Ho ne ho hlokahala dingolwa tse eketsehileng ha bara le baradibabo rona ba ntse ba tswela pele ho ruta batho Bibele. Ho ne ho etswa dimakasine Bethele e Brooklyn empa ho ne ho ntse ho hlokahala khamphani e hatisang, hore e ba thuse ka ho etsa dibuka tsa lekoko le thata. Ka nako e telele, khamphani eo e ne e se e sa kgone ho hatisa dibuka tse hlokehang tse sebediswang ho ruta batho Bibele. Ka hoo, Morabo rona Rutherford o ile a botsa Morabo rona Martin eo a neng a ikarabella ka mosebetsi o etswang ke feme eo hore na o bona eka ba ka kgona ho ikgatisetsa dibuka tsa bona.

Morabo rona Martin o ile a re eo ke qeto e thabisang hobane e ne e bolela hore ho ne ho tla ba le feme e neng e tla thusa hore re etse dibuka. Barababo rona ba ile ba hira sebaka atereseng ya 18 Concord Street e Brooklyn mme ba fumana dintho tseo ba tla di sebedisa.

Ha se batho bohle ba neng ba thabile ha ba utlwa hore barababo rona ba ne ba tla iketsetsa dibuka tsa bona. Mopresidente wa khamphani e neng e re etsetsa dibuka o ile a tla femeng ya rona e ntjha. O ile a re: “Le na le dintho tse sebetsang hantle tseo le ka etsang dibuka ka tsona empa ha le tsebe ho di sebedisa. Ka dikgwedi tse tsheletseng feela di tla be di senyehile dintho tseo.”

Morabo rona Martin o ile a re: “Seo mopresidente eo a se buileng se ne se utlwahala empa re ne re tseba hore Jehova o tla re thusa mme o ile a feela a etsa jwalo.” Morabo rona Martin o ne a nepile hobane hanghang ka mora moo ho ne ho etswa dibuka tse 2 000 ka letsatsi.

Ntle le ho iketsetsa dibuka tse ding tsa bona, bahlanka ba Jehova ba ile ba qala ho sebedisa mokgwa o motjha wa ho ruta batho Bibele ka seyalemoya. Ka la 26 February 1922 ka Sontaha mantsiboya, Morabo rona Rutherford o ile a bua ka lekgetlo la pele seyalemoyeng. O ile a fana  ka puo seyalemoyeng sa KOG se Los Angeles, California, Amerika e reng, “Ba Dimillione ba Phelang Hona Jwale ba ke ke ba Hlola ba Eshwa.”

Hoo e ka bang batho ba 25 000 ba ne ba mametse lenaneo leo. Batho ba bang ba neng ba mametse lenaneo leo, ba ile ba romella Morabo rona Rutherford mangolo ho mo leboha ka puo eo. Lengolo le leng le ne le tswa ho Willard Ashford ya dulang Santa Ana, California. O ile a leboha Morabo rona Rutherford ka puo eo e monate. O ile a re: “Ho na le batho ba bararo ba kulang lapeng la ka ba sa kgoneng ho tloha. Ka hoo, re ne re ke ke ra kgona ho mamela puo ya hao le haeba o ne o ka fana ka yona haufi le moo re leng teng.”

Dipuo tse ding di ile tsa fanwa seyalemoyeng dibekeng tse latelang. Ho ya qetellong ya 1922, Tora ya ho Lebela ya Senyesemane e ile ya re “batho ba ka bang 300 000 ba ile ba fumana molaetsa wa Bibele ka seyalemoya.”

Diithuti tsa Bibele di ile tsa etsa qeto ya ho haha seteishene sa seyalemoya Staten Island haufi le Bethele e Brooklyn ka lebaka la mangolo ao di a fumaneng. Dilemong tse latelang Diithuti tsa Bibele di ne di tla sebedisa seteishene sa seyalemoya se bitswang WBBR ho bolella batho ba bangata dibakeng tse ngata molaetsa wa Mmuso.

Tora ya ho Lebela ya Senyesemane ya June 15 1922, e ile ya etsa tsebiso ya hore ho tla ba le kopano Cedar Point, Ohio ho tloha ka la 5 ho ya ho 13 September 1922. Diithuti tsa Bibele di ne di thabile haholo ha di fihla Cedar Point.

Puong ya hae ya pele Morabo rona Rutherford o ile a re: “Ke kgodisehile hore Morena o tla . . . hlohonolofatsa kopano ena le ho etsa bonnete ba hore e fana ka bopaki bo boholo ho feta bo kileng ba eba teng lefatsheng.” Batho ba neng ba fana ka dipuo moo kopanong ba ne ba kgothalletsa bara le baradibabo rona hore ba rute batho Bibele.

Ka Labohlano la 8 September, batho ba ka bang 8 000 ba ile ba kena ka holong ba thabetse ho tlo mamela puo ya Morabo rona Rutherford. Ba ne ba nahana hore o tla hlalosa hore na “ADV” e neng e ngotswe dimemong tsa bona e bolelang. Ha ba ntse ba dula fatshe, bongata ba bona ba ile ba bona seile e kgolo e thatetswe hodimo sethaleng.  Morabo rona Arthur Claus ya neng a tlile kopanong a tswa Tulsa, Oklahoma, Amerika, o ile a dula moo a neng a kgona ho utlwa dipuo hantle. Ka nako eo ho ne ho se na dibuelahole ka hoo ho ne ho le thata hore motho a utlwe dipuo hantle.

Modulasetulo o ile a etsa tsebiso ya hore ha ho na motho ya tla dumellwa ho kena ka holong ha Morabo rona Rutherford a ntse a fana ka puo, e le hore ho se ke ha eba le tshitiso ha puo e ntse e tswela pele. Ka 9:30 hoseng, Morabo rona Rutherford o ile a qala ka ho qotsa mantswe a Jesu a ho Matheu 4:17 a reng: “Mmuso wa mahodimo o atametse.” (King James Version) Morabo rona Rutherford o ile a bua hore na batho ba tla tseba jwang ka Mmuso ona. O ile a re: “Jesu o ile a re ha a eba teng o tla etella pele kotulo ya batho ba hae, e leng nako eo ka yona a tla bokella batho ba tshepahalang.”

Morabo rona Claus o ne a dutse ka holong e kgolo mme o ile a re o ne a mametse ka hloko. Empa ka maswabi o ile a kula mme a tlameha ho tswa ka holong le hoja a ne a sa batle hobane o ne a tseba hore ha a ka tsamaya a ke ke a dumellwa ho kgutla.

Ka mora metsotso e itseng o ile a ikutlwa a se a le betere. O re ha a re o a kgutla o ile a utlwa lerata la batho ba opang diatla. Sena se ile sa etsa hore a thabe haholo. O ile a etsa qeto ya hore haeba a tlameha ho hlwella ka hodima marulelo o tla etsa jwalo hore feela a kgone ho utlwa puo ena e monate. Ka nako eo Morabo rona Claus o ne a le dilemo di 23 mme o ile a kgona ho hlwella marulelong a holo. Le hoja lebota leo le ne le le bolelele ba dimithara tse fetang tse nne, o ile a kgona ho le hlwella. Difensetere tse ka hodimo tsa holo di ne di butswe ka hoo ha a di atamela o ile a thaba haholo ha a hlokomela hore o kgona ho utlwa puo hantle.

Morabo rona Arthur o ne a ena le e meng ya metswalle ya hae marulelong a holo. Motswalle wa hae e mong e leng Frank Johnson o ile a ya ho  yena mme a mo botsa hore na ebe ha a tshwara thipa.

Morabo rona Arthur o ile a re: “E, ke e tshwere.”

Morabo rona Frank a re: “O karabo ya thapelo ya rona. Na o bona seile ee e kgolo e thatetsweng? E tlameletswe dipekereng tsena. Mamela Moahlodi * hantle. Ha a re ‘le lokela ho phatlalatsa le phatlalatse,’ wena o kgaole dithapo tsena tse nne.”

Morabo rona Arthur, o ile a dula a tshwere thipa a emetse Morabo rona Rutherford a bue mantswe ao. Morabo rona Rutherford o ile a fihla karolong eo a seng a hatisa dintlha tsa bohlokwa puong ya hae. O ne a thabile ebile a tjheseha hoo a ileng a batla a hweletsa ha a ne bua mantswe a reng: “Tshepahalang mme le be dipaki tsa nnete tsa Morena. Tswelang pele ho lwana ho fihlela Babilona e leng bodumedi ba bohata bo fediswa. Bolellang batho molaetsa ona hohle. Batho ba lokela ho tseba hore Jehova ke Modimo le hore Jesu Kreste ke Morena wa marena. Lena ke letsatsi la bohlokwa historing. Bonang Morena o a busa! Le na le boikarabelo ba ho bolella motho e mong le e mong ka taba ena. Ka hoo, phatlalatsang, phatlalatsang, phatlalatsang Morena le Mmuso wa hae!”

Morabo rona Arthur o re yena le metswalle ya hae ba ile ba kgaola dithapo tsa seile mme e ile ya theohela tlase e sa etse lerata. Ditlhaku “ADV” di ne di bolela lentswe phatlalatsang ka Senyesemane ka hoo seile e ne e ngotswe: “Phatlalatsang Morena le Mmuso.”

Kopano e neng e le Cedar Point e ile ya thusa bara le baradibabo rona hore ba amehe ka mosebetsi wa bohlokwa wa ho bolela ka Mmuso. Bohle ba neng ba ikemiseditse ho ruta batho Bibele ba ne ba thabetse ho nka karolo mosebetsing ona. Morekisi e mong wa dibuka tsa bodumedi (eo hona jwale a tsebahalang e le pulamadiboho) ya dulang Oklahoma, Amerika, o ile a re: “Re bolela dibakeng tseo batho ba bangata ba sebetsang dimmaeneng tsa mashala ebile ba futsanehile haholo.” Hangata ha batho ba ne ba utlwa molaetsa o neng o le makasineng ya Golden Age ba ne ba lla. O boetse o re: “Re ne re thaba haholo hobane re ne re kgona ho ba kgothatsa.”

Diithuti tsena tsa Bibele di ne di tseba ka moo mantswe a Jesu a hlahang ho Luka 10:2 a reng “kotulo e kgolo empa basebetsi ba a fokola,” a leng bohlokwa ka teng. Ha selemo se fela ba ne ba ikemiseditse le ho feta ho phatlalatsa molaetsa wa Mmuso lefatsheng lohle.