Jeremia 27:1-22
27 Qalong ea puso ea Jojakime* mora oa Josiase, morena oa Juda, Jehova o ile a bua le Jeremia.
2 Eaba Jeremia o re: “Jehova o itse ho ’na: ‘Iketsetse liropo le lijoko ’me u li behe molaleng.
3 U li romele ho morena oa Edomo,+ morena oa Moabe,+ morena oa bara ba Amone,+ morena oa Tire+ le morena oa Sidone+ ka baromuoa ba tlileng Jerusalema ho Morena Tsedekia oa Juda.
4 U fe marena ao taelo e eang ho beng ba ’ona e reng:
“Ona ke molaetsa o tsoang ho Jehova oa mabotho, Molimo oa Iseraele oo le lokelang ho o bolella beng ba lona:
5 ‘Ke ’na ea entseng lefatše, batho le liphoofolo tse lefatšeng ka matla a ka le ka letsoho la ka le matla.* Ke li file mang kapa mang eo ke mo ratang.*+
6 Ke file mohlanka oa ka Nebukadnezare+ morena oa Babilona linaha tsena tsohle. Le libata tsa naha ke li behile taolong ea hae.
7 Lichaba tsohle li tla mo sebeletsa, li sebeletse mora oa hae le setloholo sa hae ho fihlela ha nako ea naha ea hae e fihla,+ nako eo ka eona lichaba tse ngata le marena a maholo a tla mo etsa lekhoba.+
8 Haeba ’muso kapa sechaba sefe kapa sefe se ka hana ho sebeletsa Nebukadnezare morena oa Babilona le ho beha molala oa sona tlas’a joko ea morena oa Babilona, ke tla otla sechaba seo ka sabole,+ tlala le lefu la seoa ho fihlela ke se timelitse ka letsoho la hae,’ ke Jehova ea chong.
9 ‘Kahoo, le se ke la mamela baprofeta ba lona, linohe, ba sebetsang ka litoro, maselamose le baloi ba reng ho lona: “Le ke ke la sebeletsa morena oa Babilona.”
10 Etsoe ba le profetela leshano. Haeba le ka ba mamela, le tla isoa hole le naha ea lona, ke tla le qhalakanya ’me le tla timela.
11 ‘Empa sechaba se behang molala oa sona tlas’a joko ea morena oa Babilona ebe sea mo sebeletsa, ke tla se lumella ho sala* naheng ea sona hore se e leme ’me se lule ho eona,’ ke Jehova ea chong.”’”
12 Ke ile ka bua ka tsela e tšoanang le ho Tsedekia+ morena oa Juda ka re: “Behang melala ea lona tlas’a joko ea morena oa Babilona, le mo sebeletse, le sebeletse le batho ba hae ’me le tla lula le phela.+
13 Ho seng joalo, uena le batho ba hao le tla hlaheloa ke lintho tseo Jehova a itseng li tla hlahela sechaba se ke keng sa sebeletsa morena oa Babilona eaba le bolaoa ka sabole,+ tlala+ le ka lefu la seoa.+
14 Le se ke la mamela mantsoe a baprofeta ba reng ho lona: ‘Le ke ke la sebeletsa morena oa Babilona’+ hobane ba le profetela mashano.+
15 Ha kea ba roma empa ba profeta mashano ka lebitso la ka. Ha le ka ba mamela, ke tla le qhalakanya ’me le tla shoa, lona le baprofeta ba le profetelang,” ke Jehova ea chong.+
16 Ke itse ho baprista le sechaba sena sohle: “Jehova o re: ‘Le se ke la mamela mantsoe a baprofeta ba lona ba le profetelang ba re: “Lisebelisoa tsa ntlo ea Jehova li tla khutla Babilona haufinyane”+ hobane ba le profetela mashano.+
17 Le se ke la ba mamela. Sebeletsang morena oa Babilona ’me le tla lula le phela.+ Ho seng joalo, motse ona o tla ripitloa.
18 Empa haeba ke baprofeta ’me ehlile Jehova o bua le bona, e-reng ba kope Jehova oa mabotho hore lisebelisoa tse setseng ka tlung ea Jehova, ka tlung ea morena* oa Juda le tse setseng Jerusalema li se ke tsa isoa Babilona.’
19 Jehova oa mabotho o re ka lipilara,+ Tanka,*+ likariki+ le lisebelisoa tse setseng motseng ona,
20 tseo Nebukadnezare morena oa Babilona a sa kang a li nka ha a hapa Jekonia mora oa Jojakime, morena oa Juda, ho tloha Jerusalema ho ea Babilona hammoho le bahlomphehi bohle ba Juda le Jerusalema,+
21 Jehova oa mabotho, Molimo oa Iseraele, o re ka lisebelisoa tse setseng ka tlung ea Jehova, ka tlung* ea morena oa Juda le tse setseng Jerusalema:
22 ‘Li tla isoa Babilona+ ’me li tla sala moo ho fihlela ke li lata,’ ke Jehova ea chong. ‘Ke tla li lata, ke li khutlisetse mona.’”+
Linaletsana
^ Kapa: “Tsedekia,” ho latela meqolo e meng ea khale.
^ Ka Seheberu: “ea lokileng mahlong a ka.”
^ Ka Seheberu: “otlolohileng.”
^ Ka Seheberu: “phomola.”
^ Kapa: “phaleising.”
^ Ka Seheberu: “Leoatle.”
^ Kapa: “phaleising.”
