Ka la 11 March, 1792, makhoba a makholo a lokolotsoeng Amerika a ile a bokana tlas’a Sefate sena sa K’hothone e le ha a ikhopotsa ho khutlisetsoa Afrika. Letsatsing leo a ile a theha motse oa Freetown oo lebitso la oona le hlalosang tšepo eo esaleng a e-na le eona. Makhoba a lokolotsoeng a ile a ’na a fihla ho fihlela motse oo o tletse merabe ea Maafrika e fetang 100. Baahi bana ba bacha ba ile ba nka hore Sefate seo sa K’hothone ke letšoao la tokoloho le tšepo.

E se e ka ba lilemo tse 100 Lipaki Tsa Jehova tsa Sierra Leone li tšelisa baahelani ba tsona ka tšepo ea tokoloho e fetang eo hōle—e leng “tokoloho e khanyang ea bana ba Molimo.” (Bar. 8:21) Tokoloho ena e tla ba lokolla sebeng le lefung ha ’Muso oa Molimo oa Bomesia o tlisa khotso le Paradeise lefatšeng.—Esa. 9:6, 7; 11:6-9.

Ofisi ea lekala ea Lipaki Tsa Jehova ea Sierra Leone e ’nile ea hlokomela mosebetsi oa boboleli o etsoang naheng ea Guinea ka lilemo tse 50. Naha ena ea boahelani e ’nile ea thulana le mathata a lipolotiki, a sechaba le a moruo, a ileng a susumelletsa baahi ba eona ba bangata hore ba amohele molaetsa o khothatsang oa Bibele.

Lipaki Tsa Jehova tsa Sierra Leone le Guinea li ’nile tsa phatlalatsa litaba tse molemo ho sa tsotellehe litšitiso tse ngata tseo li ileng tsa tobana le tsona. Litšitiso tsena li akarelletsa ho phela ka thata, bofutsana, ho se tsebe ho bala le ho ngola, litloaelo tse metseng ka metso, ho se utloane ha merabe le pefo e nyarosang. Tlaleho e latelang e fana ka bopaki ba tumelo e sa thekeseleng le boinehelo ba bahlanka bana ba tšepahalang ba Jehova. Re tšepa hore tlaleho ea bona e tla ama pelo ea hao ’me e matlafatse tumelo ea hao ho “Molimo ea fanang ka tšepo.”—Bar. 15:13.