Tsa Mona le Mane
“Hoo e ka bang halofo ea batho bao ho fumanoang hore ba na le kankere [United Kingdom] selemo ka seng—e leng batho ba fetang 130 000—ba kulisoa ke lintho tseo ba khethang ho li etsa tse akarelletsang ho tsuba, ho noa le ho ja lijo tse fosahetseng.”—BBC NEWS, BRITHANI.
“Khoebo e khōlō e seng molaong e bileng e ntse e rarahana le ho feta ea ho rekisoa ha litho tsa liphoofolo tse hlaha ke mekhatlo ea linokoane [e] felisa mefuta ea liphoofolo e ratoang haholo lefatšeng . . . ka sekhahla se e-s’o ka se bonoa.”—WILDLIFE CONSERVATION SOCIETY, U.S.A.
Batho ba qetang lihora tse tšeletseng ka letsatsi ba shebeletse TV ba ka lebella hore bophelo ba bona bo fokotsehe ka lilemo tse 4,8 ho feta ba sa shebelleng TV. Ka mantsoe a mang, ha motho e moholo ea qetang boholo ba nako a lutse, a nka hora a shebeletse TV, seo se fokotsa bophelo ba hae ka metsotso e 22.—BRITISH JOURNAL OF SPORTS MEDICINE, BRITHANI.
Basali ba Jeremane ba fetang karolo ea 90 lekholong ba lebeletseng bana ba nang le Down syndrome, ba khetha ho ntša mpa.—DER TAGESSPIEGEL, JEREMANE.
Khatello e Bakoang ke ho Phela Metseng ea Litoropo
Makasine ea Poland e bitsoang Przekrój e re bafuputsi ba bontša hore “batho ba lulang metseng ea litoropo ba itšoara ka tsela e mabifi ha ba le tlas’a khatello ho feta batho ba lulang metseng e menyenyane.” Ngaka ea mafu a kelello e bitsoang Mieczysław Jaskulski ea Warsaw’s Psychoeducation Laboratory e re: “Metseng ea litoropo ho na le lintho tse ngata haholo tse bakelang batho khatello. Monyetla oa hore batho ba lulang metseng ea litoropo ba tšohe ka tsela e sa laoleheng o feta oa ba lulang libakeng tsa mahaeng ka liphesente tse 21 le oa hore ba be le ho feto-fetoha ha maikutlo ho sa laoleheng ka liphesente tse 39.” Batho ba lulang metseng ea litoropo ba ka etsa’ng boemong boo? Makasine ea Przekrój e re, “U se ke ua koatisoa ke lintho tseo u ke keng ua etsa letho ka tsona,” “siea mathata a mosebetsi, mosebetsing,” “otlolla maoto,” ’me “u se ke ua qeaqea ho ea phomolong.”
Facebook e Boloka Boitsebiso bo Bokae?
Moithuti oa molao oa Austria o ne a batla ho tseba hore na websaete e khōlō ka ho fetisisa lefatšeng eo batho ba etsang metsoalle ho eona, e bokeletse boitsebiso bo bokae ka eena lilemong tse tharo tseo e bileng setho sa eona, kahoo o ile a kōpa kopi. Facebook e ile ea mo romella CD e nang le boitsebiso ba maqephe a 1 222. Joalokaha koranta ea Jeremane e bitsoang Der Tagesspiegel e tlalehile, moithuti eo o ile a re: “E bolokile ntho e ’ngoe le e ’ngoe—molaetsa o mong le o mong, puisano e ’ngoe le e ’ngoe, ho akarelletsa le boitsebiso ba lekunutu ka metsoalle.” Ho ne ho e-na le boitsebiso boo a neng a tseba hantle hore o bo hlakotse!
