Pono ea Bibele

“Lipapali Tse Feteletseng”—Na U Lokela ho Ipeha Kotsing ka Tsona?

“MATSATSING ANA BA BANGATA BA RŌNA HA E SA LE BASHEBELLI FEELA EMPA BA ITSUBELLETSA KA BOBONA LIFOFANENG, BA LELEMELA HO THEOHA LITHABA KA LIROPO, BA CHALAMETSA LIPHORORONG KA LIKETSOANA TSE KOETSOENG LE HO ITAHLELA METSING HAMMOHO LE LISHAKA.”—KORANTA EA THE WILLOW GLEN RESIDENT.

MANTSOE ana a hlalosa tšekamelo e hōlang lipapaling. Ho ata ho ikhethang ha ho tloaeleha ha lipapali tse kang ho tsubella moeeng, ho hloa libaka tse nang le leqhoa, paragliding, hammoho le BASE jumping * ho bontša lefatše le khahloang ke ho ipeha kotsing. Liboto tsa ho thellisa lehloeng, libaesekele tse khonang ho tsamaea hohle, li-skateboard le li-rollerskate tse nang le mabili a fokolang le tsona li sebelisetsoa ho tlosa meeli ea seo motho a ka khonang ho se etsa ka ho ngoangoarela lithaba tse telele ka ho fetisisa, lilomo tse phahameng ka ho fetisisa, le ho tlōla libaka tse telele ka ho fetisisa. Joalokaha makasine ea Time e hlalosa, ho ata ha ho tloaeleha ha “lipapali tse feteletseng”—lipapali tseo ho tsona ba nkang karolo ba ipehang kotsing e khōlō—ho netefatsa ho labalabela ha ba limilione ho ba le karolo “lintšing tsa selomo sa tšoantšetso, moo kotsi, botsebi le tšabo li kopanang ho neha ba nkang karolo ka mafelo-beke feela hammoho le baatlelete ba litsebi ka ho tšoanang boikutlo ba ho tlosa meeli ea seo ba ka khonang ho se etsa.”

Leha ho le joalo, keketseho ena ea ho tloaeleha e boetse e tlisa litšenyehelo tsa botho tse phahameng. Batho ba bangata ba tsoa kotsi ha lipapali tseo ha ho bapisoa e leng tse seng kotsi li etsoa ka mokhoa o feteletseng. Selemong sa 1997 United States, palo ea ba tsoileng likotsi tse amanang le li-skateboard ba ileng ba tla phaposing ea kokelo ea tšohanyetso e ile ea phahama ka karolo e ka holimo ho 33 lekholong, ba thellisang lehloeng ka karolo e ka holimo ho 31 lekholong, le ba hloang lithaba ka karolo e ka holimo ho 20 lekholong. Lipapaling tse ling, liphello ke tse hapang tlhokomelo le ho feta, joalokaha ho hlakisoa ke palo e eketsehang ea mafu a amanang le lipapali tse feteletseng. Ba buellang lipapali tsena ba hlokomela likotsi tse amanang le tsona. Mosali e mong ea kopanelang papaling ea ho thellisa ho feteletseng o re: “Kamehla ke lula ke nahana ka lefu.” Setsebi sa ho thellisa ka boto lehloeng se phaella ka ho re haeba “u sa tsoe kotsi, seo se bolela hore ha u etse boiteko bo lekaneng.”

 Ka mor’a ho lekola lintlha tsena, Mokreste o lokela ho nka ho kopanela lipapaling tse joalo joang? Bibele e ka re thusa joang ho etsa qeto mabapi le hore na re lokela ho kopanela lipapaling tse feteletseng? Ho nahana ka tsela eo Molimo a ikutloang ka eona ka ho halalela ha bophelo ho tla re thusa ho araba lipotso tsena.

Pono ea Molimo ka Bophelo

Bibele e re bolella hore Jehova ke “seliba sa bophelo.” (Pesaleme ea 36:9) Ntle le ho bōpa batho, o ile a ba hlokolosi haholo ho re neha seo re se hlokang hore re thabele bophelo. (Pesaleme ea 139:14, NW; Liketso 14:16, 17; 17:24-28) Ka lebaka leo, ke ho utloahalang ho etsa qeto ea hore o lebeletse hore re hlokomele seo a re nehileng sona ka mosa. Melao le melao-motheo e neng e nehiloe sechaba sa Israele e re thusa ho utloisisa ’nete eo.

Molao oa Moshe o ne o hloka hore motho ka mong a nke mehato ea ho sireletsa bophelo ba ba bang. Haeba sena se ne se sa ka sa etsoa ’me e mong a lahleheloa ke bophelo, ea ka beng a thibetse tlokotsi eo o ne a tla nkoa a le molato oa mali. Ka mohlala, mong’a ntlo o ne a laeloa hore a hahe lerako le lenyenyane kapa motero, o bitsoang lehora, ho potoloha marulelo a bataletseng a ntlo ea hae e ncha. Ho seng joalo, ntlo eo e ne e tla ba le molato oa mali haeba motho ea marulelong a ne a ka oela fatše ’me a shoa. (Deuteronoma 22:8) Haeba ka tšohanyetso khomo e ne e ka hlaba motho a ba a shoa, mong’a eona o ne a ke ke a jarisoa boikarabelo. Ka lehlakoreng le leng, haeba khomo eo e ne e tsejoa hore e kotsi ’me mong’a eona a ile a lemosoa empa a sa ka a etsa letho ho etsa hore e lebeloe ka ho tšoanetseng, eaba e hlaba motho e mong, mong’a khomo o ne a tla nkoa a le molato oa mali ’me o ne a ka bolaoa. (Exoda 21:28, 29) Erekaha bophelo e le ba bohlokoa ho Jehova, Molao oa hae o ne o bontša tlhompho e khōlō bakeng sa ho bo boloka le ho bo sireletsa.

Bahlanka ba Molimo ba tšepahalang ba ne ba utloisisa hore melao-motheo ena e akarelletsa ho ipeha kotsing ka ho tšoanang. Tlalehong e ’ngoe ea Bibele, Davida o ile a bolela hore o lakatsa ho noa “metsi a seliba sa Bethlehema.” Ka nako eo Bethlehema e ne e le tlas’a taolo ea Bafilista. Ha a utloa kōpo ea Davida, a mararo a masole a hae a ile a phunyelletsa har’a liahelo tsa Bafilista, a kha metsi selibeng sa Bethlehema, ’me a a tlisa ho eena. Davida o ile a arabela joang? Ha aa ka a noa metsi ao empa, ho e-na le hoo, o ile a a tšollela fatše. A re: “Ka Molimo oa ka, ha nka ke ka etsa hoo. Na ke be nka noa mali a banna bao ba ileng ba tetse bophelo ba bona na? Hobane ba a tlisitse, ba sa re letho ka bophelo ba bona.” (1 Likronike 11:17-19) Ho Davida e ne e le taba e sa utloahaleng ho hang hore ho behoe bophelo kotsing feela bakeng sa ho mo khotsofatsa.

Jesu o ile a arabela ka mokhoa o tšoanang ha, mohlomong ponong, Diabolose a ne a mo leka hore a itihele fatše a le holim’a tora ea tempele e le ho bona hore na mangeloi a tla mo sireletsa kotsing. Jesu o ile a arabela: “U se ke ua beha Jehova Molimo oa hao tekong.” (Matheu 4:5-7) E, ka bobeli Davida le Jesu ba ne ba hlokomela hore ho ipeha kotsing e ka sokelang bophelo ho sa hlokahale ho fosahetse mahlong a Molimo.

Re nahanne ka mehlala ena, re ka ipotsa, ‘Re seha moeli hokae oa hore na papali e feteletseng kapa e kotsi ke efe? Erekaha le mofuta oa boikhathollo o tloaelehileng, o seng kotsi ka booona, o ka etsoa ka mokhoa o feteletseng, rōna re ka lekanyetsa joang hore na re fella bohōleng bofe?’

Na ke ea Bohlokoa Hoo U ka Ipehang Kotsing ka Lebaka la Eona?

Khakanyo e tšepahalang ea bohlokoa ba papali leha e le efe eo re ka rerang ho e bapala e tla re thusa ho fumana karabo. Ka mohlala, re ka ipotsa, ‘Menyetla ea ho tsoa kotsi papaling ee e mekae? Na ke koetlisitsoe kapa ke na le thepa e hlokahalang ea tšireletso bakeng sa ho thibela likotsi? Liphello ke life haeba mohlomong ke oela fatše kapa ke etsa phoso ea ho halala ntho eo ke e tlōlang kapa haeba thepa ea ka ea tšireletso e hlōleha ho sebetsa? Na e tla ba kotsi e nyenyane, kapa na ho ka hlaha kotsi e tebileng kapa lefu?’

Ho ipeha kotsing ho sa hlokahale molemong oa boikhathollo ho ka ama setsoalle sa bohlokoa sa Mokreste oa ’nete le Jehova haesita le ho tšoaneleha ha hae bakeng sa litokelo tse khethehileng ka phuthehong. (1 Timothea 3:2, 8-10; 4:12; Tite 2:6-8) Ka ho hlakileng, esita leha ba kopanela lipapaling tsa boikhathollo, Bakreste ba etsa hantle ha ba ela hloko pono ea ’Mōpi ka ho halalela ha bophelo.

[Mongolo o botlaaseng ba leqephe]