Buka ea Bobeli ea Likronike 1:1-17
1 Solomone mora oa Davida ea e-ba morena ea matla. Jehova Molimo oa hae o ne a e-na le eena ’me a etsa hore a be matla haholo.+
2 Solomone a bitsa Baiseraele bohle, balaoli ba ba likete le ba ba makholo, baahloli le likhosana tsohle tsa Baiseraele le lihlooho tsa malapa.
3 Solomone le phutheho eohle ba ea sebakeng se phahameng Gibeone.+ Ke moo tente ea pokano ea Molimo oa ’nete e neng e le teng e leng tente eo Moshe mohlanka oa Jehova a neng a e entse lefeelleng.
4 Davida o ne a latile Areka ea Molimo oa ’nete Kiriathe-jearime+ ’me a e tlisitse sebakeng seo a neng a e lokiselitse sona. O ne a e etselitse tente Jerusalema.+
5 Aletare ea koporo+ eo Bezalele+ mora oa Uri mora oa Hure a neng a e entse e ne e behiloe ka pel’a tabernakele ea Jehova. Solomone le phutheho eohle ba ne ba rapela ka pel’a eona.*
6 Solomone a etsa linyehelo moo ka pel’a Jehova ’me a etsa linyehelo tsa secheso tse 1 000 aletareng ea koporo+ e tenteng ea pokano.
7 Bosiung boo, Molimo a hlaha ho Solomone a re ho eena: “Mpolelle hore na u batla ke u fe eng.”+
8 Solomone a re ho Molimo: “U ile oa bontša ntate oa ka Davida hore u mo rata haholo*+ ’me oa etsa hore ke mo hlahlame boreneng.+
9 Jehova Molimo, e se eka ntho eo u e tšepisitseng ntate oa ka Davida e ka phethahala+ hobane u nkentse morena oa batho ba bangata joaloka lerole la lefatše.+
10 Mphe bohlale le tsebo+ e le hore nka etella sechaba sena pele* kaha ha ho motho ea ka khonang ho ahlola sechaba sena sa hao se seholo.”+
11 Molimo a re ho Solomone: “Kaha sena ke seo u se batlang ’me ha oa kopa maruo, ho hlomphuoa kapa hore ba u hloileng ba shoe ebile ha oa kopa hore u phele nako e telele* empa u kopile bohlale le tsebo e le hore u ahlole sechaba sa ka seo ke u entseng morena oa sona,+
12 ke tla u fa bohlale le tsebo, ke u fe le maruo le tlotla tseo ho se nang morena ea kileng a ba le tsona pele ho uena le tseo ho se nang morena ea tla ba le tsona ka mor’a hao.”+
13 Solomone a tloha sebakeng se phahameng Gibeone+ ka pel’a tente ea pokano, a ea Jerusalema ’me a busa Iseraele.
14 Solomone a ’na a eketsa likariki tsa hae tsa ntoa le lipere.* O ne a e-na le likariki tsa ntoa tse 1 400 le lipere* tse 12 000.+ O ne a li behile metseng ea likariki tsa ntoa+ le haufi le morena Jerusalema.+
15 Morena a etsa hore silevera le khauta tse Jerusalema li be ngata joaloka majoe+ le hore lifate tsa kedare li be ngata joaloka lifate tsa sikamora tse Shefela.+
16 Lipere tsa Solomone li ne li tsoa Egepeta+ ’me bo-rakhoebo ba morena ba ne ba reka sehlopha* sa lipere ka theko e tšoanang.+
17 Kariki ka ’ngoe e tsoang Egepeta e ne e rekoa ka likotoana tsa silevera tse 600 ’me pere eona e rekoa ka tse 150. Ba ne ba li romela ho marena ’ohle a Bahethe le a Siria.
Linaletsana
^ Kapa: “ba ne ba botsa Molimo moo.”
^ Kapa: “oa bontša ntate oa ka Davida lerato le tšepahalang.” Sheba Tlhaloso.
^ Ka Seheberu: “e le hore nka tsoa ka pel’a sechaba sena le hore nka kena.”
^ Ka Seheberu: “matsatsi a mangata.”
^ Kapa: “bapalami ba lipere.”
^ Kapa: “bapalami ba lipere.”
^ Kapa mohlomong: “li ne li tsoa Egepeta le Kue. Bo-rakhoebo ba morena ba ne ba li reka Kue,” mohlomong ho buuoa ka Sisilia.
