Karolong ena re tl’o ithuta ka bacha, baprofeta le marena a ileng a bontša ka tsela e ikhethang hore a tšepa Jehova. Naheng ea Syria, ho ne ho e-na le ngoananyana oa Moiseraele ea neng a lumela hore moprofeta oa Jehova a ka folisa Naamane. Moprofeta Elisha o ne a tšepa ka ho feletseng hore Jehova o tla mo sireletsa ho ba lireng. Moprista ea Phahameng Jehojada o ile a ipeha kotsing e le hore a sireletse Joase ho nkhono oa hae ea khopo ea bitsoang Athalia. Morena Ezekiase o ne a lumela hore Jehova o tla sireletsa Jerusalema. Kahoo, a hana ho inehela ho Baassyria. Morena Josiase o ile a felisa borapeli ba litšoantšo naheng ea habo, a tsosolosa tempele ’me a thusa sechaba sa habo hore se khutlele borapeling ba ’nete.