Selelekela

Nka Fumana Keletso ea Bohlokoa Hokae?

Banana

Ha ho seo u nahanang ka sona haese tjaka ena ea moshanyana e mocha ka tlelaseng ea lōna. Joale u re ka pelong: ‘Ha a ntsebe le ho ntseba, kahoo ha ke bone bothata ba letho ka ho lula ke nahana ka eena!’ Etsoe hase uena feela. Ngoanana e mong le e mong oa shoa oa ikepela ka moshanyana enoa. Ua tseba hore baa mo rata hobane u hlola u utloa banana ba bang ba bua ka eena nako ena kaofela.

Ha u re mahlo tloha! u fumana a u shebile. U sa lebella, ke eo a bososela le uena hamonate. Le uena ua bososela. Joale o tla ho uena.

“Ho joang?” o bua a le lihlong.

“Ho monate,” ke uena eo.

 “’Na ke Kabelo.”

U ikutloa u se u itse, “Ua fihla mona.”

“E, lelapa leso le sa tsoa fallela mona libekeng tse ’maloa tse fetileng.”

Ha u kholoe hore ehlile Kabelo o buisana le uena!

Kabelo o tsoela pele o re, “Eh . . . ke tl’o etsa phathi lapeng mane tsatsing lena ha sekolo se tsoa. Na u ka rata ho tla?”

Joale o buela tlaase o bile o roba leihlo.

O re, “Ua tseba ke’ng, batsoali ba ka ba tla be ba le sieo, ’me ho tla be ho e-na le joala. U tla tla?”

Kabelo o emetse karabo. Ngoanana e mong le e mong sekolong mona a ka be a lumetse hang-hang!

U tla re’ng?

Bashanyana

Bana ba babeli bao u kenang sekolo le bona ba tla ba u tobile. U utloa u sehoa ke mala hobane ba se ba lekile ka makhetlo a mabeli bekeng eona ena ho etsa hore u tsube. Lena e tla be e le lekhetlo la boraro.

Moshanyana oa pele o re: “U mong hape? Tšoara motsoalle ke enoa.” O felehetsa lentsoe “motsoalle” ka ho roba leihlo ha a ntša ntho e ’ngoe ka pokothong ’me a leka ho u fa eona.

U bona ntho e kang sakerete pakeng tsa menoana ea moshanyana enoa. U tseba hantle hore na ke eng, joale u sehoa ke mala le ho feta.

“Le tla ntšoarela,” ke uena eo. “Ke se ke le boleletse hore ha ke . . . ”

Moshanyana oa bobeli o u kena hanong, o re: “E tlameha e le bolumeli bane ba hao. Uena ha u na seo u ithabisang ka sona!”

Moshanyana oa pele oa u soma, o re, “Kapa o lekoala na monna?”

U fumana matla a ho re: “Ha ke lekoala!”

Joale moshanyana oa bobeli oa u haka. Ka lentsoe le u qekang, o re: “Tšoara hle monna!”

Moshanyana oa pele o atametsa ntho ena e tšoeu haufi le sefahleho sa hao ’me o buela tlaase o re: “Re ke ke ra joetsa motho leha e le ofe. Ha ho na motho ea tla tseba.”

U tla etsa’ng?

 LIKETSAHALO tse tšoanang le tsena li ba teng letsatsi le leng le le leng hoo e batlang e le lefatšeng lohle. Leha ho le joalo, taba ke hore bacha ba bang ba hlomeletsoe ho sebetsana le maemo a kang ana ho feta ba bang. Ha a le tlas’a khatello, moshanyana ea talimaneng le teko ea ho tsuba a ka ’na a nahana tjena: ‘Ha ke batle ho inehela, empa le teng ke sitoa ho mamella khatello ena. Eseng ke bontše bana baa bao ke kenang sekolo le bona hore ha ke mokhelo?’ Kapa ngoanana ea kōptjoang ke moshanyana e mong hore ba intše a ka ’na a ipolella hore: ‘O shebahala hantle. Ke hobane’ng ke sa lumele hanngoe feela—nke ke ikutloise?’

Ka lehlakoreng le leng, bacha ba bangata ba rutiloe hore ba be le sebete sa ho emela seo ba se lumelang. Ka lebaka leo—le hoja ho ka bonahala e le ntho e makatsang—ba khona ho ikemela ha ba le tlas’a khatello ea ho etsa se fosahetseng. Na u ka rata ho tšoana le bacha bao? Litaba tse monate ke hore u ka khona! Joang?

Bibele e ka u thusa hore u be le sebete ha u sebetsana le mathata a bocha. E na le keletso e molemo ka ho fetisisa kaha ke Lentsoe la Molimo le bululetsoeng. (2 Timothea 3:16, 17) Bibele e ka u thusa mathateng afe? Sheba lethathamo le ka tlaase, ’me u tšoae ✔ haufi le lihlooho tseo u li thahasellang haholo.

□ Litaba tse amang banana le bashanyana

□ Ho utloisisa se etsahalang ’meleng oa ka

□ Ho etsa metsoalle

□ Ho sebetsana ka katleho le liteko sekolong

□ Ho sebelisa chelete hantle

□ Ho sebelisana le batsoali

□ Ho laola maikutlo a ka

□ Ho khetha boithabiso

□ Ho ntlafatsa bomoea ba ka

Joalokaha u tla hlokomela ha u sheba leqepheng la 4 le la 5, lintlha tse boletsoeng ka holimo li tsamaisana le likarolo tse robong tsa buka ena. U tšoaile life? U ka ’na ua rata ho  qala ka ho bala likarolo tseo. Melao-motheo ea Bibele e ka u thusa likarolong tsena kaofela tsa bophelo. Buka ena eo u ntseng u e bala e tla u bontša hore na melao-motheo eo e ka u thusa joang. *

Hape buka ena e tla u fa monyetla oa hore u itlhalose. Ka mohlala, ho elella bofelong ba khaolo ka ’ngoe, ho na le lebokose le reng “Seo ke Rerang ho se Etsa!” U tla kōptjoa hore u ngole ho lona maikutlo a hao tabeng ea hore na u ka sebelisa seo u ithutileng sona joang. Likarolo tseo u ka ngolang lintlha ho tsona—tse kang e reng “Seo U ka se Etsang ha U Hatelloa ke Lithaka” leqepheng la 132 le 133—li tla u thusa hore u nahane ka mathata ao u tobanang le ’ona le hore na u ka a rarolla joang ka tsela e sebetsang. Ho phaella moo, karolo ka ’ngoe ea buka e qetella ka leqephe le nang le sehlooho se reng “Lintlha Tsa Botho,” leo ho lona u tla ngola hore na lintlha tse itseng tseo u li balileng li u ama joang bophelong. Likarolong tse robong tsa buka ena, u tla boela u fumane sehlooho se reng Mohlala o Motle oa.” Lihloohong tsena, ho phetoa litaba tsa batho ba sa tšoaneng bao ho buuoang ka bona ka Bibeleng, bao u ka latelang mohlala oa bona.

Bibele ea u phehella: “Fumana bohlale, fumana kutloisiso.” (Liproverbia 4:5) Mantsoe a reng “bohlale” le “kutloisiso” a bolela ho fetang feela ho tseba se nepahetseng le se fosahetseng. U lokela ho utloisisa lintlha tsohle tse amehang. Ka mohlala, ho tseba liphello tsa ho etsa ntho e itseng e fosahetseng hammoho le meputso ea ho etsa se nepahetseng ho tla u thusa hore u be sebete ha u sebetsana le khatello ea lithaka.

Kholiseha ka sena: Le hoja ho ka bonahala eka mathata a hao a maholo haholo, e ntse e le a tloaelehileng. Ba bang ba kile ba tobana le mathata a tšoanang le a hao ’me ba sebetsana le ’ona ka katleho. Le uena u ka khona! Bala ka botlalo buka ena e reng Lipotso—Bacha Baa Bocha—Likarabo Tse Sebetsang, Buka ea 2. E tla u kholisa hore Bibele e na le keletso e molemo ka ho fetisisa eo u ka e fumanang!

[Mongolo o botlaaseng ba leqephe]