Bajuda ba ne ba keteka Paseka selemo se seng le se seng ka la 14 khoeling ea Nisane. E ne e le hore ba hopole kamoo Jehova a ileng a ba thusa hore ba lokolloe Egepeta kateng ’me a ba isa Lefatšeng leo ba neng ba le tšepisitsoe. Ka selemo sa 33 mehleng ea Kreste, Jesu le barutuoa ba hae ba ile ba keteka Paseka Jerusalema, ka kamoreng e ka holimo ea ntlo. Ha ba qeta ho ja, Jesu o ile a re ho bona: ‘E mong oa lona o tl’o nthekisa.’ Baapostola ba ne ba maketse ’me ba botsa Jesu ba re: ‘Ke mang?’ Jesu a re: ‘Ke eo ke tla mo fa bohobe bona.’ Eaba o fa Judase Iskariota bohobe. Hang-hang, Judase a ema ’me a tsamaea.

Jesu o ile a rapela. Ka mor’a moo a fa baapostola ba hae bohobe. A re ho bona: ‘Jang bohobe bona. Bo emela ’mele oa ka oo ke tla fana ka oona bakeng sa ‘lona.’ Ka mor’a moo a rapella veine ’me a e fa baapostola ba hae. Eaba Jesu o re: ‘Noang veine ena. E emela mali a ka ao ke tla fana ka ’ona e le hore libe tsa lona li ka tšoareloa. Kea le tšepisa hore le tla ba marena hammoho le ’na leholimong. Etsang sena selemo le selemo ho nkhopola.’ Barutuoa ba Jesu ba ntse ba kopana mantsiboeeng a la 14 Nisane selemo le selemo. Na oa tseba hore na ketsahalo ee e bitsoa’ng? E bitsoa Lijo Tsa Shoalane Tsa Morena.

 Ka mor’a ho ja, baapostola ba neng ba setse ba ile ba pheha khang ka hore na e moholo ke mang. Empa Jesu o ile a re ho bona: ‘Ea inkang e le e monyenyane har’a lona ke eena e moholo.’

‘Le metsoalle ea ka. Ke le bolella ntho e ’ngoe le e ’ngoe eo Ntate a batlang hore ke le bolelle eona. Haufinyane ke tla ea ho Ntate leholimong. Le tla sala mona ’me batho ba tla tseba hore le barutuoa ba ka haeba le ratana. Le lokela ho ratana feela joalokaha ke le rata.’

Qetellong, Jesu o ile a rapela ’me a kopa Jehova hore a sireletse barutuoa ba hae bohle. A boela a mo kopa hore a ba thuse ho sebetsa hammoho ka khotso. A rapella hore lebitso la Jehova le halaletsoe. Ka mor’a moo, Jesu le baapostola ba hae ba binela Jehova ’me ba tsoela ka ntle. Nako ea hore Jesu a tšoaroe e ne e se e le haufi.