1-3. Petrose o ile a bona ketsahalo efe letsatsing leo, hona ho ile ha etsahala’ng bosiung boo?

PETROSE o ile a soka sekepe ka matla, a shebisisa har’a lefifi. Na ebe khanya e lerootho eo a neng a e bona ka bochabela moo mahlo a hae a fellang teng e ne e le pontšo ea hore mafube a se a tla hlaha? Mahetla a hae le mokokotlo li ne li opa ka lebaka la ho soka sekepe lihora tse ngata. Moea o matla o neng o hlanthollotse moriri oa hae o ne o entse hore Leoatle la Galilea le befe. Nako le nako maqhubu a ne a otla karolo e ka pele ea sekepe seo sa batšoasi ba litlhapi ’me o ne a koloba ha a ntse a hasoa ke metsi ao a batang. O ile a ’na a tsoela pele ho soka.   

² Petrose le ba nang le eena ba ne ba siile Jesu kae-kae, morao koana lebōpong la leoatle. Letsatsing leo, ba ne ba bone ha Jesu a fepa letšoele la batho ba lapileng ba likete ka mahobe a ’maloa le litlhapi tse seng kae. Ha batho ba bona seo, ba ile ba batla ho etsa Jesu morena, empa o ne a sa batle ho kena lipolotiking. O ne a boetse a ikemiselitse ho thusa balateli ba hae hore ba se ke ba lakatsa ho kena lipolotiking. E le hore a tlohe letšoeleng leo, o ile a susumelletsa barutuoa ba hae hore ba palame sekepe ’me ba lebe lebōpong le ka mose oane, ha eena a nyolohela thabeng a le mong ho ea rapela.—Mar. 6:35-45; bala Johanne 6:14-17.

³ Khoeli e neng e batla e tolokile e ne e le ka holim’a lihlooho tsa barutuoa nakong eo ba neng ba kena sekepeng; ’me joale e ne e se e likella ka bophirimela butle-butle. Empa ba ne ba khonne ho tsamaea lik’hilomithara tse ’maloa feela. Mokhathala hammoho le molumo o lerata oa moea o fokang le oa maqhubu a leoatle, li ne li ba thatafalletsa ho qoqa. Ho ka etsahala hore ebe kelello ea Petrose e ne e se mona le mona.

4. Ke hobane’ng ha Petrose e le mohlala o motle oo re ka o etsisang?

 ⁴ Ho ne ho e-na le lintho tse ngata hakaakang tseo a neng a ka nahana ka tsona! E ne e se e le lilemo tse peli Petrose a tsamaea le Jesu oa Nazaretha ’me ho ne ho etsahetse lintho tse ngata. O ne a ithutile lintho tse ngata empa ho ne ho sa na le tse ngata tseo a lokelang ho ithuta tsona. Boikemisetso ba hae ba ho loantša lintho tse ka mo sitisang tse kang lipelaelo le tšabo—bo etsa hore e be mohlala o ikhethang oo re ka o etsisang. A re ke re bone hore na joang.

5, 6. Petrose o ne a phela bophelo bo joang?

⁵ Petrose a ke ke a lebala letsatsi leo a ileng a kopana le Jesu ka lona. Mor’abo, Andrease, o ile a mo tlisetsa litaba tsena tse hlollang: “Re fumane Mesia.” Ka mor’a ho utloa mantsoe ao, bophelo ba Petrose bo ile ba qala ho fetoha. Bo ne bo ke ke ba hlola bo tšoana le pele.—Joh. 1:41.

⁶ Petrose o ne a lula Kapernauma, e leng motse o iphaphathileng ka lebōpo la letša la metsi a seng letsoai le bitsoang Leoatle la Galilea. Eena le mor’abo, Andrease, ba ne ba kopanetse khoebo ea ho tšoasa litlhapi le Jakobo le Johanne, e leng bara ba Zebedea. Petrose o ne a sa lule le mofumahali oa hae feela, empa o ne a boetse a lula le mohoehali oa hae hammoho le mor’abo, Andrease. Ho hlakile hore ho hlokomela lelapa le lekaalo ka ho tšoasa litlhapi ho ne ho hloka hore motho a sebetse ka thata, a be matla ’me a be a khone ho sebetsana le mathata. Re ka inahanela masiu a mangata a malelele ao ba neng ba sebetsa ka thata ka ’ona, ba lahlela matlooa pakeng tsa likepe tse peli ebe ba hulela litlhapi leha e le life tseo ba li tšoasitseng ka likepeng. Re ka boela ra nahana ka mosebetsi o thata oo ba neng ba o etsa motšehare, ha ba hlopha litlhapi ka mefuta ea tsona, ba li rekisa, ba lokisa matlooa le ho a hloekisa.

7. Ke’ng seo Petrose a ileng a se utloa ka Jesu, hona ke hobane’ng ha tseo e ne e le litaba tse thabisang?

⁷ Bibele e re bolella hore Andrease e ne e le morutuoa oa Johanne Mokolobetsi. Ka sebele Petrose o ne a ile a mamela ka cheseho ha mor’abo a ntse a mo phetela molaetsa oa Johanne. Ka letsatsi le leng Andrease o ile a bona Johanne a supa Jesu oa Nazaretha ’me a re: “Bonang, Konyana ea Molimo!” Hang-hang Andrease e ile ea e-ba molateli oa Jesu ’me a bolella Petrose litaba tsena tse thabisang: Mesia o fihlile! (Joh. 1:35-40) Ka mor’a borabele bo ileng ba e-ba teng Edene lilemo tse ka bang 4 000 pele ho moo, Jehova Molimo o ile a tšepisa hore ho ne ho tla tla motho ea ikhethang ho tla fa moloko oa batho tšepo ea sebele. (Gen. 3:15) Andrease o ne a kopane le Mopholosi enoa, Mesia ka boeena! Petrose le eena o ile a potlakela ho ea kopana le Jesu.

8. Lebitso leo Jesu a ileng a le reha Petrose le ne le bolela’ng, hona ke hobane’ng ha batho ba bang ba ntse ba belaella lebitso leo?

⁸ Nakong eo, Petrose o ne a tsebahala ka lebitso la Simone, kapa Simeone. Empa Jesu o ile a mo sheba ’me a re: “‘U Simone mora oa  Johanne; u tla bitsoa Kefase’ (e fetoleloang e le Petrose).” (Joh. 1:42) “Kefase” ke lentsoe le bolelang “lejoe,” kapa “lefika.” Kamoo ho bonahalang kateng, Jesu o ne a profeta ho itseng ka mantsoe ana. O ile a bona hore Petrose o ne a tla tšoana le lefika—o ne a tla ba le tšusumetso e matla, e sa sisinyeheng ’me o ne a tla tšepahala har’a balateli ba Kreste. Na Petrose o ne a ipona ka tsela eo? Ha ho bonahale joalo. Esita le babali ba bang ba Likosepele mehleng ena ha ba nke hore Petrose e ne e le lefika. Ba bang ba bile ba re ho latela kamoo Bibele e mo hlalosang kateng, o bonahala e le motho ea sa tsitsang, ea feto-fetohang le ea sa tsebeng moo a emeng teng.

9. Jehova le Mor’a hae ba batla’ng ho rōna, hona u nahana hore ke hobane’ng ha re lokela ho tšepa tsela eo ba re talimang ka eona?

⁹ Ke ’nete hore Petrose o ne a e-na le mefokolo e itseng. Jesu o ne a tseba mefokolo eo. Empa joaloka Ntate oa hae, Jehova, Jesu o ne a lula a batla litšobotsi tse ntle ho batho. Jesu o ile a hlokomela hore Petrose o ne a e-na le litšobotsi tse ngata tse ntle ’me O ne a batla ho mo thusa hore a ntlafatse litšobotsi tseo. Le kajeno, Jehova le Mora oa hae ba batla litšobotsi tse ntle ho rōna. Ho ka ’na ha e-ba thata ho lumela hore ho na le litšobotsi tse ntle tseo ba ka li fumanang ho rōna. Empa re lokela ho tšepa tsela eo ba re talimang ka eona ’me re bontše hore re ikemiselitse ho koetlisoa le ho bōptjoa joaloka Petrose.—Bala 1 Johanne 3:19, 20.

10. E ka ’na eaba Petrose o ile a bona lintho life, empa ho ntse ho le joalo o ile a khutlela hokae?

¹⁰ E ka ’na eaba ka mor’a moo Petrose o ile a tsamaea le Jesu ho se hokae ha a ntse a bolella batho litaba tse molemo. Ka hona, e ka ’na eaba o ile a bona ha Jesu a etsa mohlolo oa pele, a fetola metsi veine moketeng oa lenyalo motseng oa Kana. Ntho ea bohlokoa haholo ke hore o ile a utloa molaetsa oa Jesu o babatsehang le o fanang ka tšepo o buang ka ’Muso oa Molimo. Ho ntse ho le joalo, o ile a tlohela Jesu ’me a khutlela khoebong ea hae ea ho tšoasa litlhapi. Leha ho le joalo, likhoeli tse ’maloa hamorao Jesu o ile a boela a bua le Petrose—lekhetlong lena a mo kōpa hore e be molateli oa hae bophelo bohle ba hae.

11, 12. (a) Mosebetsi oa Petrose o ile oa e-ba joang bosiung boo? (b) E ka ’na eaba Petrose o ile a ipotsa lipotso life ha a ntse a mametse Jesu?

¹¹ Petrose o ne a sa tsoa nyahamisoa ke mosebetsi bosiung bo fetileng. Batšoasi ba litlhapi ba ne ba ile ba lahlela matlooa ka makhetlo a mangata ka leoatleng, empa ba sa tšoase letho. E tlameha ebe Petrose o ile a sebelisa bokhoni bohle boo a neng a e-na le bona le ho leka makhobonthithi ’ohle, a ea libakeng tse sa tšoaneng letšeng e le hore a fumane moo litlhapi li jang teng. Ha ho pelaelo hore joaloka batšoasi ba bang ba bangata, ka linako tse ling o ne a ikutloa eka a ka khona ho bona ho phunyelletsa metsing ao a lukehileng e le hore a fumane moo ho nang le litlhapi tse ngata teng, kapa a lakatse eka matlooa a hae a ka tšoasa litlhapi ka mohlolo. Ho hlakile hore menahano e joalo e ne e tla  mo nyotobetsa le ho feta. Petrose o ne a sa tšoase litlhapi ho itlosa bolutu; e ne e le mosebetsi oa hae. Qetellong, o ile a fihla lebōpong a sa tšoasa letho. Matlooa ’ona a ne a lokela ho hloekisoa. Ka hona, o ne a phathahane nakong eo ka eona Jesu a tlang ho eena.

¹² Letšoele le ne le pota-potile Jesu le labalabela ho utloa eng kapa eng eo a e buang. Kaha le ne le mo hometse, Jesu o ile a kena ka sekepeng sa Petrose ’me a mo kōpa hore a se ise harenyana metsing. Jesu o ile a ruta letšoele leo ’me metsi a ne a etsa hore lentsoe la hae le utloahale ka ho hlaka. Petrose o ile a mamela ka hloko joaloka letšoele leo le neng le le lebōpong. Ho ne ho se mohla a tenoang ke ho mamela ha Jesu a bua ka ntho e ka sehloohong eo a neng a ruta ka eona—e leng ’Muso oa Molimo. E ne e ka ba tlotla e khōlō hakaakang hore a thuse Kreste ho bolela molaetsa ona o fang batho tšepo naheng eohle! Empa na ebe e ne e le ntho e ka etsahalang? Petrose o ne a tla hlokomela lelapa la hae joang? Mohlomong Petrose o ile a nahana hape ka bosiu boo bo bolelele boo a ileng a bo qeta a sa tšoasa letho.—Luka 5:1-3.

13, 14. Jesu o ile a etsetsa Petrose mohlolo ofe, hona Petrose o ile a etsa’ng?

¹³ Ha Jesu a qeta ho bua, o ile a re ho Petrose: “Se hulele moo ho tebileng, ’me le theolele matlooa a lōna tlaase hore le tšoase.” Petrose o ne a belaela. O ile a re: “Morupeli, re sehlile bosiu bohle ’me ra se ke ra tšoasa letho, empa ka taelo ea hao ke tla theola matlooa.” Petrose o ne a qeta ho hlatsoa matlooa. Kahoo ho hlakile hore o ne a sa batle ho akhela matlooa hape—haholo-holo nakong ena eo litlhapi li sa jeng ka eona! Leha ho le joalo, o ile a mamela, mohlomong a ba a hoehla bo-mphato’a hae ba ka sekepeng se seng hore ba mo sale morao.—Luka 5:4, 5.

¹⁴ Ha a qala ho hula matlooa, Petrose o ile a utloa boima boo a neng a sa bo lebella. A sa lumele, o ile a hula ka matla le ho feta ’me ho e-s’o ee kae a bona boieane ba litlhapi tse ntseng li nyeunya ka letlooeng! Ka lehlaphahlapha, a hoehla banna ba sekepe sa bobeli hore ba tl’o mo thusa. Ha ba ntse ba mo thusa, ka potlako ho ile ha bonahala hore litlhapi tseo li ne li ke ke tsa fella ka sekepeng se le seng. Ba ile ba tlatsa likepe tseo ka bobeli, empa le teng litlhapi li ne li le ngata hoo likepe li ileng tsa qala ho teba ka lebaka la boima. Petrose o ile a tsota ka ho makala ho hoholo. O ne a ile a bona ha Kreste a sebelisa matla a hae pele ho moo, empa lekhetlong lena mohlolo ona o ne o mo ama ka ho toba. Monna enoa o ne a ka etsa hore le litlhapi li kene ka matlooeng! Petrose o ile a qala ho tšoha. A oa ka mangole ’me a re: “Morena, tloha ho ’na, hobane ke monna ea nang le sebe.” Ho hang o ne a ikutloa a sa tšoaneloe ke ho tloaelana le Motho ea nang le bokhoni ba ho sebelisa matla a Molimo ka litsela tse joalo!—Bala Luka 5:6-9.

15. Jesu o ile a ruta Petrose joang hore ha ho utloahale hore a be le lipelaelo le tšabo?

 ¹⁵ Ka mosa Jesu o ile a re: “Khaotsa ho ba le tšabo. Ho tloha joale ho ea pele u tla tšoasa batho ba phela.” (Luka 5:10, 11) Ena e ne e se nako ea ho belaela kapa ho tšoha. Petrose o ne a se na lebaka la ho ba le lipelaelo ka liketsahalo tsa letsatsi le letsatsi tse kang ho tšoasa litlhapi; ebile ho ne ho se na lebaka la hore a tšohe mefokolo ea hae kapa liphoso tsa hae. Jesu o ne a e-na le mosebetsi o moholo oo a neng a lokela ho o etsa, o neng o tla tlisa liphetoho tse khōlō molokong oa batho. O ne a sebeletsa Molimo ea neng a “tla tšoarela ka tsela e khōlō.” (Esa. 55:7) Jehova o ne a tla fa Petrose lintho tseo a li hlokang, ebang ke tsa nama kapa tsa moea.—Mat. 6:33.

16. Petrose, Jakobo le Johanne ba ile ba etsa’ng ha Jesu a ba mema, hona ke hobane’ng ha eo e ne e le qeto e molemo ka ho fetisisa?

¹⁶ Petrose o ile a amohela kōpo ea Jesu ka potlako, joaloka Jakobo  le Johanne. Ba ile “ba khutlisetsa likepe tseo moo ho omileng, ’me ba tlohela ntho e ’ngoe le e ’ngoe eaba baa mo latela.” (Luka 5:11) Petrose o ile a ba le tumelo ho Jesu hammoho le ho eo A mo romileng. E ne e le qeto e molemo ka ho fetisisa eo a neng a ka e etsa. Kajeno Bakreste ba hlōlang tšabo le lipelaelo tseo ba nang le tsona e le hore ba sebeletse Molimo, ba bontša tumelo e tšoanang. Ha ho mohla ho tšepa Jehova ka tsela e joalo e leng tšenyo ea nako.—Pes. 22:4, 5.

17. Ke lintho life tseo Petrose a neng a li hopola lilemo tse peli ka mor’a hore a kopane le Jesu?

¹⁷ Hoo e ka bang lilemo tse peli ka mor’a hore Petrose a kopane le Jesu, o ile a soka sekepe bosiu moeeng o matla o neng o foka Leoatleng la Galilea, joalokaha ho boletsoe selelekeleng sa khaolo ena. Ke ’nete hore re ke ke ra tseba hore na o ne a ntse a nahana’ng ka nako eo. Ho ne ho e-na le lintho tse ngata haholo tseo a neng a ka nahana ka tsona! Jesu o ile a folisa mohoehali oa Petrose. O ile a fana ka Thuto ea Thabeng. Nako le nako o ne a ile a bontša ka seo a se rutang le ka liketso tsa hae tse matla hore ke Ea Khethiloeng ke Jehova, e leng Mesia. Ha likhoeli li ntse li feta, Petrose o ne a se a khona ho laola tšabo le lipelaelo tseo a neng a e-na le tsona. Jesu o ne a bile a mo khethile hore e be e mong oa baapostola ba 12! Empa e ne e le hona Petrose a tla bona hore o ne a e-s’o hlōle tšabo eo a neng a e-na le eona le lipelaelo ka ho feletseng.

18, 19. (a) Hlalosa seo Petrose a ileng a se bona Leoatleng la Galilea. (b) Jesu o ile a arabela kōpo ea Petrose joang?

¹⁸ Bosiung boo, nakong ea tebelo ea bone, kapa hoo e ka bang ho tloha ka hora ea boraro hoseng ho fihlela ha letsatsi le chaba, Petrose o ile a emisa ho soka sekepe ka tšohanyetso eaba o lula a otlolohile. Pejana mane—ka nģ’ane ho maqhubu—ho ne ho e-na le ntho e ntseng e sisinyeha! Na ebe e ne e le ho benya ha metsi a hasanang a maqhubu tlas’a khanya ea khoeli? Che, ntho ena e ne e tsitsitse ebile e otlolohile. E ne e le motho! Ka sebele e ne e le motho, a bile a tsamaea holim’a metsi leoatleng! Ha motho enoa a ntse a atamela, ho ne ho bonahala eka o tla ba feta. Barutuoa ba ile ba tšoha ’me ba nahana hore ke pono e itseng ea mohlolo. Motho eo o ile a bua, a re: “E-bang sebete, ke ’na; le se ke la tšaba.” E ne e le Jesu!—Mat. 14:25-28.

¹⁹ Petrose o ile a re: “Morena, haeba ke uena, ntaele hore ke tle ho uena holim’a metsi.” Qalong o ne a le sebete. A hloletsoe ke mohlolo ona o ikhethang, Petrose o ile a batla hore tumelo ea hae e tiee le ho feta. O ne a batla ho ba karolo ea mohlolo ona. Ka mosa, Jesu o ile a mo laela hore a tle. Petrose o ile a theoha sekepeng ’me a hata holim’a maqhubu a leoatle. U se u ka inahanela hore na Petrose o ile a ikutloa joang ha a hata moo ho tiileng holim’a metsi. E tlameha ebe o ne a hloletsoe ha a ea a lebile ho Jesu. Leha ho le joalo, tsela eo a neng a ikutloa ka eona e ile ea fetoha ka potlako.—Bala Matheu 14:29.

20. (a) Petrose o ile a hlōleha ho tsepamisa kelello joang, hona phello ea seo e ile ea e-ba efe? (b) Jesu o ile a ruta Petrose thuto efe ea bohlokoa?

 ²⁰ Petrose o ne a tlameha ho lula a tsepamisitse kelello ea hae ho Jesu. Ka matla a Jehova, Jesu ke eena ea neng a etsa hore Petrose a tsamaee holim’a maqhubu. Hape Jesu o ne a etsa seo ka lebaka la tumelo eo Petrose a neng a e-na le eona ho eena. Empa Petrose o ile a itebala. Rea bala: “Ha a sheba moea oa sefefo, a ba le tšabo.” Petrose o ile a sheba maqhubu ao ha a ntse a khahlellana sekepeng ’me metsi a betseha holimo le makoeba, eaba o otloa ke letsoalo. Mohlomong o ile a ipona a se a qoela letšeng leo, a khangoa ke metsi. Ha tšabo ea hae e ntse e eketseha, tumelo ea hae e ne e fokotseha. Motho ea neng a bitsoa Lefika ka lebaka la hore o ne a ka khona ho ema a tiile, o ile a qala ho teba joaloka lejoe ka lebaka la tumelo e fokolang. Petrose e ne e le sesesi, empa ka nako eo ha aa ka a tšepa bokhoni boo ba hae. O ile a re: “Morena, mpholose!” Jesu o ile a mo qhautsa ka letsoho ’me a mo nyolla. Eaba ha a ntse a le holim’a metsi, o ruta Petrose thuto ea bohlokoa, o re: “Uena ea nang le tumelo e nyenyane, ke hobane’ng ha u ile ua itesella ho belaela?”—Mat. 14:30, 31.

21. Ke hobane’ng ha ho le kotsi ho ba le lipelaelo, hona re ka li hlōla joang?

²¹ Mantsoe a reng “itesella ho belaela” ke a loketseng hakaakang! Pelaelo e ka ba chefo e timetsang. Haeba re e lumella, e ka fokolisa tumelo ea rōna ’me hanyane ka hanyane ra qetella re hloka tumelo. Re lokela ho loana ka thata! Joang? Ka hore re lule re tsepamisitse mehopolo linthong tse nepahetseng. Haeba re lula re nahana ka lintho tse re tšosang, tse re nyahamisang le tse re sitisang hore re sebeletse Jehova le Mora oa hae, re ka iphumana re e-ba le lipelaelo tse sa feleng. Empa haeba re tsepamisa mohopolo ho Jehova le Mora oa hae, ho seo ba se entseng, seo ba ntseng ba se etsa le seo ba tla se etsetsa batho bao ba ba ratang, re ke ke ra ba le lipelaelo tse ka senyang tumelo ea rōna.

22. Ke hobane’ng ha re lokela ho etsisa tumelo ea Petrose?

²² Ha Petrose a sala Jesu morao ho khutlela sekepeng, o ile a bona ha sefefo se kokobela. Leoatle la Galilea le ile la khutsa tu! Petrose le barutuoa-’moho le eena ba ile ba re: “Ka sebele u Mor’a Molimo.” (Mat. 14:33) Ha mafube a hlahella letšeng, e tlameha ebe Petrose o ile a tlala kananelo e khōlō. O ne a ithutile hore ke booatla ho lumella lipelaelo le tšabo. Ke ’nete hore thota e ne e sa namme ka pel’a hae pele e ka ba Mokreste ea kang lefika eo Jesu a ileng a mo bona esale pele. Empa o ne a ikemiselitse hore o tla lula a leka le ho ’na a ntlafatsa. Na le uena u ikemiselitse ho etsa joalo? U tla fumana hore tumelo ea Petrose ke mohlala o motle oo re ka o etsisang.