1-2. Re ithuta’ng mohlaleng oa Mora’bo rona Angelito?

NA BATSOALI ba hao ke Lipaki Tsa Jehova? Haeba ho joalo, u lokela ho hopola hore u ke ke oa ba motsoalle oa Jehova hobane feela batsoali ba hao e le metsoalle ea hae. Ho sa tsotellehe hore na batsoali ba rona ba sebeletsa Molimo kapa che, e mong le e mong oa rona o lokela ho iketsetsa setsoalle le Jehova.

² Nahana ka mohlala oa Mora’bo rona Angelito. Lelapa labo kaofela e ne e le Lipaki Tsa Jehova. Empa ha a ntse a hola o ne a utloa a se na kamano e ntle le Molimo. O re: “Ke ne ke sebeletsa Jehova hobane feela ke ne ke batla ho etsa seo lelapa leso le se etsang.” Leha ho le joalo, Mora’bo rona Angelito o ile a ipha nako ea ho bala Lentsoe la Molimo le ho nahanisisa ka lona ’me a qala ho rapela Jehova nako le nako. Phello e ile ea e-ba efe? Mora’bo rona Angelito o re: “Ke ile ka ithuta hore ntho feela e ka nthusang hore ke atamele haufi le Ntate oa ka ea lerato ke hore ke mo tsebe hantle.” Mohlala oa Mora’bo rona Angelito o etsa hore re nahane ka lipotso tsena tsa bohlokoa: Phapang ke efe pakeng tsa ho tseba lintho tse itseng feela ka Jehova le ho mo tseba hantle? Re ka etsa’ng e le hore re tsebe Jehova hantle?

3. Phapang ke efe pakeng tsa ho tseba lintho tse itseng feela ka Jehova le ho mo tseba hantle?

³ Re ka ’na ra nahana hore re tseba Jehova hobane feela re tseba lebitso la hae, lintho tseo a ileng a li bua le tseo a  ileng a li etsa. Empa ho tseba Jehova hantle ho akarelletsa lintho tse ngata. Re lokela ho qeta nako re ithuta ka Jehova le makhabane a hae. Ha re etsa joalo, re tla utloisisa hore na ke hobane’ng ha a bua lintho le ho li etsa. Hape re tla tseba hore na Jehova o rata tsela eo re nahanang ka eona le ho etsa lintho. Hang ha re se re tseba hore na Jehova o batla re etse’ng, re tla etsa joalo.

4. Ho hlahloba mehlala ea batho ba ka Bibeleng ho ka re thusa joang?

⁴ Batho ba bang ba ka ’na ba re soma ha re batla ho sebeletsa Jehova ’me ba ka ’na ba re hanyetsa le ho feta ha re qala ho ea libokeng. Empa haeba re tšepa Jehova, a ke ke a re lahla kherehloa. Re tla be re haha setsoalle se tla ba teng ho ea ho ile. Na re ka khona ho tseba Jehova hantle? E, re ka khona. Mehlala ea batho ba sa phethahalang joaloka Moshe le Davida e bontša hore re ka khona. Ha re ntse re hlahloba mehlala ea bona, re tla fumana likarabo tsa lipotso tsena: Ba tsebile Jehova joang? Re ka ithuta’ng mehlaleng ea bona?

5. Moshe o ile a khetha ho etsa’ng?

⁵ Moshe o ile a khetha ho sebeletsa Molimo. Ha a le lilemo tse ka bang 40, o ile a khetha ho ba ka lehlakoreng la batho ba Molimo ho e-na le ho tsebahala e le “mora oa morali oa Faro.” (Baheb. 11:​24) O ile a tela boemo boo bo phahameng boo a neng a e-na le bona. Moshe o ne a tseba hore Faro eo e neng e le morena oa Baegepeta a bile a nkoa e le molimo, o ne a tla halefa haholo ha a ne a ne a e-ba ka lehlakoreng la Baiseraele. Taba ena e bontša hore Moshe o ne a e-na le tumelo e matla. Hape o ne a tšepa Jehova. Ho tšepa Jehova ke eona ntho ea bohlokoa e ileng ea thusa Moshe hore a be le kamano e haufi le Jehova bophelo bohle ba hae.​— Liprov. 3:5.

6. Re ka ithuta’ng mohlaleng oa Moshe?

⁶ Re ithuta’ng? Joaloka Moshe, le rona re lokela ho khetha hore na re tla sebeletsa Molimo le ho ikamahanya le batho ba hae. Re ka ’na ra lokela ho itella Molimo hape batho ba sa mo tsebeng ba ka ’na ba re hanyetsa. Empa ha re tšepa Jehova, o tla re tšehetsa.

7-8. Moshe o ile a tsoela pele ho ithuta’ng?

⁷ Moshe o ile a tsoela pele ho ithuta makhabane a Jehova le ho etsa thato ea hae. Mohlala, ha Jehova a laela Moshe hore a etelle sechaba sa Iseraele pele ha se tsoa Egepeta, o ile a bolella Jehova hore ha a itšepe ’me ka makhetlo-khetlo a mo bolella hore o ikutloa a sa tšoanelehe. Tsela eo Jehova a ileng a arabela Moshe ka eona e ne e bontša hore o mosa ebile oa utloisisa hore na o ikutloa joang eaba oa mo thusa. (Ex. 4:​10-16) Kahoo, Moshe o ile a khona ho bolella Faro molaetsa o matla oa kahlolo oa Jehova. Moshe o ile a bona ha Jehova a sebelisa matla a hae ho pholosa Baiseraele le ha a felisa Faro hammoho le lebotho la hae Leoatleng le Lefubelu.​—Ex. 14:​26-31; Pes. 136:15.

⁸ Ka mor’a hore Moshe a ntše Baiseraele Egepeta, ba ne ba lula ba korotla. Leha ho le joalo, Moshe o ile a bona mamello e tsotehang ea Jehova ha a sebelisana le sechaba sa hae seo a se ntšitseng bokhobeng. (Pes. 78:​40-43) O ile a boela a bona hore Jehova o ikokobelitse ka tsela e ikhethang ka mor’a hore a fetole monahano oa hae ha a mo kopa hore a etse joalo.​—Ex. 32:​9-14.

9. Ho ea ka Baheberu 11:​27, Moshe o ne a e-na le kamano e joang le Molimo?

 ⁹ Ka mor’a hore Baiseraele ba tsoe Egepeta, kamano ea Moshe le Molimo e ile ea matlafala hoo e neng eka o bona Molimo. (Bala Baheberu 11:​27.) Bibele e bontša hore Moshe le Jehova e ne e le metsoalle ea hlooho ea khomo ha e re: “Jehova a bua le Moshe lifahleho li talimane, feela joalokaha motho a ne a ka bua le oa habo.”​—Ex. 33:11.

10. E le hore re tsebe Jehova hantle, re lokela ho etsa’ng?

¹⁰ Re ithuta’ng? E le hore re tsebe Jehova hantle, ha rea lokela ho ithuta ka makhabane a hae feela empa re lokela ho etsa thato ea hae. Thato ea Jehova ke hore “batho ba mefuta eohle ba pholohe ’me ba fihle tsebong e nepahetseng ea ’nete.” (1 Tim. 2:​3, 4) Tsela e ’ngoe eo re etsang thato ea Molimo ka eona ke ka ho bolella batho ba bang ka eena.

11. Ho ruta batho ba bang ka Jehova ho re thusa joang hore re mo tsebe haholoanyane?

¹¹ Hangata ha re ruta batho ka Jehova, re mo tseba haholoanyane. Ka mohlala, re bona kamoo Jehova a leng mosa kateng ha a re thusa hore re fumane batho ba batlang ho ba metsoalle ea hae. (Joh. 6:​44; Lik. 13:​48) Rea bona hore Lentsoe la Molimo le matla hobane le thusa batho bao re ithutang Bibele le bona hore ba fetole bophelo ba bona. (Bakol. 3:​9, 10) Re bona mamello ea Jehova ka hore ebe o re romela ho batho ba tšimong ea rona hangata-ngata e le hore ba ithute ka eena le hore ba pholohe.​—Bar. 10:​13-15.

12. Joalokaha ho bontšitsoe ho Exoda 33:​13, Moshe o ile a kopa eng, hona hobane’ng?

¹² Moshe o ne a nka setsoalle sa hae le Jehova e le sa bohlokoa. Moshe o ne a tseba Jehova hantle hobane Jehova o ile a mo sebelisa ho etsa mehlolo e mengata. Leha ho le joalo, o ile a ’na a mo kopa hore a mo thuse ho mo tseba haholoanyane. (Bala Exoda 33:​13.) Moshe o ne a se a fetile lilemo tse 80 ha a etsa kopo eo empa o ne a tseba hore ho ne ho ntse ho e-na le lintho tse ngata tseo a neng a ka ithuta tsona ka ntate oa hae ea lerato.

13. Tsela e ’ngoe eo ka eona re ka bontšang hore re nka setsoalle sa rona le Jehova e le sa bohlokoa ke efe?

¹³ Re ithuta’ng? Ho sa tsotellehe hore na e se e le nako e kae re sebeletsa Jehova, re lokela ho lula re nka setsoalle sa rona le eena e le sa bohlokoa. Tsela e ’ngoe eo ka eona re ka bontšang hore re nka setsoalle sa rona le Jehova e le sa bohlokoa ke ka hore re bue le eena ka thapelo.

14. Thapelo e ka u thusa joang hore u ithute ka Jehova haholoanyane?

¹⁴ Haeba u batla hore setsoalle sa hao le motho e mong se tiee, le lokela ho buisana nako le nako. Kahoo e le hore u be le setsoalle se tiileng le Molimo, u lokela ho mo rapela nako le nako, u se ke oa tšaba ho mo bolella hore na u nahana’ng le hore na u ikutloa joang. (Baef. 6:​18) Morali’abo rona Krista ea lulang Turkey, o re: “Nako le nako ha ke bolella Jehova hore na ke ikutloa joang ’me ke bona a nthusa, ke mo rata le ho feta ebile kea mo tšepa. Ha ke bona a araba lithapelo tsa ka, taba eo e nthusitse hore ke mo nke e le Ntate le Motsoalle oa ka.”

15. Jehova o ile a re’ng ka Morena Davida?

¹⁵ Morena Davida o hlahetse sechabeng se neng se sebeletsa Molimo. Empa taba ea hore ebe lelapa labo le ne le sebeletsa Jehova ha se eona ntho e entseng hore a  mo sebeletse. O ile a iketsetsa setsoalle le Jehova ’me Jehova o ne a mo rata haholo. Jehova o ile a re Davida ke “monna ea ratoang ke pelo ea [Hae].” (Lik. 13:​22) Ho tlile joang hore ebe Davida o ile a ba le setsoalle se haufi le Jehova?

16. Popo e ile ea ruta Davida eng ka Jehova?

¹⁶ Davida o ile a ithuta ka Jehova linthong tseo a li bopileng. Ha Davida a ntse a hola, o ile a qeta nako e ngata naheng a hlokomela linku tsa ntate oa hae. Mohlomong o ile a qala ho nahanisisa ka lintho tseo Jehova a li entseng ka nako eo. Mohlala, ha Davida a ne a sheba leholimo le tletseng linaleli, o ne a sa bone tsona feela. O ne a bona makhabane a motho ea li entseng. Ke kahoo a ileng a re: “Maholimo a bolela khanya ea Molimo; Sepakapaka se bolela mosebetsi oa matsoho a hae.” (Pes. 19:​1, 2) Ha Davida a ne a nahana ka tsela eo batho ba bopiloeng ka eona, o ile a hlokomela hore Jehova ke Molimo ea bohlale. (Pes. 139:​14) Ha a ne a nahanisisa ka lintho tseo Jehova a li entseng, o ne a ipona hore ha se letho ha a bapisoa le Jehova.​—Pes. 139:6.

17. Re ka ithuta’ng ha re nahanisisa ka popo?

¹⁷ Re ithuta’ng? Rata popo. Iphe nako ea ho boha lintho tse ntle tseo Jehova a li entseng ’me o li rate. Letsatsi le letsatsi, nahanisisa ka lintho tse u potolohileng tseo Jehova a li bopileng e ka bang ke limela, batho kapa liphoofolo hore na li u ruta’ng ka Jehova. Ha u etsa joalo, ho tla ba le ntho eo u ithutang eona ka Ntate oa hao ea lerato letsatsi le letsatsi. (Bar. 1:​20) Hape u tla mo rata le ho feta.

18. Ho ea ka Pesaleme ea 18, Davida o ile a hlokomela’ng?

¹⁸ Davida o ile a hlokomela hore o thusoa ke Jehova. Mohlala, ha Davida a ne a sireletsa linku tsa ntate oa hae liphoofolong tse hlaha, o ile a hlokomela hore ke Jehova ea ileng a mo thusa hore a li hlole. O ile a boela a hlokomela hore o thusitsoe ke Jehova ha a hlola Goliathe oa sehanyata. (1 Sam. 17:​37) A boela a hlokomela hore o sirelelitsoe ke Jehova hore a khone ho baleha Morena Saule ea mona. (Pes. 18, sehloohoana) Hoja ebe o ne a ikhohomosa a ka be a ile a nahana hore o entse lintho tseo tsohle ka matla a hae. Empa kaha o ne a ikokobelitse, o ile a hlokomela hore o thusitsoe ke Jehova.​—Pes. 138:6.

19. Re ka ithuta’ng mohlaleng oa Davida?

¹⁹ Re ithuta’ng? Le rona re lokela ho etsa ho hong ha re kopile thuso ho Jehova. Re lokela ho hlokomela ha a re thusa le hore na o re thusa joang. Haeba re ikokobelitse, re tla utloisisa hore re ke ke ra khona ho etsa ntho e ’ngoe le e ’ngoe ka matla a rona le hore Jehova o re thusa ho etsa lintho tseo re sa khoneng ho li etsa. Hape nako le nako ha re bona Jehova a re thusa, setsoalle sa rona le eena se tla tiea le ho feta. Mor’abo rona Isaac ea lulang Fiji ea sebelelitseng Jehova ka lilemo tse ngata o ile a bona ha seo se etsahala. O re: “Ha ke hetla morao, kea bona hore esale Jehova a nthusa ho tloha ha ke qala ho ithuta Bibele ho fihlela hona joale. Kahoo, Jehova ke motho oa sebele ho ’na.”

20. Re ithutang ka kamano eo Davida a neng a e-na le eona le Molimo?

²⁰ Davida o ile a etsisa makhabane a Jehova. Jehova o re bopile re e-na le bokhoni ba ho mo etsisa. (Gen. 1:​26) Ha re ithuta ka makhabane a hae, re khona ho mo etsisa le ho feta. Kaha Davida o ne a tseba Jehova hantle, o ile a khona ho mo etsisa ha a sebelisana le batho ba bang. Nahana ka mohlala ona. Davida o ile a etsa sebe ha a ne a etsa bohlola le Bathe-sheba le ha  a bolaea monna oa hae. (2 Sam. 11:​1-4, 15) Empa Jehova o ile a hauhela Davida, monna ea neng a hauhelang batho ba bang. Kaha Davida o ne a e-na le kamano e ntle le Jehova, Baiseraele ba ne ba mo rata haholo hape Jehova o ile a mo sebelisa e le mohlala o motle ho marena a Iseraele.​—1 Mar. 15:​11; 2 Mar. 14:​1-3.

21. Ho ea ka Baefese 4:​24; le 5:1 re rua molemo ofe ha re ba “baetsisi ba Molimo”?

²¹ Re ithuta’ng? Re lokela ho ba “baetsisi ba Molimo.” Ha re etsa joalo re itsoela molemo hape re ithuta haholoanyane ka eena. Ha re etsisa Jehova, re bontša hantle hore re bana ba hae.​—Bala Baefese 4:​24; 5:1.

22-23. Ho tla etsahala’ng haeba re etsa lintho tseo re ithutileng tsona ka Jehova?

²² Joalokaha re bone, re ka ithuta ka Jehova popong le lentsoeng la hae e leng Bibele. Bibele e na le mehlala ea bahlanka ba Jehova ba tšepahalang bao re ka ba etsisang joaloka Moshe le Davida. Jehova o phethile karolo ea hae. Kahoo, le rona re lokela ho phetha karolo ea rona ’me re ithute ka eena kahohle kamoo re ka khonang.

²³ Re ke ke ra khaotsa ho ithuta ka Jehova. (Moek. 3:​11) Ntho ea bohlokoa ha se hore feela re ithute ka eena, empa ke hore na re etsa’ng ka tsebo eo re e fumaneng ha re qeta ho ithuta. Haeba re etsa lintho tseo re ithutileng tsona re bile re leka ho etsisa Ntate oa rona ea lerato, re tla tsoela pele ho atamela haufi le eena. (Jak. 4:8) A sebelisa Lentsoe la hae, oa re tiisetsa hore a ke ke a lahla ba batlang ho mo tseba hantle.