1. Re lokela ho ikutlwa jwang ka mpho eo Jehova a re fileng yona ya hore re mo rapele?

 MOETSI wa lehodimo le lefatshe o re file mpho ya bohlokwa ya hore re mo rapele. A ko nahane feela hore re ka kgona ho bolella Jehova ka moo re ikutlwang ka teng ka puo e nngwe le e nngwe le ka nako eo re batlang ho bua le yena ka yona. Re kgodisehile hore Ntate wa rona ya lerato o tla re utlwa, ebang re bua le yena re le betheng ya sepetlele kapa re le teronkong. Re leboha haholo ka mpho ena.

2. Morena Davida o ile a bontsha jwang hore o nka mpho ya thapelo e le ya bohlokwa?

² Morena Davida o ne a nka mpho ya ho rapela e le ya bohlokwa. O ile a binela Jehova a re: “E se eka thapelo ya ka e ka lokiswa jwalo ka dibano ka pela hao.” (Pes. 141:1, 2) Mehleng ya Davida dibano tse halalelang tseo baprista ba neng ba di sebedisetsa borapedi ba nnete, di ne di lokiswa hantle. (Ex. 30:34, 35) Ka hoo, Davida o ne a batla ho nahana ka seo a neng a tla se bua ha a rapela Ntate wa hae ya lehodimong feela jwalo ka ha dibano le tsona di ne di lokiswa hantle. Le rona re batla ho etsa sona seo e le hore Jehova a thabiswe ke dithapelo tsa rona.

3. Re lokela ho etsang ha re rapela Jehova, hona hobaneng?

³ Ha re rapela Jehova re lokela ho bontsha hore re mo hlompha haholo. Nahana ka dipono tse hlollang tseo Esaia, Ezekiele, Daniele le Johanne ba ileng ba di bona. Le hoja ba sa  bona dipono tse tshwanang empa ho na le ntho eo di tshwanang ka yona. Kaofela di hlalosa Jehova e le Morena ya phahameng ka ho fetisisa. Esaia o ile a “bona Jehova, a dutse teroneng e hodimo le e phahameng.” (Esa. 6:1-3) Ezekiele o ile a bona Jehova a dutse koloing ya hae ya lehodimo e potapotilweng ke ho “benya . . . [ho] jwalo ka seqha.” (Ezek. 1:26-28) Daniele o ile a bona “Moholoholo wa Matsatsi” a apere diaparo tse tshweu mme a ena le malakabe a mollo a tswang teroneng ya hae. (Dan. 7:9, 10) Johanne yena o ile a bona Jehova a dutse teroneng e potapotilweng ke mookodi o motle o jwalo ka emeralde. (Tšen. 4:2-4) Ha re nahana ka moo Jehova a phahameng ka teng, re ananela tlotla eo a re fileng yona ya hore re mo rapele le hore re etse jwalo ka tlhompho. Empa ke dintho dife tseo re lokelang ho di rapella?

4. Re ithutang mantsweng a qalang a thapelo ya mohlala a hlahang ho Matheu 6:9, 10?

⁴ Bala Matheu 6:9, 10. Thutong ya Thabeng, Jesu o ile a ruta barutuwa ba hae hore na ke jwang ba ka rapelang ka tsela e thabisang Modimo. Ka mora hore Jesu a re “jwale, le rapele ka tsela ena,” o ile a qala pele ka ho bua ka dintho tsa bohlokwa tse amanang le morero wa Jehova. O ile a bua ka ho halaletswa ha lebitso la Jehova, ho tla ha Mmuso wa Modimo o tla fedisa bahanyetsi ba Hae le ka dintho tse molemo tseo a tla di etsetsa batho lefatsheng nakong e tlang. Ha re akaretsa dintho tsena dithapelong tsa rona, re a bontsha hore thato ya Modimo ke ya bohlokwa ho rona.

5. Na re lokela ho rapella dintho tsa botho?

⁵ Karolong e latelang ya thapelo eo, Jesu o ile a bontsha hore ho loketse hore re ka rapella dintho tsa botho. Re ka kopa Jehova hore a re fe dijo tsa letsatsi, a re tshwarele dibe tsa rona, a re thuse ho hlola diteko a be a re sireletse ho ya kgopo. (Mat. 6:11-13) Ha re kopa hore Jehova a re fe dintho tsena, re a bontsha hore re hloka thuso ya hae ebile re batla ho mo thabisa.

6. Na re lokela ho rapella dintho tse thapelong ya mohlala feela? Hlalosa.

⁶ Jesu o ne a sa lebella hore balatedi ba hae ba bue mantswe a hlahang thapelong ya  mohlala jwalo ka ha a le jwalo. Dithapelo tse ding tseo Jesu a ileng a di etsa o ile a bua dintho tse fapaneng le tse thapelong ya mohlala, e leng dintho tsa bohlokwa tseo a neng a di hloka ka nako eo. (Mat. 26:39, 42; Joh. 17:1-26) Le rona re ka rapella dintho tse re tshwenyang. Nakong eo re lokelang ho etsa qeto, re ka rapella bohlale le kutlwisiso. (Pes. 119:33, 34) Ha re lokela ho etsa mosebetsi o itseng o thata, re ka rapela mme ra kopa Jehova hore a re thuse ho utlwisisa hore na re o etse jwang. (Liprov. 2:6) Batswadi ba ka rapella bana ba bona, le bana ba ka rapella batswadi ba bona mme kaofela ha rona re lokela ho rapella batho bao re ithutang Bibele le bona, le bao re ba bolellang molaetsa wa yona. Ha re a lokela ho rapela Jehova feela ha re kopa thuso.

7. Ke hobaneng ha re lokela ho rorisa Jehova ha re rapela?

⁷ Re lokela ho hopola ho rorisa Jehova ha re rapela. Ha ho na motho ya tshwanelwang ke ho roriswa ho feta Modimo wa rona. O “molemo mme o itokiseditse ho tshwarela.” O boetse o mohau le mosa, o dieha ho halefa, o tletse mosa o lerato le nnete. (Pes. 86:5, 15) Ho loketse hore re rorise Jehova ka lebaka la makgabane a hae le ka dintho tseo a di etsang.

8. Ke dintho dife tseo re ka lebohang Jehova ka tsona? (Pesaleme ya 104:12-15, 24)

⁸ Re lokela ho rorisa Jehova dithapelong tsa rona hape re lokela ho mo leboha ka dintho tseo a re fang tsona. Ka mohlala, re ka mo leboha ka mebala e metle ya dipalesa tseo a di entseng, dijo tse ngata tse monate tseo re nang le tsona le ka metswalle eo re nang le yona. Ntate wa rona ya lerato o re fa dintho tsena le tse ding tse ngata e le ho re thabisa. (Bala Pesaleme ya 104:12-15, 24.) Ha bohlokwa le ho feta, re leboha Jehova ka dikeletso tseo a re fang tsona e le hore re dule re ena le tumelo e matla le ka tshepo e babatsehang eo re nang le yona ka bokamoso.

9. Keng e ka re thusang hore re hopole ho leboha Jehova? (1 Bathesalonika 5:17, 18)

⁹ Ho ka ba bonolo hore re lebale ho leboha Jehova ka dintho tsohle tseo a re etsetsang tsona. Keng e ka o thusang hore o hopole ho  mo leboha? O ka ngola fatshe dintho tseo o di rapelletseng mme ka mora moo o shebe hore na Jehova o di arabetse jwang ebe o rapela Jehova mme o mo lebohe ka hore o o thusitse. (Bala 1 Bathesalonika 5:17, 18.) Nahana ka sena: Re a thaba ebile re ikutlwa re ratwa ha batho ba bang ba re leboha. Le rona haeba re hopola ho leboha Jehova ha a arabetse dithapelo tsa rona, seo se a mo thabisa. (Bakol. 3:15) Keng hape ya bohlokwa eo re lokelang ho leboha Modimo wa rona ka yona?

10. Ho ya ka 1 Petrose 2:21, ke hobaneng ha re ena le lebaka la ho leboha Jehova ka hore ebe o ile a romela Jesu lefatsheng?

¹⁰ Bala 1 Petrose 2:21. Re lokela ho leboha Jehova ka hore ebe o ile a romela Mora wa hae ya ratwang hore a tlo re ruta. Ha re ithuta ka Jesu, re ithuta dintho tse ngata ka Jehova le hore na re ka mo thabisa jwang. Ha re bontsha tumelo sehlabelong sa Kreste, re tla ba metswalle ya Jehova Modimo ebile re tla ba le kgotso le yena.​—Bar. 5:1.

11. Ke hobaneng ha re rapela ka lebitso la Jesu?

¹¹ Re leboha Jehova hore ebe re kgona ho mo rapela ka Mora wa hae. Jehova o sebedisa Jesu ho re fa dintho tseo re mo kopileng tsona. Jehova o mamela le ho arabela dithapelo tsa rona haeba re sebedisa lebitso la Jesu. Jesu o ile a re: “Eng kapa eng eo le e kopang ka lebitso la ka, ke tla e etsa, e le hore Ntate a ka tlotliswa ka Mora.”​—Joh. 14:13, 14.

12. Ke hobaneng ha re boetse re lokela ho leboha Jehova ka Mora wa hae?

¹² Jehova o re tshwarela dibe tsa rona motheong wa sehlabelo sa Jesu sa thekollo. Mangolo a hlalosa Jesu e le ‘moprista ya phahameng ya dutseng ka letsohong le letona la terone ya Ya Boholo bo Hlomphehang mahodimong.’ (Baheb. 8:1) Jesu ke “mothusi [wa rona] ho Ntate.” (1 Joh. 2:1) Re leboha Jehova hore ebe o re file Moprista ya Phahameng ya utlwisisang hore re baetsadibe le ya re “kopelang ka tiyo.” (Bar. 8:34; Baheb. 4:15) Re baetsadibe, ka hoo ka ntle ho sehlabelo sa Jesu re ne re ke ke ra kgona ho bua le Jehova ka thapelo. Ha ho pelaelo hore re ke ke ra kgona ho leboha Jehova ka ho felletseng ka mpho ya bohlokwa eo a re fileng yona e leng Mora wa hae ya ratwang.

13. Bosiung ba pele Jesu a bolawa o ile a bontsha jwang hore o rata barutuwa ba hae?

¹³ Bosiu ba pele Jesu a bolawa o ile a rapella barutuwa ba hae ka nako e telele, a kopa Ntate wa hae hore a “ba lebele ka lebaka la ya kgopo.” (Joh. 17:15) Seo se ne se bontsha hore Jesu o ne a ba rata haholo. O ne a tseba hore haufinyane o tlo utlwa bohloko, ho ntse ho le jwalo o ne a tshwenyehile ka baapostola ba hae.

14. Re ka bontsha jwang hore re rata Bakrestemmoho le rona?

¹⁴ Re etsisa Jesu ka hore re se ke ra nahana feela ka dintho tseo re di hlokang. Ho ena le hoo, ka mehla re lokela ho rapella Bakrestemmoho le rona. Ha re etsa jwalo, re mamela taelo ya Jesu ya hore re ratane ebile re bontsha Jehova hore re rata Bakrestemmoho le rona haholo. (Joh. 13:​34) Ho rapella Bakrestemmoho le rona ho ka ba thusa. Lentswe la Modimo le re “thapedi ya motho ya lokileng, ha e sebetsa, e na le matla a maholo.”​—Jak. 5:16.

15. Ke hobaneng ha Bakrestemmoho le rona ba hloka hore re ba rapelle?

¹⁵ Bakrestemmoho le rona ba hloka hore re  ba rapelle hobane ba mamelletse mathata a mangata. Re ka kopa hore Jehova a ba thuse ho mamella ho kula, dikoduwa tsa tlhaho, dintwa, ho hloriswa le mathata a mang. Re boetse re lokela ho rapella bara le baradibabo rona ba sebetsang ka thata ho thusa ba hlokang. Mohlomong o tseba batho ba bang ba nang le mathata a tshwanang le ana. O ka ba bitsa ka mabitso ha o rapela. Ha re kopa Jehova hore a thuse Bakrestemmoho hore ba mamelle, re bontsha hore re ba rata haholo.

16. Ke hobaneng ha re lokela ho rapella ba re etellang pele?

¹⁶ Barababo rona ba etellang pele ka phuthehong ba a ananela ha batho ba bang ba ba rapella mme dithapelo tseo di a ba thusa. Moapostola Pauluse le yena o ne a tseba hore ho hlokahala hore ba bang ba mo rapelle. O ile a re: “[Le rapele] le bakeng sa ka, e le hore nka fuwa bokgoni ba ho bua ka ho ahlama ha molomo wa ka, ka ho bua ka bolokolohi ho tsebahatsa sephiri se halalelang sa ditaba tse molemo.” (Baef. 6:19) Le mehleng ena, re na le barababo rona ba bangata ba etellang pele ba sebetsang ka thata. Re bontsha hore re a ba rata haeba re kopa Jehova hore a ba tshehetse ka mosebetsi oo ba o etsang.

17, 18. Ke neng moo re ka koptjwang ho rapella batho ba bang, hona re lokela ho dula re hopolang?

¹⁷ Ka dinako tse ding re ka koptjwa ho rapella batho ba bang. Ka mohlala, ha moradiwabo rona a yo ithuta Bibele le motho e mong, a ka nna a kopa moradiwabo rona ya tsamayang le yena hore a rapele. E ka nna yaba moradiwabo rona ya menngweng ha a tsebe motho eo ya ithutang Bibele hantle, ka hoo a ka nna a bona ho le molemo hore a rapele ha thuto e fela. Ka tsela eo ho tla ba bonolo hore a tsebe hore na a ka reng ha a rapella motho eo ya ithutang Bibele.

¹⁸ Morabo rona a ka koptjwa hore a rapele sebokeng sa tshebeletso ya tshimo kapa dibokeng. Barababo rona ba koptjwang ho rapela ba lokela ho hopola morero wa diboka tseo. Ha re a lokela ho kgalemela le ho etsa ditsebiso nakong eo re rapelang. Ha morabo rona a rapela dibokeng ha a lokela ho bua “mantswe a mangata,” haholoholo ha di qala, ka  ha pina le thapelo di lokela ho etswa ka metsotso e mehlano.​—Mat. 6:7.

19. Keng e tla re thusa hore re itokisetse kahlolo ya letsatsi la Jehova?

¹⁹ Re lokela ho etsa hore ho rapela e be ntho ya bohlokwa haholo bophelong ba rona ka ha letsatsi la kahlolo ya Jehova le haufi haholo. Ha Jesu a bua ka taba ena o ile a re: “Jwale, le dule le fadimehile ka nako yohle le etsa thapedi e le hore le ka atleha ho phonyoha dintho tsena tsohle tse reretsweng hore di etsahale.” (Luka 21:36) Ho dula re rapela ho tla re thusa hore tumelo ya rona e be matla mme re tla be re itokisitse ha letsatsi la kahlolo ya Modimo le fihla.

20. Dithapelo tsa rona di ka tshwana le dibano tse nkgang ha monate jwang?

²⁰ Re se re buile kang? Re bone hore re lokela ho ananela mpho eo re e fuweng ya thapelo haholo. Dintho tsa bohlokwa tseo re lokelang ho di rapella ke tse amanang le morero wa Jehova. Re boetse re ananela Mora wa Modimo le Mmuso wa hae hape re rapella Bakrestemmoho le rona. Re boetse re rapella dintho tseo re di hlokang le ho kopa Jehova hore a re thuse ho ba le tumelo e matla. Ha re nahana ka hore na re tla reng ha re rapela, re bontsha hore re ananela mpho ena e babatsehang. Mantswe a rona a tla ba jwalo ka dibano tse nkgang ha monate ho Jehova ebile a tla mo “kgahlisa.”​—Liprov. 15:8.