hlakile hore pono ya Jesu mabapi le ho hlahella e ne e fapane hole le ya batho ba bang. Sehloohong sena re tlo ithuta hore na ke batho ba mofuta ofe bao Jehova a ba nkang e le metswalle ya hae.
HO TSWEJWA KE MOTHO WA BOHLOKWA KA HO FETISISA
4. Ke motho ofe wa bohlokwa eo re batlang hore a re tsebe, hona hobaneng?
4 Ha e le hantle ke motho ofe wa bohlokwa eo re batlang hore a re tsebe? Na ke batho ba tummeng ho tsa thuto, borakgwebo ba atlehileng kapa diseleborithi? Pauluse o ile a araba dipotso tsena ka mantswe a reng: “Ka ha jwale le tseba Modimo, kapa ho e na le hoo ka ha jwale le tsejwa ke Modimo, ho tla jwang hore le kgutlele hape dinthong tse fokolang le tse futsanehileng tsa motheo mme le batle ho ba makgoba a tsona hape?” (Bagal. 4:9) Ruri ke tlotla e kgolo ho “tsejwa ke Modimo” ya Matla Ohle, Mmusi wa lehodimo le lefatshe. O labalabela ho ba motswalle wa rona wa hlooho ya kgomo. Ha serutehi se seng se hlalosa se bolelwang ke ho tsejwa ke Modimo, se ile sa re: “O re nkela hloohong.” Ho a hlaka hore Jehova o re bopetse hore re be metswalle ya hae.—Moek. 12:13, 14.
5. Re lokela ho etsang e le hore re be metswalle ya Modimo?
5 Moshe e ne e le motswalle wa Modimo. Ha a ne a kopa Jehova hore a mo ‘tsebise ditsela tsa hae,’ Jehova o ile a mo araba mme a re: “Le ntho ena, eo o buileng ka yona, ke tla e etsa, hobane o fumane kamohelo mahlong a ka mme ke o tseba ka lebitso.” (Ex. 33:12-17) Re ka fumana melemo e mengata ha Jehova a re tseba ka lebitso. Empa re lokela ho etsang e le hore re nne re be metswalle ya Modimo? Re lokela ho mo rata le ho inehela ho yena.—Bala 1 Bakorinthe 8:3.
6, 7. Keng e ka senyang setswalle sa rona le Jehova?
6 Le ha ho le jwalo, re lokela ho etsa bonnete ba hore setswalle sa rona le Modimo e ba sa moshwelella. Jwalo ka ha Pauluse a ile a ngolla Bakreste ba Bagalata, le rona ka ho tshwanang re lokela ho tlohella ‘dintho tse fokolang le tse futsanehileng tsa motheo’ tsa lefatshe lena, tse akarelletsang le botumo. (Bagal. 4:9) Bakreste bana ba ne ba hatetse pele hoo jwale ba neng ba se ba tsejwa ke Modimo. Ho ntse ho le jwalo, Pauluse o bua ka bona tjena ba se ba ‘kgutletse hape’ dinthong tsena tse se nang thuso. Ha e le hantle, Pauluse o ne a re: “Ka mora hore le sebetse ka thata ho tlohela dintho tsee tse se nang thuso, ke hobaneng ha jwale le se le kgutletse ho tsona hape?”
7 Na le rona re ka iphumana re se re le boemong bo tshwanang? Hantle haholo. Ha re qala ho ithuta ka Jehova, mohlomong le rona jwalo ka Pauluse re ile ra tela dintho tse neng di ka etsa hore batho ba re tlotlise. (Bala Bafilipi 3:7, 8.) Eka nna yaba re ile ra tela ho ya yunivesithi, kapa ra hana mesebetsi e hlamatsehang kapa esita le ho tlohela menyetla ya ho rua. Bokgoni ba rona dipapading le ditalenta tsa rona tsa mmino, di ne di ka nna tsa etsa hore re tume re be re rue, empa le ha ho le jwalo, re ile ra di lahla tsohle. (Baheb. 11:24-27) E ne e ka ba bowatla bo bokakaang haeba re ne re ka nka hore re fetuwe ke menyetla. Ho nahana jwalo ho ne ho ka etsa hore re kgutlele morao dinthong tseo re neng re se re di nka e le “tse fokolang le tse futsanehileng” tsa lefatshe lena. *
IKEMISETSE HO BA MOTSWALLE WA MODIMO
8. Keng e ka tiisang setswalle sa rona le Modimo?
8 Keng e ka tiisang setswalle sa rona le Modimo? Re lokela ho hopola dintho tse pedi tsa bohlokwa tse ka tiisang setswalle sa rona le Modimo. Ntlha ya pele, kamehla Jehova o putsa batho ba mo sebeletsang ka botshepehi. (Bala Baheberu 6:10; 11:6) O rata e mong le e mong ya mo sebeletsang mme o nka hore e tla be e le ntho e sa lokang hore a iphapanyetse bona. Kamehla “Jehova o tseba ba hae.” (2 Tim. 2:19) “O tseba ditsela tsa ba lokileng” mme o kgona le ho ba ntsha molekong.—Pes. 1:6; 2 Pet. 2:9.
9. Fana ka mehlala e bontshang ka moo Jehova a tsotellang bahlanka ba hae kateng.
9 Ka dinako tse ding, Jehova o tsotella bahlanka ba hae ka ditsela tse ikgethang. (2 Likron. 20:20, 29) Ka mohlala, ha Baiseraele ba lelekiswa ke lebotho le matla la Faro, Jehova o ile a ba pholosa Lewatleng le Lefubedu. (Ex. 14:21-30; Pes. 106:9-11) Ketsahalo ena e ile ya ama dipelo tsa ba bangata hoo esita le ka mora dilemo tse 40, batho ba neng ba ntse ba bua ka yona. (Josh. 2:9-11) Diketsahala tse kang tsena di re kgothatsa haholo, etswe haufinyane feela re tlo hlaselwa ke Gogo wa Magogo, jwalo ka ha ho ile ha bolelwa esale pele. (Ezek. 38:8-12) Ka nako eo, re tla bona melemo ya hore ebe re ile ra kgetha ho ba metswalle ya Jehova, ho e na le ho etsa setswalle le batho ba sa mo rateng.
10. Ke ntho efe hape eo re lokelang ho e hopola ka ho ba motswalle wa Modimo?
10 Ntlha ya bobedi eo re lokelang ho e hopola ka ho ba motswalle wa Modimo, ke hore a ka re ela hloko ka tsela eo re sa e lebellang. Batho ba etsang dintho tse ntle hobane feela ba batla ho bonwa ke batho, hohang ba ke ke ba fumana letho ho tswa ho Jehova. Hobaneng? Hobane ba ile ba fumana moputso wa bona mohla ba neng ba etsa mponeng. (Bala Matheu 6:1-5.) Le ha ho le jwalo, Jesu o re Ntate wa hae ya “tadimang sephiring,” o ela hloko batho ba etsang dintho tse ntle eseng ka sepheo sa mponeng. O ela hloko seo ba se etsang mme ka lebaka leo o a ba putsa. Ka dinako tse ding o re putsa le ka ditsela tseo re sa di lebellang. A re ke re tshohleng mehlala ena e latelang.
MARIA O ILE A TLOTLISWA KA TSELA EO A NENG A SA E LEBELLA
11. Jehova o ile a tlotlisa Maria ka tsela efe e kgethehileng?
11 Jehova o ile a kgetha Maria hore ebe Mme wa Jesu hobane e ne e le morwetsana ya ikokobeditseng. Maria o ne a tswa motsaneng wa Nazaretha o neng o le hole le Jerusalema, e leng moo tempele e neng e le hona teng. (Bala Luka 1:26-33.) Empa ke hobaneng ha Jehova a ile a kgetha Maria bakeng sa tlotla e kgethehile hakaale? Lengeloi Gabriele le ile la tla ho yena mme la mo bolella hore “o fumane kamohelo ho Modimo.” Re a hlokomela hore Maria e ne e hlile e le motswalle wa Modimo, ho ya ka seo a se buileng le Elizabetha hamorao. (Luka 1:46-55) Ho a bonahala hore haesale Jehova a ntse a bona tumelo ya Maria, ke ka hoo a ileng a mo tlotla ka tsela eo a neng a sa e lebella tjena.
12, 13. Jehova o ile a etsang e sa tlwaelehang ha Jesu a hlaha? Keng hape e ikgethang e ileng ya etsahala ka Jesu matsatsing a 40 hamorao?
12 Ha Jesu a hlaha, Jehova o ile a etsa ntho e makatsang. Ha a a ka a senola taba ya tswalo ya Jesu ho balaodi ba Jerusalema le ba Bethlehema, e leng batho ba neng ba nkuwa e le ba bohlokwa. Ho e na le hoo, o ile a romela mangeloi a hae ho badisana feela tjee, ba neng ba disitse dinku ka ntle ho Bethlehema. (Luka 2:8-14) Yaba badisana ba ya moo Jesu a hlahetseng teng ho ya mo bona. (Luka 2:15-17) E tlameha ebe Josefa le Maria ba ile ba hlollwa hakakaang ha ba lemoha tsela eo Jehova a sebetsang ditaba ka yona. Tsela eo Jehova a etsang dintho ka yona e fapane hole le eo Satane a etsang dintho ka yona. Ha Satane a ne a romela dinohe tsa dinaledi hore di ilo bona Jesu le batswadi ba hae, batho bohle ba Jerusalema ba ile ba ferekana ha ba utlwa hore Jesu o se a hlahile. (Mat. 2:3) Ka lebaka leo, qetellong ho ile ha bolawa bana ba bangata ba se nang molato.—Mat. 2:16.
13 Ka mora matsatsi a 40 Jesu a hlahile, Maria o ne a lokela ho ilo etsa sehlabelo tempeleng Jerusalema, dikhilomitara tse 9 ho tloha Bethlehema. (Luka 2:22-24) Ha ba ntse ba le tseleng, mohlomong Maria o ne a ipotsa dipotso di hana ho feela ka hore na ebe moprista o tla bua ho itseng ka bokamoso ba Jesu na. Ehlile ho ile ha hlaha ntho e ikgethang ka bokamoso ba Jesu le hoja e bile ka tsela eo Maria a neng a sa e lebella. Jehova o ile a sebedisa Simeone monna ya neng a lokile a bile a inehetse ho yena. A ba a sebedisa le moprofeta wa mohlolohadi Anna ya dilemo di 84, hore e be bona ba buang hore Jesu e ne e tla ba Mesia kapa Kreste.—Luka 2:25-38.
14. Jehova o ile a hlohonolofatsa Maria jwang?
14 Ho thweng ka Maria? Na le yena ho na le seo Jehova a ileng a mo etsetsa sona ka lebaka la ho hodisa Jesu ka botshepehi? Ee ho jwalo. Ke ka lebaka leo re balang ka tlaleho ya hae hona jwale. Ho banahala e ka Maria ha a a ka a kgona ho tsamaya le Jesu nakong ya tshebeletso ya hae lefatsheng. Mohlomong ka ha e ne e le mohlolohadi mme ho hlokahala hore a nne a hlokomele lelapa, o ne a lokela ho dula Nazaretha. Le hoja Maria a ile a fetwa ke menyetla e mengata ya ho bona ha Jesu a etsa mehlolo, o ne a le teng ha Jesu a bolawa. (Joh. 19:26) Hamorao Maria o ne a na le barutuwa ba Jesu Jerusalema, pelenyana ba fumana moya o halalelang ka Pentekonta. (Lik. 1:13, 14) Ho ka etsahala hore ebe o ile a tlotswa ka moya o halalelang hammoho le ba bang ba neng ba le teng moo. Haeba ho jwalo, sena se bolela hore o fumane monyetla wa ho phela ka ho sa feleng lehodimong le Jesu. Ruri Jehova o ile a mo putsa haholo bakeng sa botshepehi ba hae.
JEHOVA O TLOTLISA MORA WA HAE
15. Jehova o ile a bontsha jwang hore o amohela Jesu ha a ne a le lefatsheng?
15 Jesu o ne a sa batle tlhompho e tswang ho baetapele ba bodumedi le ba dipolotiki ba mehleng ya hae. Empa e tlameha ebe o ile a thaba haholo ha Jehova a bontsha hore o a mo amohela ka ho bua le yena ka ho toba ka makgetlo a mararo. Ka mora hore Jesu a kolobetswe Nokeng ya Jordane, Jehova o ile a re: “Enwa ke Mora wa ka, ya ratwang, eo ke mo amohetseng.” (Mat. 3:17) Ho bonahala eka Johanne Mokolobetsi ke yena feela ya ileng a utlwa mantswe ao. Nako e ka etsang selemo pele Jesu a hlokahala, baapostola ba hae ba bararo ba ile ba utlwa ha Jehova a re ka yena: “Enwa ke Mora wa ka, ya ratwang, eo ke mo amohetseng; mo mameleng.” (Mat. 17:5) Qetellong Jehova o ile a boela a bua le mora wa hae matsatsi a mmalwa pele a hlokahala.—Joh. 12:28.
O ithutileng tseleng eo Jehova a ileng a bontsha ka yona hore ke motswalle wa Jesu? (Sheba serapa sa 15-17)
16, 17. Keng hape eo Jehova a ileng a e etsetsa Jesu e neng e sa tlwaeleha?
16 Le hoja Jesu a ne a tseba hore o tlo shwa lefu le hlabisang dihlong a be a qoswe ka bohata ka hore ke monyefodi, o ile a rapela hore e se e ka ho ka etsahala thato ya Modimo e seng ya hae. (Mat. 26:39, 42) “O ile a mamella thupa ya tlhokofatso, a sa natse dihlong” hobane o ne a batla ho ba motswalle wa Jehova.—Baheb. 12:2.
17 Ha Jesu a le lefatsheng, o ile a kopa hore Jehova a mo tlotlise feela jwalo ka ha a ile a mo tlotlisa ha a ntse a le lehodimong. (Joh. 17:5) Empa seo ha se bolele hore, Jesu o ne a shebile maemo. Ka mantswe a mang e ne e se hore o lebelletse ho phahamiswa ka tsela e itseng. Jwale Jehova o ile a etsang he? O ile a etsa ntho e sa tlwaelehang ka ho tsosetsa Jesu “boemong bo phahameng” lehodimong. Mme seo se ne se bolela hore le ka mohla Jesu o ne a ke ke a hlola a shwa, e leng mpho eo Jehova a neng a so ka a e fa motho le ha e le ofe. * (Bafil. 2:9; 1 Tim. 6:16) Ka sebele Jehova o ile a putsa Jesu ka tsela e ikgethang!
18. Keng e ka re thusang hore re se ke ra batla ho amohelwa ke batho ba sa rateng Modimo?
18 Keng e ka re thusang hore re se ke ra batla ho amohelwa ke batho ba sa rateng Modimo? Dula o hopola hore kamehla Jehova o ela hloko le ho putsa bahlanka ba hae ba tshepahalang, ebile hangata o ba putsa le ka ditsela tseo ba sa di lebellang. Ho tseba mang hore wena Jehova o o tshwaretse dife kamoso? Empa hona jwale ha re ntse re mamelletse mathata a bophelo, a re duleng re hopola hore bofelo ba lefatshe lena bo haufi. Ka lebaka leo, dintho tsohle tseo batho ba di hlanyetsang lefatsheng lena di tlo fela. (1 Joh. 2:17) Modimo wa rona ya lerato Jehova, ‘hase ya sa lokang hoo a ka lebalang mosebetsi wa rona le lerato leo re ileng ra le bontsha bakeng sa lebitso la hae.’ (Baheb. 6:10) Ka sebele Jehova e tla ba motswalle wa rona wa hlooho ya kgomo a be a re putse ka ditsela tseo re sa di lebellang.
