Batho ba motse oa Ninive ba ne ba le khopo. Jehova o ile a re moprofeta Jonase a ee Ninive ’me a lemose batho hore ba lokela ho fetola litsela tsa bona. Empa Jonase a baleha a leba hosele. A kena sekepeng se lebang Tarshishe.

Ha sekepe se ntse se tsamaea, ha tsoha moea o matla leoatleng ’me batsamaisi ba sekepe ba tšoha. Ba rapela melimo ea bona, ba re: ‘Ke hobane’ng ha re etsahalloa ke ntho ee?’ Qetellong, Jonase a re ho bona: ‘Ke ka lebaka la ka. Ha ke ee moo Jehova a itseng ke ee teng. Ntiheleng ka leoatleng ’me moea o tla emisa.’ Batsamaisi ba sekepe ba ne ba sa batle ho lahlela Jonase ka leoatleng, empa a ba phehella. Kahoo, ba mo lahlela ka leoatleng, eaba moea oa emisa.

Jonase o ne a nahana hore o tl’o shoa. Kahoo, a rapela Jehova ha a ntse a tebela tlaase leoatleng. Eaba Jehova o romela tlhapi e kholo. Ea koenya Jonase, empa ea se ke ea mo bolaea. Ha Jonase a le ka har’a tlhapi eo, a rapela Jehova a re: ‘Kea u tšepisa hore ke tla u mamela kamehla.’ Eaba Jehova o sireletsa Jonase. Kahoo, a qeta matsatsi a mararo a le ka har’a tlhapi eo. Ka mor’a moo tlhapi eo ea mo hlatsetsa moo ho ommeng.

Empa na kaha joale Jehova o ne a pholositse Jonase, ho ne ho se ho sa hlokahale hore a ee Ninive? Che. Jehova o ile a boela a bolella Jonase hore a ee. Lekhetlong lena, Jonase o ile a mamela. A ea Ninive  ’me a bolella batho ba moo ba khopo, a re: ‘Ho setse matsatsi a 40 feela pele Ninive e timetsoa.’ Eaba ho etsahala ntho e ’ngoe e neng e sa lebelloa: Baninive ba mamela ’me ba fetola litsela tsa bona. Morena oa Ninive a re ho batho ba hae: ‘Rapelang Molimo ’me le bake. Mohlomong o tla re hauhela.’ Kahoo, ha Jehova a bona hore ba bakile, ha aa ka a felisa motse oo oa Ninive.

Jonase a utloa bohloko haholo hobane motse oo o sa felisoa. Ak’u nahane feela: Jehova o ile a mamella Jonase a ba a mo bontša mohau, empa Jonase eena o ne a sa hauhele batho ba Ninive. Ho e-na le ho ba utloela bohloko, o ile a lula tlas’a moriti oa semela sa mohope ka ntle ho motse, a koatile. Eaba semela seo sea shoa ’me Jonase a utloa bohloko haholo. Eaba Jehova o re ho eena: ‘U tsotella semela sena ho feta kamoo u tsotellang Baninive kateng. Ke ba hauhetse ’me ha kea ba felisa.’ O ne a bolela’ng? O ne a bolela hore batho ba Ninive ke ba bohlokoa ho feta semela leha e le sefe.