Kaofela ha rona re kholisehile hore Jehova o re etella pele ebile oa re tataisa “matsatsing a ho qetela,” kahoo re lokela ho ikemisetsa ho mo mamela. (2 Tim. 3:1) Re phela mehleng e tšoanang le ea ha Baiseraele ba ne ba le lefeelleng. Ha ba ne ba utloa terompeta e lla ba ne lokela ho etsa ho hong.

Jehova o ile a re Moshe a etse literompeta tse peli ka silevera “bakeng sa ho bokella phutheho le ho qhaqha liahelo.” (Num. 10:2) Baprista ba ne ba e-na le mekhoa e fapaneng ea ho letsa terompeta ’me Baiseraele ba ne ba tseba hore na melumo eo e bolela’ng. (Num. 10:​3-8) Le mehleng ena batho ba Molimo ba ntse ba fumana tataiso ka litsela tse fapaneng. Sehloohong sena re tl’o bua ka litsela tse tharo tseo re fumanang tataiso ka tsona ebe rea sheba hore na li tšoana joang le melumo ea literompeta tsa mehleng ea Baiseraele. Mehleng ena bahlanka bohle ba Molimo ba memeloa likopanong, baholo bona ba memeloa likolong ha liphutheho tsona li lula li fumana tataiso e ncha.

Mehleng ea Baiseraele, baprista ba ne ba letsa literompeta tse peli ha Jehova a ne a batla hore “phutheho eohle” e bokane monyako oa tabernakele. (Num. 10:3) Baiseraele bohle ba ne hlomme litente tsa bona ho pota-pota tabernakele ka lihlopha tse ’ne ’me ha terompeta e lla ba ne ba utloa molumo oa eona. Ba neng ba hlomme litente haufi le tabernakele ba ne ba ka khona ho fihla ka mor’a metsotso e seng mekae. Ba bang ba ne ba lula hojana kahoo ho ne ho hlokahala boiteko bo boholoanyane hore ba fihle. Ebang ba ne ba lula hole le tabernakele kapa haufi, Jehova o ne a batla hore Baiseraele bohle ba bokane hammoho e le hore ba ka rua molemo litaelong tsa hae.

Mehleng ena ha re bokane tabernakeleng empa re memeloa likopanong. Likopano tsena li akarelletsa tsa setereke le mekete e khethehileng ’me moo re fumana litaelo le thuto ea bohlokoa. Bahlanka ba Jehova lefatšeng lohle, ba ananela thuto eo ba e fumanang likopanong tsena. Batho bohle ba tlang likopanong tsena eba ngatana-’ngoe ’me sena sea ba thabisa. Batho ba bang ba tloha libakeng tse hole haholo ho feta ba bang, leha ho le joalo bohle ba tlang likopanong tsena ha ba ikoahlaee.

Na batho ba lulang hole haholo le moo likopano li tšoareloang ba ka rua molemo thutong e fumanoang ho tsona? Ka lebaka la theknoloji ea sejoale-joale batho ba bangata ba khona ho rua molemo likopanong ba be ba ikutloe e le karolo ea batho ba ileng ho tsona. Mohlala, nakong eo moemeli oa ntlo-kholo a chaketseng lekala la Benin, bara babo rona ba toropong ea Arlit e Niger lehoatateng la Sahara ba ile ba khona ho shebella kopano ena ba le naheng ea habo bona. Batho ba neng ba shebelletse kopano ena ba ne ba le 21 ’me ba 16 ba bona e ne e se Lipaki. Le hoja ba ne  ba le hole hakaalo le kopano, ba ne ba ikutloa eka ba hona moo kopanong har’a batho ba 44 131. Mor’abo rona e mong o ile a re: “Ke leboha ho tsoa botebong ba pelo hore ebe re ile ra shebella kopano ena. Sena se ile sa re bontša hore na le re rata hakae.”

Ha baprista ba ne ba letsa terompeta e le ’ngoe, e ne e le “marenana” feela a neng a lokela ho ea tenteng ea pokano. Marenana ana a ne a etella pele batho ba likete. (Num. 10:4) Ha ba le moo, Moshe o ne a ba ruta le ho ba fa litaelo. Lintho tseo ba neng ba ithuta tsona li ne li ba thusa ho etella sechaba pele. Haeba u ne u le e mong oa marenana ao, na u ne u ke ke oa etsa sohle se matleng a hao hore u be teng e le hore u ka rua molemo?

Mehleng ena re etelloa pele ke baholo eseng “marenana” ’me ha ba rene ka thata holim’a mohlape oa Molimo. (1 Pet. 5:​1-3) Ba etsa sohle se matleng a bona hore ba hlokomele mohlape oa Molimo. Kahoo ha ba itheke moroalo ha ba memeloa koetlisong e kang eo ba e fumanang Sekolong sa Tšebeletso sa Muso. Ha baholo ba le koetlisong, baa ithuta hore na ba ka ntlafatsa kae e le hore ba hlokomele phutheho. Ka lebaka la koetliso ena eo ba e fumanang, baholo ba khona ho phetha boikarabello ba bona hantle ’me sena se fella ka hore phutheho eohle e rate Jehova. Le haeba ha u e-s’o ee sekolong sena, u ntse u rua molemo koetlisong eo baholo ba e fumanang hobane ba sebelisa lintho tseo ba ithutileng tsona ho thusa phutheho eohle.

Ka linako tse ling ha baprista ba ne ba letsa terompeta ba ne ba etsa hore e ntše molumo o feto-fetohang. Ha Baiseraele ba ne ba utloa molumo ona ba ne ba tseba hore Jehova o batla ba tsoele pele ka leeto. (Num. 10:​5, 6) Ha Baiseraele ba ne ba hlomolla litente e le hore ba ka tsoela pele ka leeto, ba ne etsa seo ka tsela e hlophisehileng haholo empa sena se ne se hloka boiteko bo matla. Empa ke hobane’ng ha Baiseraele ba bang ba ne ba ka ba leqe ho fetela sebakeng se seng?

Mohlomong ba bang ba ne utloa ba se ba falla hangata haholo ebile taba ena e ba hlaha tsome. “Ka linako tse ling leru le ne le lula ho tloha ka shoalane ho fihlela hoseng” empa ka linako tse ling “matsatsi a mabeli kapa khoeli kapa matsatsi a eketsehileng.” (Num. 9:​21, 22) Baiseraele ba ne ba falla hangata hakae? Lengolo la Numere khaolo ea 33 le bua ka libaka tse 40 tseo Baiseraele ba ileng ba fallela ho tsona.

Ka linako tse ling Baiseraele ba ne ba fallela sebakeng seo ho nang le moriti. E tlameha ebe ba ne ba thaba haholo ha ba fumana sebaka se moriti ‘lefeelleng leo le leholo le tšosang.’ (Deut. 1:​19.) Mohlomong Baiseraele ba ne ba tšoha hore sebaka seo ba fallelang ho sona ha ba na ho se rata joalo ka seo ba lulang ho sona.

Baiseraele bohle ba ne ba utloa molumo oa terompeta hong empa ba ne ba ke ke ba tloha hong. Ha ba ne ba utloa molumo o feto-fetohang oa terompeta, ba ne ba tseba hore meloko e meraro e ka bochabela ho tabernakele e lokela ho tsamaea e leng ea Juda, Isakare le Zabulone. (Num. 2:​3-7; 10:​5, 6) Ka mor’a hore meloko ena e tsamaee, baprista ba ne ba letsa terompeta hape e le ho bontša hore meloko e meng e meraro e ka boroa ho tabernakele e lokela ho tloha. Baprista ba ne ba etsa se tšoanang ho fihlela Baiseraele bohle ba tsamaile. Ha batho ba bang ba ne ba qalella ho tsamaea, mohlomong ho ne ho e-na le ba bang ba utloang ba sitoa ho ba le mamello ha ba ntse ba emetse hore ba bolelloe hore ba tsamaee.

Mohlomong le uena u kile oa ikutloa u thatafalloa ho amohela liphetoho tse ling tsa mokhatlo. Ho ka etsahala hore ebe u ne u utloa eka liphetoho tsena li se li le ngata haholo. Kapa u ne u rata tsela eo lintho li neng li etsahala ka eona pele ’me u ne u sa batle ha lintho li ka fetoha. Ho sa tsotellehe hore na u ne u ikutloa joang, e ka ’na eaba u ile oa utloa ho le thata hore u mamelle ha liphetoho tsena li etsahala kapa mohlomong ho ile ha nka nako hore u li amohele. Haeba re amohela liphetoho tse etsoang ka phuthehong, re tla bona hore Jehova oa re rata le hore liphetoho tsena li molemong oa rona.

Mehleng ea Moshe, Jehova o ile a tataisa Baiseraele ba limilione ba akarelletsang banna, basali le bana hore ba fete lehoatateng. Hoja e se ka Jehova ba ke be ba sa khona ho pholoha. Le matsatsing ana a ho qetela Jehova o ntse a re tataisa e le hore re lule re sireletsehile. Kahoo e se eka kaofela ha rona re ka ikemisetsa ho etsisa Baiseraele ba tšepahalang ba neng ba mamela ka hloko hore na terompeta e lla joang ebe ba etsa seo ba lokelang ho se etsa.