Liproverbia 25:1-28
25 Ana le ’ona ke maele a Solomone+ ao bahlanka ba Ezekiase+ morena oa Juda ba ileng ba a kopitsa:*
2 Molimo o tlotlisoa ke ha taba e bolokoa e le sephiri,+Marena ’ona aa tlotlisoa ha a batlisisa taba.
3 Feela joalokaha maholimo a phahame le lefatše le tebile,Lipelo tsa marena le tsona li ke ke tsa utloisisoa.
4 Tlosa lintho tse litšila silevereng,E tla sala e hloekile haholo.+
5 Tlosa motho ea khopo ka pel’a morena’Me terone ea morena e tla tsitsisoa ka lebaka la toka.+
6 U se ke oa itlotlisa ka pel’a morena+Hape u se ke oa lula le bahlomphehi.+
7 Ho molemo hore eena a re ho uena: “Nyolohela mona,”Ho feta hore a u tlotlolle ka pel’a bahlomphehi.+
8 U se ke oa tatela ho hlahlela nyeoe,U tla etsa’ng haeba moahisani oa hao a ka u hlola?+
9 Lokisa litaba le moahisani oa hao.+
U se ke oa ntša makunutu a hae*+
10 Hobane ea u mametseng o tla u tlotlolla’Me lintho tse mpe tseo u li buileng,* u ke ke oa li khutlisa.
11 Lentsoe le builoeng ka nako e nepahetsengLe joaloka liapole tsa khauta ka lijaneng tsa silevera.+
12 Motho ea khalemelang ka bohlaleO tšoana le lesale la khauta le mokhabiso oa khauta e hloekileng ho motho ea mamelang.*+
13 Moromuoa ea tšepahalangO joaloka serame sa lehloa* letsatsing la kotuloKaha o hlasimolla mong’a hae.+
14 Motho ea ithorisang ka hore o tl’o fana ka mpho empa a sa etse joalo,*+O tšoana le maru le moea tse sa tliseng pula.
15 Molaoli o haptjoa ka mamello,Mantsoe a bonolo a* ka roba lesapo.+
16 Ha u fumana mahe a linotši, ja a u lekaneng feela,Ha u ja a mangata haholo, u ka ’na oa a hlatsa.+
17 U se ke oa chakela moahisani oa hao hangataE le hore u se ke oa mo tena eaba oa u hloea.
18 Motho ea fanang ka bopaki ba bohata khahlanong le moahisani oa hae+O joaloka molamu oa ntoa, sabole le motsu o leolitsoeng.
19 Ho tšepa motho ea sa tšepahaleng* linakong tsa mahlomolaHo tšoana le ho hlafuna ka leino le pshatlehileng le ho tsamaea ka leoto le holofetseng.
20 Motho ea binelang pelo e hlomohileng lipina+O tšoana le motho ea hlobolang seaparo ha ho bataLe vinika ha e tšeloa holim’a soda.*
21 Haeba motho ea u hloileng a lapile, u mo fe bohobe hore a je,Haeba a nyoriloe, u mo fe metsi hore a noe.+
22 U tla be u bokella mashala hloohong ea hae*+’Me Jehova o tla u putsa.
23 Moea o hlahang leboea o tlisa pula ea litloebelele,Leleme le sebang lona lea halefisa.+
24 Ho molemo ho lula k’honeng ea maruleloHo feta ho lula ka tlung le mosali ea ratang likhang.*+
25 Tlaleho e monate e tsoang naheng e hole+E tšoana le metsi a pholileng ha a nooa ke motho ea* khathetseng.
26 Ha motho ea lokileng a inehela ho* ea khopo,O tšoana le seliba se lukiloeng le se sentsoeng.
27 Ha se ntho e ntle hore motho a je mahe a linotši a mangata haholo.+
Hape ha ho hotle hore motho a ipatlele thoriso.+
28 Motho ea sa khoneng ho laola bohale ba hae+O joaloka motse oo marako a oona a helelitsoeng.
Linaletsana
^ Kapa: “kopitsa le ho a bokella.”
^ Kapa: “makunutu a batho ba bang.”
^ Kapa: “lintho tseo u li buileng ho mo senya lebitso.”
^ Ka Seheberu: “ea nang le tsebe.”
^ Mohlomong moea o pholileng o tsoang lithabeng tse apereng lehloa.
^ Ka Seheberu: “ka mpho ea bohata.”
^ Ka Seheberu: “Leleme le bonolo le.”
^ Kapa mohlomong: “ea bolotsana.”
^ Ho buuoa ka carbonate of soda.
^ E leng ho nolofatsa pelo ea motho.
^ Kapa: “ea likomang.”
^ Ka Seheberu: “moea o.” Sheba Tlhaloso.
^ Ka Seheberu: “a tšerema ka pel’a.”
