NA HA LINTHO TSE BOHLOKO LI ETSAHALA U EE U IPOTSE HORE NA KE HOBANE’NG HA MOLIMO A SA LI FELISE? KAPA NA U KILE OA HLAHELOA KE NTHO E BOHLOKO EABA OA IPOTSA HORE NA MOLIMO OA U TSOTELLA?

’Mè Sheila oa Amerika ea holiselitsoeng lelapeng le ratang kereke o re: “Ho tloha ke sa le monyane, ke ne ke rapela Molimo hobane feela a re bopile. Ke ne ke tseba a se na taba le ’na le hoja a le teng a bile a ’mpona. Ha se hore ke ne ke nahana hore Molimo o ntlhoile empa le teng ke sa lumele hore oa ntsotella.” Ebe ke hobane’ng ha ’mè Sheila a ne a ikutloa ka tsela ee? O re: “Lapeng re ne re hlaheloa ke lintho tse bohloko hangata empa ke bona Molimo a sa re thuse.” Mohlomong le uena u ikutloa ka tsela e tšoanang le eo ’mè Sheila a neng a ikutloa ka eona.

Ho ka etsahala hore ebe le uena oa tseba hore Molimo o teng empa oa ipotsa hore na oa u tsotella. Le hoja Jobo a ne a lokile a bile a tseba hore ho na le ’Mopi ea matla le ea bohlale o ne a ipotsa hore na oa mo tsotella. (Jobo 2:3; 9:4) Le eena ha a hlaheloa ke letoto la mathata o ile a re ho Molimo: “Ke hobane’ng ha u pata sefahleho sa hao u nkuka ke le sera sa hao?”—Jobo 13:24.

Bibele eona e reng ka taba ee? Na re lokela ho beha Molimo molato ha re hlaheloa ke mathata? Na ho na le bopaki ba hore Molimo o tsotella e mong le e mong oa rona ho akareletsa le uena? Na u ka re Molimo o na le taba le uena, oa u tseba, o u utloela bohloko le hore a ka u thusa ha u e-na le mathata?

Makasineng ena re tl’o ithuta hore na lintho tseo Molimo a li bopileng li bontša joang hore oa re tsotella. (Baroma 1:20) Ebe joale re hlahloba hore na Bibele e re tiisetsa joang hore oa re tsotella. Ha u ntse u ithuta Bibele hape u sheba le lintho tseo a li bopileng, u tla hlokomela hore Molimo ‘oa u tsotella.’—1 Johanne 2:3; 1 Petrose 5:7.