TLALEHO ya buka ya Matheu e re Jesu o ile a “a kena ka tempeleng a phahla bohle ba rekisang le ba rekang ka tempeleng, mme a phethola ditafole tsa ba ananyang tjhelete le dibentjhe tsa ba rekisang maeba. A re ho bona: ‘Ho ngodilwe, “Ntlo ya ka e tla bitswa ntlo ya thapelo,” empa le e etsa lehaha la mashodu.’”—Mat. 21:12, 13.

Dibuka tsa histori ya Sejuda di bontsha hore borakgwebo bao ba ne ba ropa batho ka ho rekisa dintho ka theko e hodimo haholo. Ka mohlala, buka ya The Mishnah e re dilemong tsa bo50 maeba a mabedi, a neng a sebediswa ho etsa sehlabelo, a ne a se a rekiswa ka denare e le nngwe ya kgauta. Tjhelete eo e ne e lekana le eo motho a neng a e patalwa ha a sebeditse matsatsi a 25. Molao o ne o dumella motho ya futsanehileng ho etsa sehlabelo ka maeba kapa maebana, empa jwale le tsona dinonyana tsena di ne di se di tura haholo esita le bakeng sa mafutsana. (Lev. 1:14; 5:7; 12:6-8) Rabi e mong ya bitswang Simeon ben Gamaliel, o ile a tenwa ke boemo bona hoo a ileng a ba a fokotsa palo ya mahlabelo ao batho ba neng ba tlamehile ho a etsa.

Mabaka ao re buileng ka ona ka hodimo a re thusa ho utlwisisa hore na ke hobaneng ha Jesu a ne a nepile ka ho bitsa borakgwebo bao “mashodu.” Ba ne ba tlatlapa batho ka lebaka la ho ba meharo.