Ke hobane’ng ha ntsintsi e tloaelehileng ea ka tlung e khona ho fofa le ho thinya ka tsela e rarahaneng hakaale? Ke hobane’ng ha e khona ho tsoela pele e fofela moo e batlang ho ea teng leha e fefoloa ke moea? Ka bokhutšoanyane, e thusoa ke mapheoana a mabeli a manyenyane a bitsoang halteres, ao ka leng la ’ona le fumanehang ka mor’a lepheo ka leng. *

Ak’u nahane: Mapheoana ana a tšoana le koto e nyenyane kaha a na le kotola qetellong. Ha ntsintsi e fofa, mapheoana ao a tsamaea ka tsela e fapaneng le ea mapheo a ntsintsi. Bo-rasaense ba fumane hore mapheoana ana a sebetsa joaloka mofuta o bohlale oa gyroscope, ’me a thusa ntsintsi hore e tsitse ha e fofa. *

Encyclopedia of Adaptations in the Natural World e re, kaha mapheoana ana a bitsoang halteres a tšoana le koto, “a ea koana le koana joaloka pendulum ea oache.” Encyclopedia eo e bolela hore haeba ntsintsi e ka lokela ho thinya hang-hang nakong ea ha e fofa, ebang ke ka morero kapa e sututsoa ke moea, “mapheoana a eona le ’ona aa thinya. Methapo e teteaneng ea kutlo e qetellong ea mapheoana ana e lemoha ho thinya hoo, ebe e fetisetsa boitsebiso bokong e le hore ntsintsi e ka fofa ka tsela e loketseng . . . e sa oele fatše.” Ka lebaka leo, lintsintsi li ba lebelo haholo ’me ho ba thata ho li tšoara.

Lienjiniere li hlokometse litsela tse ngata tseo li ka etsisang mapheoana ana ka tsona ha li etsa lisebelisoa tsa theknoloji tse kang liroboto, mechine e menyenyane e fofang e kang likokoanyana le lifofane. Rafal Zbikowski, e leng setsebi se etsang liphuputso ka lintho tse tsamaeang moeeng o ngotse a re, “Ke mang ea neng a ka nahana hore re ka ithuta lintho tse ngata hakaale ho sebōpuoa se senyenyane se sa rateheng se kang ntsintsi?”

U nahana’ng ka see? Na mapheoana a ntsintsi a etsang hore e thinye ka potlako, a bile teng ka tšohanyetso? Kapa na a entsoe?