MORALI’ABO RONA DIANA ea lilemo tse ka holimo ho 80 o na le mathata a mangata haholo. O ile a hlokahalloa ke bara ba babeli a ba a hlaseloa ke mofetše oa letsoele. Athe molekane oa hae o qetile lilemo a le lehaeng la maqheku a e-na le lefu la hlooho le bitsoang Alzheimer pele a hlokahala. Empa batho ba tsebang Morali’abo rona Diana ba re o lula a thabile ka linako tsohle.

Mor’abo rona John eena o qetile lilemo tse fetang 43 e le mopotolohi. Ka mor’a moo mong ka eena o ile a kula eaba o tlameha ho tlohela mosebetsi ona oo a o ratang e le hore a mo hlokomele. Leha ho le joalo, batho ba tsebang Mor’abo rona John ba re o lula a thabile joalokaha eka ha hoa etsahala letho.

Ebe ho tlile joang hore batho baa ba lule ba thabile? Na motho a ka thaba le ha a imetsoe ke mathata? Na a ka thaba empa a se a sa khone ho etsa mosebetsi oo a o ratang? Bibele ha e bua ka thabo e re: “Ea lokileng o tla ithabela ho Jehova.” (Pes 64:​10) Re tla utloisisa taba ena hantle ha re ka tseba hore na motho o thabisoa ke eng.

Ho na le lintho tseo ho tsebahalang hore lia thabisa. Mohlala, ha batho ba ratanang ba nyalana, batsoali ba e-ba le ngoana kapa motho a e-ba le boikarabello bo eketsehileng ka phuthehong. Lintho tsena kaofela lia thabisa hobane ke limpho tse tsoang ho Jehova. Ke eena ea qapileng lenyalo, ea entseng hore batho ba be le bana hape o fa batho mosebetsi ka phuthehong.​—Gen. 2:​18, 22; Pes. 127:3; 1 Tim. 3:1.

Le hoja lintho tsena li thabisa, li ka fella habohloko, ka mohlala, molekane a ka u phoqa kapa a hlokahala. (Ezek. 24:​18; Hos. 3:1) Athe bana bona e ka ba marabele eaba ha ba mamele batsoali le Molimo ebe baa khaoloa. Bara ba Samuele ha baa ka ba sebeletsa Jehova ka botšepehi, Davida eena a bakela lelapa la hae bomalimabe. (1 Sam. 8: 1-3; 2 Sam. 12:​11) Ha lintho tsena li etsahala motho o utloa bohloko haholo!

Ka tsela e tšoanang le mosebetsi oo re o etsetsang Jehova o ka re fella, mohlomong hobane re kula, re e-ba le boikarabello bo eketsehileng ba lelapa kapa mokhatlo oa Jehova o nka mothinya o mong. Batho ba ileng ba tlameha ho tlohela mosebetsi o itseng ka phuthehong, ba re ba hloloheloa monate oo oa ho sebeletsa Molimo.

Haeba lintho tsena e le tsona feela tse re thabisang, re ka qetella re sa thaba. Na joale ho na le mokhoa oa hore motho a thabe le ha maemo a hae a fetoha? Oona o teng hobane Samuele, Davida le ba bang ba ile ba lula ba thabile le hoja ba ne ba e-na le mathata.

Jesu o tseba hantle hore na motho o thabisoa ke eng. Ha a le leholimong a se na mathata, o ne a lula a “nyakaletse ka pel’a [Jehova] ka nako eohle.” (Liprov. 8:​30) Empa ha a le lefatšeng o ile a ba le mathata a boima. Leha ho le joalo, o ne a thabisoa ke ho etsa thato ea Ntate oa hae. (Joh. 4:​34) Le ha a se a le makhatheng a lefu, Bibele e re “ka lebaka la thabo e neng e behiloe ka pel’a hae o ile a mamella thupa ea tlhokofatso.” (Baheb. 12:2) Kahoo, e ka ba bohlale ho mamela likeletso tseo a faneng ka tsona.

Ka lekhetlo le leng o ile a roma barutuoa ba hae ba 70 hore ba kene motseng ba bolele. Ha ba khutla ba thabile ba mo phetela mesebetsi eo ba e entseng e kang ho tebela bademona, o ile a re ho bona: “Le se ke la thabela hore ebe meea e behoa tlas’a lona, empa le thabe kahobane mabitso a lona a ngotsoe maholimong.” (Luka 10:​1-9, 17, 20) Ka nako eo, ntho ea bohlokoa e ne e le hore Jehova o thabile e seng hore ba leleka bademona. Ntho e neng e lokela ho ba thabisa ke hore Jehova a ke ke a lebala mosebetsi oo oa bona.

Ka le leng, Jesu o ne a bua le letšoele le neng le bokane. Eaba ’mè e mong oa Mojuda o babatsa ’mè oa Jesu ka hore ebe o na  le mora ea khonang ho ruta joalo. Empa Jesu a mo hlokomelisa taba e ’ngoe a re: “Che, ho e-na le hoo, ho thaba ba utloang lentsoe la Molimo ’me ba le boloka.” (Luka 11:​27, 28) Ke ’nete hore motsoali e mong le e mong oa thaba ha ngoana oa hae a mamela empa ho ratoa ke Jehova ho thabisa le ho feta.

Kannete ho ratoa ke Jehova ke eona feela ntho e ka etsang hore motho a lule a thabile. Ha ho le joalo, motho o thaba esita le ha a e-na le mathata, joale o thaba le ho feta ha a a mamella. (Bar. 5:​3-5) Ho feta moo, Jehova o fa batho ba mo tšepang moea oa hae o etsang hore ba thabe. (Bagal. 5:​22) Ke ka lebaka leo Pesaleme ea 64:​10 e reng: “Ea lokileng o tla ithabela ho Jehova.”

Ke ka lebaka leo morali’abo rona Diana le mor’abo rona John ba neng ba lula ba thabile le hoja ba imetsoe. Morali’abo rona o re: “Ke tšabela ho Jehova joalokaha ngoana a tšepa batsoali ba hae.” O re oa tseba hore Jehova oa mo rata kaha o mo thusa ho bolella batho molaetsa oa hae a thabile. Mor’abo rona John eena ha a hlalosa hore na ke eng e mo thabisang o re: “Ho tloha ka 1998 ha ke ne ke qala ho ba morupeli Sekolong sa ho Koetlisetsoa Bosebeletsi, ke ile ka ba le nako e ngata ea ho ithuta Bibele.” O re eena le mohatsa oa hae ba thusitsoe ke ho batla ho sebeletsa Jehova ho sa tsotellehe hore na ba mo sebeletsa hokae. Kannete ha ba ikoahlaee.

Ha se bona feela ba boneng ha Pesaleme ea 64:​10 e phethahala bophelong ba bona. Mohlala o mong ke oa banyalani ba bang ba neng ba sebelelitse Bethele e Amerika ka lilemo tse fetang 30 ba ileng ba koptjoa ho ba bo-pula-maliboho ba khethehileng. Ba ile ba re: “Ha motho a lahleheloa ke ntho eo a e ratang o utloa bohloko, empa a ke ke a lula a utloile bohloko.” Hang-hang feela ba ile ba tsoela pele ka mosebetsi oo ba o filoeng. Ba re: “Ha re rapela Jehova re toba taba, ebe ha a arabela lithapelo tseo, rea thaba. Ho e-s’o ee kae bahoeletsi ba bang phuthehong ea rona e e-ile ea e-ba bo-pula-maliboho ra ba ra hlohonolofatsoa ka lithuto tse tsoelang pele hantle.”

Ha ho itlele feela tjena hore motho a lule a thabile kaha ka linako tse ling bophelo boa nyolosetsa. Empa Jehova o re khothatsa ka mantsoe a hlahang ho Pesaleme ea 64:​10. Re ka kholiseha hore le nakong eo re nyahameng hafeela re tšepahala re tla “ithabela ho Jehova.” Hape re ka ba le tšepo ea hore Jehova o tla tlisa “maholimo a macha le lefatše le lecha.” Ka nako eo kaofela re tla be re phethahetse, hape re tla ‘thaba ’me re nyakalle ka ho sa feleng’ ka lebaka la lintho tseo a tla beng a ntse a re fa tsona le tseo a tla beng a ntse a li etsa.​—Esa. 65:​17, 18.

Nahana feela hore na ho tla ba joang ha re se re phethahetse kaofela, hoseng ho hong le ho hong re tsoha re le mahlahahlaha. Re folile joaloka lesheleshele re bile re lebetse hore re kile ra ba le mathata. Rea lumela hore “lintho tsa pele li ke ke tsa hopoloa, kapa tsa fihla ka pelong.” Baratuoa ba rona ba tla tsoha ebe re ba le bona hape. Boholo ba rona re tla ikutloa joaloka batsoali ba ngoanana eane eo Jesu a ileng a mo tsosa ’me re tla “hlolloa haholo.” (Mar. 5:​42) Qetellong motho e mong le e mong ea tla beng a phela o tla ‘loka’ ka ho feletseng a be a ‘ithabele ho Jehova’ bophelo bohle ba hae.