MALUMELI a mangata, a akarelletsang Kereke ea Roma e K’hatholike, likereke tsa Orthodox, tsa Mabuddha le tse ling li re baruti ba tsona ha baa lokela ho nyala. Leha ho le joalo, batho ba bangata ba lumela hore sena se etsa hore baruti ba bangata ba qetelle ba etsa boitšoaro bo bobe.

Kahoo re ka ’na ra ipotsa, na Bibele e re batho ba se ke ba nyala? E le hore re arabele potso ena, a re hlahlobeng hore na tloaelo ena e qalile joang le hore na ho tlile joang hore e ate hakana. Re tla boela re bone hore na Molimo o ikutloa joang ka eona.

Ha buka e ’ngoe e hlalosang mantsoe e hlalosa ho se nyale e re ke “boemo ba ho se nyale ho hang e leng se bolelang hore motho a ke ke a etsa thobalano ’me hangata bona ke boitlamo bo etsoang ke baruti ba likereke.” Ka 2006, ha Mopapa Benelict XVI a bua le Mokhatlo o laolang Kereke ea Roma e K’hatholike, o ile a bua tjena ka boitlamo ba ho se nyale: “Esale e le ntho e etsoang ho tloha khale koana pele ho mehla ea Baapostola.”

Leha ho le joalo, Bakreste ba mehleng ea baapostola ba ne ba sa etse boitlamo bona ba ho se nyale. Ha e le hantle, moapostola Pauluse ea phetseng ka nako eo, o ile a lemosa Bakreste hore ba hlokomele banna ba neng ba tla bua “lipolelo tse . . . khelosang” ’me ba hanela batho ho nyala.​—1 Timothea 4:​1-3.

Ka mor’a mehla ea baapostola, tloaelo ena ea ho se nyale ha baruti e ile ea etsoa likerekeng tse ngata tsa Europe le North America. Ho latela buka e ’ngoe e buang ka boitlami e re boitlami bo qalile ka nako eo likereke tse ipitsang tsa Bokreste li neng li lumellana le molao oa ho se kopanele liphate pele ho lenyalo ’musong oa Roma.”

 Hamorao mekhatlo ea likereke le baruti bao ho thoeng ke Bo-fatere ba ile ba tšehetsa molao ona oa hore baruti ha baa lokela ho nyala. Ba ne ba re ho etsa thobalano ke phoso ’me e le hore motho a lule e le moruti o ne a sa lokela ho e etsa. Leha ho le joalo, buka e ’ngoe e hlalosang mantsoe e hlalosa hore “ho tloha lilemong tsa bo-900, baruti ba bang esita le Babishopo ba ne ba nyetse.”

Ka selemo sa 1123 le sa 1139 molao oa ho se nyale o ile oa tiisoa ka ho feletseng sebokeng sa Lateran, se neng se tšoaretsoe Roma, ’me haesale molao oo o le teng ho tla fihlela lena le holimo. Molao oo o ne o tla etsa hore Kereke ea Roma e lule e hlaheletse ’me e eme hantle licheleteng kaha joale ho ne ho ke ke ha hlola ho e-ba le baruti ba tla nka chelete ea kereke bakeng sa malapa a bona.

Tsela eo Molimo a talimang boitlamo ba ho se nyale e hlalositsoe hantle ka Lentsoeng la hae, Bibele. Ka Bibeleng, re bala mantsoe a Jesu mabapi le batho ba ileng ba lula ba sa nyala “ka lebaka la ’muso oa maholimo” joaloka eena. (Matheu 19:​12) Moapostola Pauluse le eena o ile a bua ka Bakreste ba ileng ba latela mohlala oa hae oa ho se nyale ka “lebaka la litaba tse molemo.”​—1 Bakorinthe 7:​37, 38; 9:23.

Leha ho le joalo, Jesu le Pauluse ba ne ba sa qobelle batho hore ba lule ba sa nyala. Jesu o ile a re bosoha ke “mpho” eo e seng bohle ba nang le eona. Ha Pauluse a bua le “masoha kapa batho ba sa nyalang” o ile a re: “Ha ke na taelo e tsoang ho Morena, empa ke fana ka maikutlo a ka.”​—Matheu 19:​11; 1 Bakorinthe 7:25.

Ho feta moo, Bibele e bontša hore ho ne ho ntse ho e-na le baboleli ba neng ba nyetse mehleng ea baapostola, ho akarelletsa le Petrose. (Matheu 8:​14; Mareka 1:​29-​31; 1 Bakorinthe 9:5) Kaha batho ba ne ba sa itšoara hantle Roma, ha Pauluse a bua ka monna ea nyetseng ea neng a batla ho etella phutheho pele, o ile a re e lokela hore e be “monna oa mosali a le mong” le ea “nang le bana ba ipehileng tlaase.”​—1 Timothea 3:​2, 4.

Ho hlakile hore banna bana ba ne ba tla etsa thobalano le basali ba bona kaha Bibele e re: “Monna a ke a fe mosali oa hae tokelo ea mosali” ’me batho ba nyalaneng ha baa lokela ho “hanelana ka eona”. (1 Bakorinthe 7:​3-5) Kahoo, Molimo ha a qobelle batho hore ba lule ba sa nyala.

Re ka ’na ra ipotsa, le hoja ho se nyale e se setlamo, ke hobane’ng ha Jesu le Pauluse ba ile ba bua hantle ka hona? Ke hobane haeba motho a sa nyala a ka ba le nako e ngata ea ho thusa batho ho ithuta Bibele. Batho ba sa nyalang ba khona ho sebeletsa Molimo haholoanyane kaha ha ba na mathata ao batho ba nyetseng ba nang le ’ona.​—1 Bakorinthe 7:​32-​35.

Ka mohlala, monna e mong ea bitsoang David o ile a tlohela mosebetsi oa hae o patalang haholo toropong ea Mexico, ’me a fallela mapolasing a Costa Rica ho ea ruta batho Bibele. Kaha o ne a sa nyala ho ile ha e-ba bonolo ho eena ho ea lula moo. O re: “Ho fallela sebakeng se secha le ho tloaela lintho tse ncha ha ho bonolo, empa kaha ho ne ho se na motho e mong eo ke lokelang ho mo hlokomela ho ile ha e-ba betere.”

Claudia, e leng Paki e sebeletsang moo ho nang le Lipaki tse seng kae, o re: “Ke thabela ho sebeletsa Molimo. Ha ke bona kamoo a ntlhokomelang kateng, tumelo ea ka e ba matla ’me setsoalle sa ka le eena sea tiea.”

Bosoha ha ea lokela ho ba moroalo. Claudia o re: “Ho sa tsotellehe hore na u kene lenyalong kapa u lesoha, haeba feela u beha Jehova Molimo pele bophelong ba hao, u tla thaba.”​—Pesaleme ea 119:1,2.