LILEMONG tse fetang 3 000 tse fetileng, mopatriareka Jobo o ile a hlokomela hore linonyana tsa leholimo li ka ruta motho lintho tse ngata ka mesebetsi ea Molimo. Tsela e ikhethang eo linonyana li phelang ka eona e boetse e entse hore batho ba li sebelisetse ho etsa mehlala le lipapiso tse rutang. Mehlala ea linonyana e sebelisitsoeng ka Bibeleng e re ruta lintho tse ngata ka bophelo le kamano ea rōna le Jehova. A re ke re hlahlobeng mehlala e se mekae.

Baahi ba Jerusalema ba ne ba tseba mafokotsane haholo kaha a ne a tloaetse ho haha lihlaha tsa ’ona marulelong a matlo a bona. Mafokotsane a mang a ne a hahile lihlaha tsa ’ona tempeleng ea Solomone. Ho ka etsahala hore mafokotsane ana a ne a hahile lihlaha tsa ’ona moo tempeleng hobane e ne e le sebaka se sireletsehileng bakeng sa ho hōlisa malinyane.

Mongoli oa Pesaleme ea 84 e leng e mong oa bara ba Kora, ea neng a tla ho tla sebeletsa tempeleng ka mor’a likhoeli tse ling le tse ling tse tšeletseng o ile a bona lihlaha tsa ’ona ha a ne tlile tempeleng. O ne a lakatsa eka a ka be a lula ntlong ea Jehova kamehla joaloka mafokotsane ao. O ile a bina a re: “Tabernakele ea hao e khōlō e ntle hakaakang, Jehova oa mabotho! Moea oa ka o labalabetse ’me o hloretse mabala a Jehova. Esita le nonyana e fumane ntlo, lefokotsane le iphumanetse sehlaha, moo le behileng malinyane a lona—aletare ea hao e khōlō, Jehova oa mabotho, Morena oa ka le Molimo oa ka!” (Pesaleme ea 84:1-3) Na uena le bana ba hao le labalabela ho ba phuthehong ea batho ba Molimo?—Pesaleme ea 26:8, 12.

Moprofeta Jeremia o kile a re: “Mokotatsie . . . o tseba hantle linako tsa oona tse behiloeng.” Jeremia o ne a tseba kamoo mekotatsie e fallang kateng Naheng e Tšepisitsoeng. Ha lehlabula le kena, ho ile ha bonoa mekotatsie e fetang 300 000 e falla Afrika ’me e ea ka leboea ho Europe e ipapisitse le phororo ea Jordane. Mekotatsie e khona ho tseba ha e se e le nako ea hore e khutlele moo ho futhumetseng ha lehlabula le kena. Joaloka linonyana tsohle tse fallang, mokotatsie le oona o “boloka hantle nako” eo lokelang ho falla ka eona.—Jeremia 8:7.

Buka e ’ngoe e buang ka ho falla ha linonyana e re: “Ntho e makatsang ka ho falla ha linonyana ke hore ho iketsahalla feela ka tlhaho.” Jehova Molimo o kentse bohlale ba ho tseba linako tsa ho falla ho linonyana tsena. Le rōna batho re filoe bohlale ba ho tseba linako le mehla. (Luka 12:54-56) Ho fapana le linonyana feela tse laoloang ke bohlale ba tlhaho ho tseba linako, Molimo o entse hore batho ba khone ho tseba le ho hlokomela linako tseo re phelang ho tsona. Baiseraele ba mehleng ea Jeremia  le bona ba ne ba tseba linako tseo ba neng ba phela ho tsona empa ba ne ba iphapanyelitse tsona. Molimo o ile a hlalosa hore na bothata ba bona e ne e le bofe, o ile a re: “Ba lahlile lentsoe la Jehova, ’me ba na le bohlale bofe?”—Jeremia 8:9.

Mehleng ena re na le bopaki bo feletseng ba hore re phela nakong eo Bibele e reng ke ‘matsatsi a ho qetela.’ (2 Timothea 3:1-5) Na u tla etsisa mokotatsie ’me u ele hloko “linako”?

Ho buuoa ka ntsu ka makhetlo a mangata ka Bibeleng ’me ho ne ho e-na le lintsu tse ngata Naheng e Tšepisitsoeng. Bibele e re ntsu e “batla lijo” e le holimo sehlaheng sa eona hobane “mahlo a eona a talima hōle.” (Jobo 39:27-29) Mahlo a ntsu a bohale hoo a ka khonang ho bona ’mutlanyane o bohole ba k’hilomithara.

Feela joalokaha ntsu e khona ho “talima hōle,” Jehova le eena o khona ho bona bokamoso bo sa le hōle. Ke ka lebaka lena Jehova a ileng a re ke eena ea “bolelang qetello ho tloha tšimolohong, le eo ho tloha khale a bolelang lintho tse e-s’o etsoe.” (Esaia 46:10) Ha re mamela tataiso eo Jehova a re fang eona, bohlale ba hae le bokhoni ba hae ba ho tseba lintho esale pele re ka rua molemo haholo.—Esaia 48:17, 18.

Bibele e boetse e bapisa batho ba tšepang Molimo le lintsu, e re ka bona: “Ba tšepileng Jehova ba tla boela ba fumane matla. Ba tla nyoloha ka mapheo a kang a ntsu.” (Esaia 40:31) Ntsu e sebelisa mocheso o hlahang moeeng e le hore e nyolohele holimo. Hang ha ntsu e futhumala, e otlolla mapheo a eona ho e potoloha ’me sena se e thusa hore e fofele holimo haholo. Ntsu ha e sebelise matla a mangata hore e khone ho nyolohela holimo haholo le ho fofa sebaka se se lelele. Ka ho tšoanang, bohle ba tšepileng Jehova ba kholiseha hore o tla ba fa “matla a fetang se tloaelehileng.”—2 Bakorinthe 4:7, 8.

Nakoana pele Jesu a shoa, o ile a sheba motse oa Jerusalema eaba o re: “Jerusalema, Jerusalema, ’molai oa baprofeta le ea tlepetsang ka majoe ba rometsoeng ho eena. Ke hangata hakaakang ke ileng ka batla ho bokella bana ba hao, ka tsela eo khoho e bokellang litsuonyana tsa eona tlas’a mapheo a eona! Empa le ne le sa batle.”—Matheu 23:37.

E ’ngoe ea lintho tse ikhethang ka linonyana ke hore li rata ho sireletsa malinyane a tsona. Linonyana tse hahang lihlaha tsa tsona fatše joaloka likhoho li lokela ho lula li lebetse malinyane a tsona. Haeba sethole se bona phakoe e ntse e fofela haufinyane, se lokela ho etsa lerata le hlokomelisang litsuonyana hore li balehele tlas’a mapheo a sona. Litsuonyana li ka lula li sireletsehile tlas’a mapheo a sethole ’me tsa ipatela letsatsi le bataolang le lipula tse matla. Jesu le eena o ne a batla ho sireletsa baahi ba Jerusalema e le hore ba lule ba e-na le kamano e ntle le Jehova. Mehleng ena, Jesu o re mema hore re tle ho eena ’me re fumane khatholoho le tšireletseho mathateng ao re kopanang le ’ona letsatsi le letsatsi.—Matheu 11:28, 29.

Ruri ho na le lintho tse ngata tseo re ka ithutang tsona ho linonyana tsa leholimo. Ha u ntse u hlokomela kamoo li phelang kateng, leka ho hopola kamoo mehlala ea tsona e sebetsang kateng bophelong. E se eka lefokotsane le ka u thusa ho lula u ananela u bile u hlompha ntlo ea Jehova. E se eka u ka talima ho Jehova bakeng sa ho u fa matla le ho u phahamisa joaloka ntsu. Lula haufi le Jesu e le hore a ka u sireletsa moeeng joaloka ka sethole se sireletsang litsuonyana tsa sona. E se eka mokotatsie o ka lula o u hopotsa ho lula u falimehetse linako le mehla eo re phelang ho eona.