Ha re ntse re ithuta makgabane a motho, re tla mo tseba haholwanyane mme seo se tla etsa hore setswalle sa rona le yena se be matla. Ka tsela e tshwanang, ha re ntse re ithuta ka makgabane a Jehova, re tla tseba hore na ke motho ya jwang mme setswalle sa rona le yena se tla ba matla. Makgabaneng ao Modimo a nang le ona ho na le a 4 a hlahelletseng, e leng matla, bohlale, lerato le ho se be le kgethollo.

“Mmusi Morena Jehova! Bona! o entse mahodimo le lefatshe ka matla a hao a maholo.”—JEREMIA 32:17.

Matla a Jehova re a bona dinthong tseo a di bopileng. Ka mohlala, ha o eme ka ntle e le lehlabula o a futhumala. Haele hantle, o utlwa matla a letsatsi leo Jehova a le bopileng. Letsatsi le matla hakae? Bohareng ba letsatsi ho na le motjheso o ka bang 15 000 000°C. Ka motsotswana o mong le o mong, letsatsi le ntsha matla a lekanang le a ho qhoma ha dibomo tsa nuclear tse dimilione tse makgolo.

Le ha ho le jwalo, letsatsi le lenyane ha le bapiswa le dinaledi tse ding tse senang palo tse fumanwang sepakapakeng. Borasaense ba nahana hore e nngwe ya dinaledi tse kgolo ka ho fetisisa e leng UY Scuti, e boholo bo fetang letsatsi ka makgetlo a ka bang 1 700. Haeba naledi ena e ne e ka behwa moo letsatsi le dutseng teng, e ne e ka kwahela lefatshe hammoho le sebaka seo polanete e bitswang Jupiter e potolohang ho sona. Mohlomong sena se re thusa ho utlwisisa mantswe a Jeremia  ha a ne a re Jehova Modimo o bopile mahodimo le lefatshe ka matla a hae a maholo.

Re fumana molemo ofe matleng a Modimo? Re hloka letsatsi le dintho tseo Modimo a di bopileng e le hore re phele. Ho feta moo, Modimo o sebedisa matla a hae ho thusa e mong le e mong wa rona. O etsa seo jwang? Nakong e fetileng Modimo o ile a fa Jesu matla a hore a etse mehlolo. Re a bala: “Ba foufetseng ba boetse ba a bona, le ba holofetseng ba a tsamaya, balepera ba ntse ba hlwekiswa mme ba sa utlweng ditsebeng ba a utlwa.” (Matheu 11:5) Ho thweng kajeno? Bibele e re: “O fana ka matla ho ya kgathetseng.” E boetse e re: “ba tshepileng Jehova ba tla boela ba fumane matla.” (Esaia 40:29, 31) Modimo a ka re fa “matla a fetang se tlwaelehileng” ho re thusa ho mamella mathata a re hlahelang. (2 Bakorinthe 4:7) Na ha o ikutlwe o batla ho ba haufi le Modimo ya o ratang le ya sebedisang matla a hae ho o thusa ha o hlahelwa ke mathata?

“Jehova, mesebetsi ya hao e mengata hakaakang! Kaofela ha yona o e entse ka bohlale”—PESALEME YA 104:24.

Ha re ntse re tswelapele ho ithuta ka dintho tseo Modimo a di entseng, re tla makatswa ke bohlale ba hae. Haele hantle borasaense ba bang ba qopitsa dinthong tseo Jehova a di bopileng ho ntlafatsa dintho tseo ba iketsetsang tsona. Ka mohlala, borasaense ba qopiditse tepo ya sekgo e le hore ba etse glue.

Ntho e hlollang ka ho fetisisa ka bohlale ba Modimo, ke tsela eo a bopileng batho ka yona. Ka mohlala, nahana ka tsela eo lesea le bopehang ka yona. Sena se qala ka hore peo ya ntate e kopane le lehe la mme, tseo ka bobedi di nang le diphatsa tsa lefutso. Cell ena e ya ikarola mme e etsa di cell tse ngata tse tshwanang. Ha nako e ntse e ya, di cell tsena di qala ho fetoha hore e be mefuta e mengata e sa tshwaneng, e jwalo ka blood cells, nerve cells le bone cells. Jwale ditho tsa mmele wa lesea di qala ho kopana le ho sebetsa. Ka mora dikgwedi tse 9, lesea le nang le di cell tse dibilione le a hlaha. Bohlale bona bo etsa hore batho ba dumellane le mongodi e mong wa Bibele ya ileng a re: “Ke tla o roka hobane ka tsela e tshosang ke entswe ka mokgwa o hlollang.”—Pesaleme ya 139:14.

Re fumana molemo ofe bohlaleng ba Modimo? Mmopi o a tseba hore na re hlokang e le hore re thabe. Ka ha o na le tsebo e phahameng le kutlwisiso, o kgona ho re fa keletso e molemo a sebedisa Lentswe la hae Bibele. Ka mohlala, e re kgothalletsa hore re: ‘Tswelepele . . . ho tshwarelana ka bolokolohi.’ (Bakolose 3:13) Ena ke keletso e molemo. Dingaka di bontsha hore ho tshwarela ho ka etsa hore motho a robale hantle bosiu mme ha fokotsa le kgatello ya madi. Ho ka boela ha fokotsa kgatello ya maikutlo le mafu a mang. Modimo o tshwana le motswalle ya bohlale, ya re kgathallang le ya sa kgaotseng ho re thusa ka ho re fa dikeletso. (2 Timothea 3:16, 17) Na o ka se thabele ho ba le motswalle ya jwalo?

“Jehova o rata toka.”—PESALEME YA 37:28.

Kamehla Modimo o etsa se nepahetseng. Ha e le hantle Bibele e re, “ho ke ho be hole le Modimo wa nnete hore a sebetse bokgopo, le hore ya Matla Ohle a sebetse ka mokgwa o hlokang toka!” (Jobo 34:10) Dikahlolo tsa hae di molemo, ke ka hoo mongodi e mong wa pesaleme a ileng a re ka yena: “O tla ahlola ditjhaba ka ho loka.” (Pesaleme ya 67:4) Ka ha “Jehova o bona seo pelo e leng sona,” a ke ke a thetswa ke batho ba iketsang seo ba seng sona, empa o kgona ho bona seo e leng nnete ebile o ahlola ka tsela e molemo. (1 Samuele 16:7) Ho feta moo, Modimo o kgona ho bona ntho e nngwe le nngwe e sa lokang mona lefatsheng mme o tshepisa hore haufinyane “ba kgopo, ba tla fediswa lefatsheng.”—Liproverbia 2:22.

Haele hantle, Modimo ha se moahlodi ya bohale le ya ikemiseditseng ho fana ka kotlo. O bontsha mosa ha ho hlokahala. Bibele e re: “Jehova o mohau mme o mosa,” le ho batho ba kgopo haeba ba ikemiseditse ho fetoha. Na seo ha se bontshe hore Modimo ha a na kgethollo?—Pesaleme ya 103:8; 2 Petrose 3:9.

Re fumana molemo ofe haeba Modimo a sa re kgetholle? Moapostola Petrose o ile a re: “Modimo ha a leeme, empa setjhabeng se seng le se seng motho ya mo tshabang le ya sebetsang ho loka o a amoheleha ho yena.” (Liketso 10:34, 35) Re fumana molemo haeba Modimo a sa re kgetholle, hobane o re rata kaofela. Ho sa tsotellehe morabe, setso sa hao, o rutehile kapa tjhe le hore na o boemo ba hao ke bofe, Modimo o tla re amohela hape re tla ba barapedi ba hae.

Modimo o re file letswalo e le hore re utlwisise re be re fumane molemo wa hae wa ho se bontshe kgethollo. Mangolo a re letswalo ke molao o ‘ka dipelong tsa rona,’ le o re ‘pakelang’ ha re etsa se sebe kapa se setle. (Baroma 2:15) Letswalo le re thusa jwang? Matswalo a rona a ka re thusa hore re se ke ra etsa dintho tse sa lokang haeba a kwetlisitswe hantle. Haeba re etsa phoso a ka kgona  ho re thusa hore re se ke ra pheta phoso eo hape. Ka sebele, ho utlwisisa hore Modimo ha a na kgethollo, ho re thusa hore re atamele haufi le yena!

“Modimo ke lerato”—1 JOHANNE 4:8.

Modimo o na le matla, o bohlale ebile ha a na kgethollo, empa ha hona moo Bibele e reng Modimo ke matla kapa bohlale. Le ha ho le jwalo, e re Modimo ke lerato. Hobaneng? Ke nnete hore matla a Modimo a etsa hore a kgone ho etsa se itseng mme bohlale le ho se bontshe kgethollo, di mo thusa hore na ke jwang a ka etsang seo. Empa lerato la hae ke lona le mo susumelletsang ho etsa tsena kaofela.

Le hoja Jehova a ne a sa hloke letho, lerato leo a nang le lona le ile la mo susumelletsa hore a bope mangeloi le batho, e le hore ba thabele tlhokomelo le lerato la hae. O fane ka lefatshe hore e be lehae la batho. Hape o tswelapele ho bontsha batho bohle lerato hobane “o tjhabisetsa batho ba kgopo le ba molemo letsatsi la hae mme o nesetsa batho ba lokileng le ba sa lokang pula.”—Matheu 5:45.

Ho ekelletsa moo, “Jehova o na le lerato le mofuthu haholo mme o mohau.” (Jakobo 5:11) O atamela haufi le ba batlang ho atamela haufi le yena. Modimo o bona e mong le e mong ya batlang ho atamela haufi le yena. Haele hantle, ‘o a o tsotella.’—1 Petrose 5:7.

Re fumana molemo ofe leratong la Modimo? Re thabela ho bona botle bo etswang ke ha letsatsi le dikela. Re rata ho utlwa ha ngwana a tsheha. Re thabela lerato leo re bang le lona le ba lelapa. Dintho tsena ha di kgolo hakaalo, empa di etsa hore re thabele bophelo.

Molemo o mong oo re o fumanang ke wa ho kgona ho rapela Modimo. Bibele e re: “Le se ke la tshwenyeha ka letho, empa nthong e nngwe le e nngwe ka thapelo le thapedi hammoho le diteboho dikopo tsa lona tse matla di ke di tsebiswe Modimo.” Jwalo ka ntate ya lerato, o batla hore re kope thuso ho yena. Ka hoo, Jehova o re tshepisa hore o tla re fa ‘kgotso ya Hae e fetang monahano wohle.’—Bafilipi 4:6, 7.

Na dintho tseo re seng re buile ka tsona ka Modimo tse jwalo ka matla a hae, bohlale, lerato le ho se be le kgethollo, di o thusitse ho bona hore na Modimo ke motho ya jwang? E le hore o ithute ka ho eketsehileng ka Modimo, re kopa hore o ithute ka dintho tseo a seng a di entse le tseo a tla tla a o etsetsa tsona.