“Tšimolohong Molimo o ile a bōpa maholimo le lefatše.”—Genese 1:1.

SEO BIBELE E SE BUANG

Ho latela Genese 1:1, nakong e fetileng e sa tsejoeng kapa “tšimolohong,” Molimo o ile a bōpa lintho tsohle, ho akarelletsa le lefatše. Saense ea kajeno e ea lumela hore lintho tsohle li bile le qalo. Morao tjena bo-rasaense ba hakanya hore li bile teng ka lilemo tse ka bang libilione tse 14.

Bibele e boetse e bua ka “matsatsi” a tšeletseng a pōpo. Leha ho le joalo, ha e bolele hore e ne e le matsatsi a lihora tse 24. (Genese 1:31) Ha e le hantle, Bibele e sebelisa lentsoe “letsatsi” ha e bua ka linako tse bolelele bo sa tšoaneng. Ka mohlala, ha e bua ka nako eohle ea pōpo e re, ke ‘letsatsi leo ka lona Jehova Molimo a entseng lefatše le leholimo.’ (Genese 2:4) Ho hlakile hore “matsatsi” ana a pōpo a ne a le bolelele ba lilemo tse likete.—Pesaleme ea 90:4.

KE HOBANE’NG HA E LE HABOHLOKOA

Likhopolo tse fosahetseng tsa batho ba lumelang hore Molimo o bōpile lefatše ka matsatsi a tšeletseng a lihora tse 24, li ka etsa hore u hlokomolohe Bibele. Ka lehlakoreng le leng, haeba Bibele e na le tlaleho e ka tšeptjoang ea pōpo, u ka rua molemo ‘bohlaleng ba eona bo sebetsang.’—Liproverbia 3:21.

“Molimo a tsoela pele ho re: ‘Lefatše le ke le hlahise meea e phelang ho ea ka mefuta ea eona.’”—Genese 1:24.

SEO BIBELE E SE BUANG

Molimo ha aa ka a bōpa mefuta e seng mekae ea lintho tse phelang eaba o etsa hore li iphetolele mefuteng e meng e rarahaneng. Ho e-na le hoo, o ile a bōpa limela le liphoofolo ka mefuta ea tsona, eaba li ikatisa “ho ea ka mefuta ea tsona.” (Genese 1:11, 21, 24) Kaha le kajeno li ntse li tsoala, lefatše le tletse “mefuta” ea lintho tse phelang e tšoanang le eo Molimo a ileng a e bōpa.—Pesaleme ea 89:11.

Bibele ha e bolele hore na ho ka hlaha mefuta e mekae mofuteng o le mong, joalokaha ho ka etsahala ha liphoofolo li nyalisoa. Le hoja ba bang ba nka hore ha lintho tse phelang li ikamahanya le tikoloho eo li phelang ho eona lia iphetola, ha ho na mofuta o mocha o hlahang. Liphuputso tse entsoeng morao tjena, li tšehetsa khopolo ea hore mefuta ea limela le liphoofolo e fetohile hanyenyane haholo ka mor’a nako e telele.

KE HOBANE’NG HA E LE HABOHLOKOA

Ho nepahala ha Bibele ha e hlalosa “mefuta” ea lintho tse phelang, ho etsa hore batho ba tšepe likarolo tse ling tsa eona, tse akarelletsang histori le boprofeta.

“Matsoho a ka a otlolotse maholimo.”—Esaia 45:12.

SEO BIBELE E SE BUANG

Molimo ke Mohloli oa matla a maholo. (Jobo 37:23) Taba ena ke ea bohlokoa hobane bo-rasaense ba ithutile hore matla a ka fetoloa hore ebe ntho e itseng. Bibele e re Molimo ke Mohloli oa “matla a maholo” a entseng lintho tsohle. (Esaia 40:26) Molimo o tšepisa hore o tla sebelisa matla a hae ho tšehetsa pōpo ea hae, hobane ha Bibele e bua ka letsatsi, khoeli le linaleli, e re: “[Molimo] o li boloka li eme ka ho sa feleng.”—Pesaleme ea 148:3-6.

KE HOBANE’NG HA E LE HABOHLOKOA

Setsebi sa linaleli, Allan Sandage o kile a re: “Saense ha e khone ho hlalosa hore na ke hobane’ng ha lintho tsohle li bōpiloe.” Bibele ha e hlalose pōpo ka tsela e lumellanang le saense feela, empa e boetse e araba lipotso tseo saense e ke keng ea khona ho li araba—tse kang, Morero oa Molimo ke ofe ka lefatše le batho? *