Mabaka a ho Tšepa Bibele

4. E Nepahetse Litabeng Tsa Saense

Saense e hatetse pele haholo mehleng ea kajeno. Kahoo tsela eo lintho li neng li hlalosoa ka eona pele e fetohile. Seo nakong e fetileng ho neng ho nkoa hore ke ’nete hona joale se ka ’na sa nkoa e se e le khopolo-taba feela. Libuka tsa saense li atisa ho ntlafatsoa.

BIBELE hase buka e hlalosang saense. Empa moo Bibele e buang ka litaba tsa saense teng, ke ho thahasellisang ho hlokomela seo e se buang le seo e sa se bueng.

Ha e hanane le saense. Batho ba mehleng ea boholo-holo ba ne ba lumela linthong tse ngata tse fosahetseng. Ba ne ba e-na le maikutlo a sa tšoaneng ka lefatše, ba bang ba nka hore le bataletse ha ba bang bona ba ne ba lumela hore ho na le litšiea tse itseng tse le tšehelitseng. Nako e telele pele bo-rasaense ba ithuta tsela eo maloetse a tšoaetsanoang ka eona le tsela ea ho a thibela, lingaka tse ling li ne li sebelisa mekhoa e sa atleheng, eo e bileng e ka bolaeang motho. Empa ha ho moo Bibele e buellang maikutlo a hananang le saense kapa mekhoa e kotsi likhaolong tsohle tsa eona tse fetang 1 100.

Lintlha tse tšehetsoang ke saense. Lilemong tse ka bang 3 500 tse fetileng, Bibele e ile ea bolela hore lefatše le leketlile “holim’a lefeela.” (Jobo 26:7) Lekholong la borobeli la lilemo B.C.E., Esaia o ile a bua ka ho toba ka “selika-likoe sa lefatše [kapa, bochitja ba lona].” (Esaia 40:22) Na tlhaloso ea hore lefatše le chitja ’me ha lea tšehetsoa ke litšiea tse itseng sepakapakeng ha e lumellane ka ho babatsehang le saense ea kajeno?

Molao oa Moshe o ngotsoeng hoo e ka bang ka 1500 B.C.E. (libukeng tse hlano tse qalang tsa Bibele), o ile oa fana ka melao e sireletsehileng mabapi le ho arola sechabeng motho ea nang le lefu le tšoaetsanoang, ho tšoara litopo le ho koahela mantle.—Levitike 13:1-5; Numere 19:1-13; Deuteronoma 23:13, 14.

Bo-rasaense ba ile ba lekola sepakapaka ka libonela-hōle tse matla, ’me ba etsa qeto ea hore bokahohle “bo hlahile” ka ho panya ha leihlo. Bo-rasaense ba bang ha ba rate maikutlo a hlahisoang ke tlhaloso eo. Moprofesa e mong o ile a re: “Ho bonahala eka taba ea hore bokahohle bo bile le qalo e hloka hore ho be le moqapi oa tsohle; hobane ke mang ea ka nahanang hore bokahohle bo tjee bo ka ba teng ho se na moetsi?” Empa nako e telele pele batho ba etsa libonela-hōle, temana e qalang feela ea Bibele e ne e boletse ka ho hlaka hore: “Tšimolohong Molimo o ile a bōpa maholimo le lefatše.”—Genese 1:1.

Le hoja e le buka ea khale ’me e bua ka lintho tse ngata, Bibele e nepahetse ha ho tluoa litabeng tsa saense. Na joale ha rea lokela ho hlahloba buka e joalo? *

[Mongolo o botlaaseng ba leqephe]

[Setšoantšo se leqepheng la 8]

Nako e telele esale pele, Bibele e ile ea bolela ka nepo hore lefatše ke selika-likoe le hore le leketlile “holim’a lefeela”

[Moo Setšoantšo se Nkiloeng Teng]

U.S. Fish & Wildlife Service, Washington, D.C./NASA