Sehlabelo sa topollo seo Jesu a faneng ka sona ka madi a hae ke sona feela se ka etsang hore re tshwarelwe dibe. (Baef. 1:7) Bibele e re: “Modimo o . . . ne a bontsha hore o na le mamello ka ho tshwarela dibe tse entsweng nakong e fetileng,” e leng pele Jesu a lopolla batho sebeng le lefung. (Bar. 3:25) Jehova o ne a ka tshwarela dibe jwang pele Jesu a fana ka sehlabelo sa hae mme ka nako e tshwanang a bontsha hore o na le toka?

Jehova o ile a tshepisa hore ho ne ho tla ba le “ngwana” ya neng a tla pholosa batho ba bontshang tumelo ho yena le ditshepisong tsa hae. Ha Jehova a ne a etsa tshepiso eo, ho ne ho tshwana le ha eka ngwana eo o se a lopollotse batho. (Gen. 3:15; 22:18) Modimo o ne a kgodisehile hore Mora wa hae o ne a tla fana ka topollo ka nako eo Jehova a neng a e behile. (Bagal. 4:4; Baheb. 10:​7-10) Ha Jesu a ne a le lefatsheng, Modimo o ile a mo fa matla a hore a tshwarele dibe le pele a ka lopolla batho sebeng le lefung. Jesu o ne a ka kgona ho tshwarela dibe tsa batho ba neng ba ena le tumelo ho yena hobane o ne a tseba hore sehlabelo sa hae se ne se tla kwahela dibe tsa bona.—Mat. 9:​2-6.