Naha Linaheng tsena ka bobeli ho na le mekhoabo, libaka tse sabaletseng, lithota tse lenngoeng le lithaba tse phahameng. Guinea ho na le mohloli oa linōka tse tharo tse khōlō tsa Afrika Bophirimela—e leng Gambia, Niger le Senegal.

Batho Morabe oa Mende le oa Temne ke eona e meholo ka ho fetisisa merabeng e 18 ea Sierra Leone. Boholo ba Makrio—e leng litloholo tsa makhoba a Maafrika a lokolotsoeng—bo lula Freetown. Guinea e na le merabe e fetang 30, e meholo ka ho fetisisa ke ea Fulani, Mandingo le Susu. *

 Bolumeli Batho ba Sierra Leone ba ka etsang liphesente tse 60 ke Mamosleme; ba bang ba ipolela hore ke Bakreste. Hoo e ka bang liphesente tse 90 tsa batho ba Guinea ke Mamosleme. Batho ba bangata linaheng tsena ka bobeli ke litho tsa malumeli a setso sa Afrika.

Puo Morabe ka mong o na le puo ea oona. Sekrio ke eona puo e tloaelehileng ea Sierra Leone—e kopantse Senyesemane, lipuo tsa Europe le tsa Afrika. Puo e tloaelehileng ea Guinea ke Sefora. Batho ba ka etsang liphesente tse 60 naheng ka ’ngoe ha ba tsebe ho bala le ho ngola.

Mokhoa oa Boipheliso Batho ba bangata ba iphelisa ka temo. Taemane e ka ba halofo ea lihlahisoa tsa Sierra Leone tse romelloang linaheng tse ling. Guinea ke e ’ngoe ea linaha tse nang le merafo e meholo ka ho fetisisa ea alominiamo lefatšeng lohle.

Lijo Batho ba tloaetse ho re, “Ha ke sa ja raese, ho tšoana le ha ke sa ja.” Fufu, e leng cassava e phehiloeng ka metsi e tuloang ho fihlela e e-ba hlama e thata e atisa ho jeoa ka nama, moroho o bitsoang okra le moro o bolila.

Tlelaemete Hoa chesa ebile ho mongobo lebōpong. Ho pholile libakeng tse phahameng. Nakong eo pula e sa neng haholo, moea oa Sahara o bitsoang harmattan, o foka ka matsatsi-tsatsi, o etsa hore ho phole ho be ho tlale lerōle.