Juana Ventura o qalile ho ithuta Bibele nakong eo mosebetsi oa boboleli o neng o thibetsoe, ’me a kolobelletsoa Nōkeng ea Ozama ka 1960. Ka lekhetlo le leng, moruti oa kereke ea evangeli e Santo Domingo o ne a batla hore a koalloe teronkong kaha o ne a re o mo “nkela batho.” Moruti eo o ile a leka ho bontša hore Lipaki Tsa Jehova li leshano le hore Juana ha a tsebe seo a se etsang, eaba o mo memela kerekeng ea hae hore a e’o mo hloma lipotso ka bolumeli ba hae bo bocha.

Juana o re: “O ile a mpotsa a re, ‘Ke hobane’ng ha le sa voute? Ke hobane’ng ha le sa kene sesoleng? Ke hobane’ng ha le ipitsa Lipaki Tsa Jehova?’ Ha ke ntse ke araba lipotso tsena batho ba neng ba tlile kerekeng ba ne ba phetla litemana Libibeleng tsa bona ’me ba makatsoa ke tsela  eo Bibele e arabang lipotso tseo ka eona. Boholo ba bona ba ile ba elelloa hore ba fumane ’nete. Kaofela ba qala ho ithuta Bibele, qetellong ba 25 ba inehela.” Ka lebaka leo, bahoeletsi ba Santo Domingo ba ile ba eketseha.

Ho ile ha e-ba le mathata a mangata a lipolotiki ka mor’a hore Trujillo a fenethoe. Buka ea Selemo ea 1963 (ea Senyesemane) e re: ‘Masole a ne a ema literateng, baahi ba etsa mekoloko ea boipelaetso ’me batho ba iketsetsa borata.’ Ho sa tsotellehe merusu ena ea lipolotiki, mosebetsi oa ho bolela le ho ruta o ne o ntse o tsoela pele, ’me qetellong ea selemo sa 1963, palo ea bahoeletsi e ile ea e-ba 1 155.

Ha Nathan Knorr oa ntlo-khōlō a etela Dominican Republic ka 1962, o ile a lokisetsa hore ho rekoe setša e le hore ho hahoe mehaho e meholoanyane kaha mosebetsi oa boboleli o ne o ntse o eketseha. Ho ile ha hahoa mohaho oa mekato e ’meli le Holo ea ’Muso setšeng seo se secha. Ka Moqebelo oa la 12 October, 1963, Frederick Franz o ile a nehela mehaho eo e mecha ea lekala. Ho ne ho hlakile hore Lipaki Tsa Jehova li ikemiselitse ho lula Dominican Republic. Nakoana ka mor’a hore mehaho eo e neheloe, Harry le Paquita Duffield ba ile ba fihla ba tsoa Cuba moo ba neng ba lelekiloe.

Ka la 24 April, 1965, naha e ile ea harasanngoa ke ntoa ha ’muso o phetholoa ka likhoka. Har’a maqakabetsi ao, batho ba Jehova ba ile ba tsoela pele ka mosebetsi oa bona. Ka 1970, ho ne ho e-na le bahoeletsi ba 3 378 liphuthehong tse 63. Ba fetang halofo ba ne ba kene ka phuthehong ho tloha ka 1965. Buka ea Selemo ea 1972  (ea Senyesemane) e re: “Batho ba mefuta eohle ba ile ba bokana hammoho ka lebaka la ho rata ’nete le ho rata Jehova, ’me ba ne ba akarelletsa bo-mak’henike, lihoai, bakhanni, lihahi, babetli, liakhente, lingaka le bao e neng e le bo-ralipolotiki.”