Molimo o bopile ’mele ea rona ka tsela e inolofalletsang ho ipholisa. Litsebi li bontša hore ha re sehoa ke ntho e itseng kapa re tsoa kotsi, ’mele ea rona ka boeona e khona ho etsa hore leqeba leo le fole hanyane ka hanyane ho sa tsotellehe hore na le leholo hakae. (Johns Hopkins Medicine) Ka mor’a nako e seng kae leqeba leo le qala ho omella, mali a emisa ho tsoa ebe le etsa khoo ho fihlela le folile.

NAHANA: Haeba Molimo o entse hore ’mele ea rona e khone ho ipholisa ha re tsoile leqeba, na seo ha se bopaki ba hore a ka khona ho re imolla ha re tetebetse maikutlo? Mopesaleme o ile a re Jehova “o folisa ba robehileng lipelo, o tlamisa maqeba a bona a bohloko.” (Pesaleme ea 147:3) Empa u ka kholisoa ke eng hore Jehova a ka khona ho tlamisa maqeba a hao hona joale le hore nakong e tlang o tla khona ho folisa pelo ea hao e utloileng bohloko?

Molimo o re: “U se ke ua tšoha, kaha ke na le uena. U se ke ua talima koana le koana, etsoe ke ’na Molimo oa hao. Ke tla u matlafatsa. Ka sebele ke tla u thusa.” (Esaia 41:10) Ha motho a kholisehile hore Jehova oa mo tsotella, o lula a khobile matšoafo ha a tobane le mathata a fapa-fapaneng. Moapostola Pauluse o ile a hlalosa boikutlo bona e le “khotso ea Molimo e fetang monahano oohle.” Eaba o phaella ka hore: “Bakeng sa lintho tsohle ke na le matla ka lebaka la ea mphang bonatla.”—Bafilipi 4:4-7, 9, 13.

Bibele e re thusa ho ba le tumelo ea hore litšepiso tseo Jehova a li tšepisitseng batho li tla fela li phethahale. Mohlala, Tšenolo 21:4, 5 e re bolella hore na Molimo o tla etsa’ng le hore na ke hobane’ng ha re lokela ho mo tšepa:

• Jehova “o tla hlakola meokho eohle mahlong” a batho. O tla felisa lintho tsohle tse re utloisang bohloko le tse re tšoenyang, esita le tse ka bonahalang li sa re letho.

• Morena ea Matla ’Ohle “ea lutseng teroneng,” o tla sebelisa matla a hae ho felisa mahlomola ’ohle ’me a re fe lintho tsohle tseo re li hlokang.

• Jehova oa re tiisetsa hore mantsoe a hae “aa tšepahala ’me ke a ’nete.” Ka mantsoe a mang, Jehova oa hlapanya hore o tla fela a phethahatse litšepiso tsa hae.

“O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile. Ea lutseng teroneng a re: “Bona! Ke etsa hore lintho tsohle li be ncha.” Hape, o re: “Ngola, hobane mantsoe ana aa tšepahala ’me ke a ’nete’”—Tšenolo 21:4, 5.

Ha re bala Bibele re bile re sheba lintho tsohle tseo Molimo a li bopileng, re khona ho mo utloisisa haholoanyane. Popo e re hohela hore re batle ho ithuta haholoanyane ka Molimo le ho mo tseba hantle. Ka lehlakoreng le leng, Bibele eona e re kopa ka ho toba hore re: ‘Atamele ho Molimo, ’me o tla atamela ho rona.’ (Jakobo 4:8) Liketso 17:27 e re ha a “hōle le e mong le e mong oa rōna.”

Ha u ipha nako ea ho ithuta ka Molimo, u tla kholiseha haholoanyane hore ‘oa u tsotella.’ (1 Petrose 5:7) Ho tšepa Jehova ka tsela ee ho tla u tsoela molemo joang?

A re ke re hlahlobeng mohlala oa Ntate Toru oa naheng ea Japane. O holisitsoe ke ’Mè oa Mokreste, empa a khetha ho se be Mokreste joaloka ’Mè oa hae eaba e e-ba setho sa sehlopha se kotsi se bitsoang yakuza, sa Mamafia a Japane. Ha a pheta pale ea hae o re: “Ke ne ke lumela hore Molimo o ntlhoile, hape ke nka hore oa nkotla ha batho bao ke ba ratang ba hlokahala.” Toru oa lumela hore ka lebaka la maemo ao a neng a phela ho oona le tsela eo a neng a ikutloa ka eona, e ile ea e-ba “motho ea se nang kutloelo-bohloko le ea khopo.” Ha a hlalosa tabatabelo ea hae o re: “Ke ne ke batla ho shoa ke sa le monyane empa, e be ka mor’a hore  ke bolaee motho ea mphahametseng e le hore ke siee setumo sa ka.”

Leha ho le joalo, ka mor’a hore a ithute Bibele le mohats’ae Hannah, Toru o ile a etsa liphetoho tse kholo bophelong ba hae. ’Mè Hannah o re: “Ke ile ka bona ha bophelo ba molekane oa ka bo fetoha.” Toru o re: “Hona le Molimo ea tsotellang motho e mong le e mong. Ha a batle ha re shoa. O ikemiselitse ho tšoarela motho e mong le e mong ea bakelang libe tsa hae e le kannete. Re ka mo bolella lintho tsohle tseo re sa batleng ha batho ba bang ba li tseba le tseo ba ke keng ba li utloisisa. Haufinyane, Jehova o tla felisa mathata ’ohle le mahlomola a teng. Le hona joale, Jehova o ntse a re thusa ka litsela tseo re sa li lebellang. Oa re rata ’me o lula a re thusa ha re mo hloka.”—Pesaleme ea 136:23.

Joaloka Toru, ho tseba hore haufinyane Jehova o tl’o hlakola meokho eohle mahlong a batho ’me a felise le mahlomola, ho re fa tšepo bakeng sa bokamoso ’me ho re thusa hore re phele bophelo bo khotsofatsang hona joale. Jehova oa re hlokomela le ho re tsotella lefatšeng lena le tletseng mahlomola le mathata.