THUTO EA 13
Timothea o ne a Batla ho Thusa Batho
Timothea e ne e le mohlankana ea neng a thabela ho thusa batho. O ne a tsamaea libaka tse ngata a thusa batho. Ka lebaka la ho etsa sena, o ne a phela hamonate. Na u ka rata ho ithuta ka bophelo ba Timothea?—
’Mè oa Timothea le nkhono oa hae ba ile ba mo ruta ka Jehova
O hōletse motseng o bitsoang Lystra. Ha a ne a sa le monyenyane, nkhono oa hae Loise le ’mè oa hae Eunise, ba ile ba mo ruta ka Jehova. Ha Timothea a ntse a hōla, o ne a batla ho thusa batho hore ba ithute ka Jehova.
Ha Timothea e sa le mohlankana, Pauluse o ile a re a ee le eena libakeng tse ling e le hore ba rute batho ka Jehova. Timothea o ile a lumela. O ne a batla ho tsamaea hobane o ne a batla ho thusa batho.
Timothea o ile a tsamaea le Pauluse ’me ba fihla motseng oa Macedonia o bitsoang Thesalonika. E le hore ba fihle moo ba ile ba tlameha ho tsamaea ka maoto nako e telele ebe ba palama sekepe. Ha ba fihla moo, ba ile ba ruta batho ba bangata ka Jehova. Empa batho ba bang ba ile ba halefa ’me ba ne ba batla ho ba ntša kotsi. Kahoo Pauluse le Timothea ba ile ba tloha ’me ba ea libakeng tse ling.
Timothea o ne a phela hamonate a bile a thabile
Likhoeli tse ’maloa ka mor’a moo, Pauluse o ile a kōpa Timothea hore a khutlele Thesalonika ’me a bone hore na barab’abo rōna ba ntse ba e-ea joang. Ho ne ho hlokahala hore motho a be sebete haholo ha a khutlela motseng oo hobane o ne o le kotsi! Empa Timothea o ile a ea hobane o ne a tšoenyehile ka barab’abo rōna ba moo. O ile a khutla a tšoaretse Pauluse litaba tse monate. Barab’abo ba Thesalonika ba ne ba e-ea hantle!
Timothea o ile a sebetsa le Pauluse ka lilemo tse ngata. Pauluse o ile a ngola hore Timothea e ne e le eena motho ea ka mo romelang ho thusa liphutheho. Timothea o ne a rata Jehova ’me o ne a rata le batho.
Na u rata batho ’me u batla ho ba thusa hore ba ithute ka Jehova?— Haeba ho joalo, u ka phela hamonate u bile u thabile joaloka Timothea!
