1. Ke phetoho efe e bonahalang mehleng ee?

HAESALE ho tloha lilemong tse likete tse fetileng batho ba e-na le bolumeli boo ba leng ho bona. Empa mehleng ena ho bonahala phetoho e kholo tabeng ena. Batho ba bangata ba se ba re ha se balumeli. Ha e le hantle, linaheng tse ling batho ba bangata ba re ha ba na bolumeli. *​—Mat. 24:12.

2. Ke hobane’ng ha palo ea batho ba reng ha se balumeli e ntse e phahama hakaale?

² Ke hobane’ng ha palo ea batho ba reng ha se balumeli e ntse e phahama hakaale? * E ka ’na eaba batho ba bang ba imetsoe ke mathata kapa ba iphathahantse ka boithabiso. (Luka 8:​14) Ba bang bao e neng e le balumeli ha ba sa lumela hore Molimo o teng. Ha ba bang bona ba lumela hore Molimo o teng empa ba nka hore bolumeli bo siuoe ke nako, ha bona thuso ebile ha bo lumellane le saense. E ka ’na eaba batho ba bang ba utloa metsoalle, matichere le bo-ralitaba ba re lintho li ikentse empa ho se mohla ba kileng ba utloa mabaka a utloahalang a ho lumela hore Molimo o teng. Batho ba bang ba tlohetse ho ea kerekeng ka lebaka la baruti ba meharo le ba ratang maemo. Linaheng tse ling teng, ba boholong ’musong ba entse melao e thibelang bolumeli ka ho feletseng.

3. Sehlooho see se reretsoe’ng?

³ Jesu o re laetse hore re “etse batho ba lichaba tsohle barutuoa.” (Mat. 28:​19) Re lokela ho etsa’ng e le hore re thuse batho bao e seng balumeli hore ba rate Molimo le hore ebe balateli  ba Kreste? Re tlameha ho hlokomela hore tsela eo motho a arabelang ka eona ha re bua le eena ka Bibele e ka ’na ea itšetleha ka hore na o holetse hokae. Mohlala, batho ba tsoang linaheng tsa Europe ba ka ’na ba se ke ba araba ka tsela e tšoanang le ea batho ba tsoang linaheng tsa Asia ha re bua le bona ka molaetsa oa Bibele. Hobane’ng? Linaheng tsa Europe, batho ba bangata ba tseba Bibele ebile baa tseba hore Molimo o bopile lintho tsohle. Empa linaheng tsa Asia teng, batho ba bangata ha ba tsebe hakaalo ka Bibele kapa ha ba e tsebe hohang hape ho ka etsahala hore ha ba lumele hore ho na le ’Mopi. Sehlooho sena se reretsoe ho re thusa hore re ithute Bibele le batho bohle ho sa tsotellehe hore na ba tsoa hokae kapa hore na ba lumela eng.

4. Ke hobane’ng ha re lokela ho ba le mamello?

⁴ E-ba le mamello. Selemo le selemo, ho ba le batho bao pele e neng e se balumeli bao e-bang Lipaki Tsa Jehova. Ba bangata ba bona ba ne ba phela ka melao e nepahetseng ea boitšoaro empa ba ile ba tenoa ke boikaketsi boo ba bo bonang likerekeng. Athe ba bang ba ne ba itšoere hampe ’me ba e-na le mekhoa e mebe eo ba neng ba lokela ho e tlohela. Jehova o tla re thusa hore re fumane batho ba nang le “tšekamelo e nepahetseng bakeng sa bophelo bo sa feleng.”​—Lik. 13:​48; 1 Tim. 2:​3, 4.

5. Ke’ng e etsang hore batho ba mamele ha re bua le bona ka Bibele?

⁵ E-ba mosa ’me u be masene. Hangata batho bao re buang le bona ka Bibele ba susumetsoa ke hore na re bua le bona joang eseng hore na re reng ho bona. Baa thaba ha re bua le bona ka tsela e mosa le e utloahalang ebile re bontša hore rea ba tsotella. Ha re ba qobelle hore ba re mamele. Ho e-na le hoo, re leka ho utloisisa maikutlo a bona ka bolumeli. Mohlala, batho ba bang ha ba rate ho bua ka bolumeli le batho bao ba sa ba tsebeng. Ba bang ba nka hore ha se mokhoa o motle ho botsa motho e mong hore na maikutlo a hae ke afe ka Molimo. Ho boetse ho na le batho ba bang ba soabelang ho bonoa ba bala Bibele haholo-holo le e mong oa Lipaki Tsa Jehova. Ho sa tsotellehe hore na boemo ke bofe, re leka ka hohle hore re hlomphe maikutlo a bona.​—2 Tim. 2:24.

6. Moapostola Pauluse o ile a bontša joang hore ke motho ea masene, hona re ka mo etsisa joang?

⁶ Re lokela ho etsa’ng haeba motho eo re buang le eena a sa rate ha re sebelisa mantsoe a kang,“Bibele,” “popo,” “Molimo,” kapa “bolumeli”? Re ka etsisa moapostola Pauluse eaba re ba masene ha re bua le eena. Ha Pauluse a ne a bua le Bajuda, o ne a behelana mabaka le bona ka Mangolo. Leha ho le joalo, ha a ne a bua le bo-rafilosofi ba Bagerike ba Areopago, o ne a sa ba bolelle hore litaba tsa hae li tsoa Bibeleng. (Lik. 17:​2, 3, 22-31) Re ka etsisa Pauluse joang? Haeba re bua le motho ea sa rateng Bibele, ekaba hantle hore re se ke ra bua ka eona ka ho toba. Haeba u bona eka motho eo u buang le eena o soabela ho bonoa a ntse a bala Bibele le uena, u ka leka ho mo balla eona fonong ea hao.

7. Re ka ’na ra lokela ho etsa’ng e le hore re etsise mohlala oa Pauluse o tlalehiloeng ho 1 Bakorinthe 9:​20-23?

⁷ Mamela ka hloko. Re lokela ho leka ho utloisisa hore na ke hobane’ng ha batho bao re kopanang le bona ba ikutloa ka tsela eo ba ikutloang ka eona. (Liprov. 20:5) A re hlahlobeng mohlala oa Pauluse hape. O holetse har’a Bajuda. Empa o ile a tlameha ho fetola mokhoa oo a neng a ruta ka oona ha a bua le balichaba ba neng ba sa tsebe letho kapa ba sa tsebe hakaalo ka Jehova le ka Bibele. Re ka ’na ra lokela ho etsa lipatlisiso kapa ra bua le batho ba bang ka phuthehong ba tsebang haholoanyane ka hore na batho ba  tšimong ea rona ba ikutloa joang ka Bibele.​—Bala 1 Bakorinthe 9:​20-23.

8. Re ka qalisa moqoqo oa Bibele le batho joang?

⁸ Sepheo sa rona ke hore re fumane batho ba “tšoanelehang.” (Mat. 10:​11) E le hore re atlehe, re lokela ho lumella batho hore ba ntše maikutlo a bona re be re ba mamele ka hloko. Mor’abo rona e mong oa Engelane o atisa ho botsa batho hore na ba nahana hore ke’ng e ka ba thusang hore malapa a bona a thabe, ba khone ho holisa bana le hore ba mamelle ho tšoaroa ka ho hloka toka. Ebe ka mor’a ho mamela maikutlo a bona o re, “U nahana joang ka keletso ee e ngotsoeng lilemong tse ka bang 2 000 tse fetileng?” Ntle le hore a bue ka “Bibele,” u ba bontša mangolo ao aa khethileng ka hloko fonong ea hae.

9. Re ka ’na ra finyella lipelo tsa batho ba sa rateng ho bua ka Molimo joang?

⁹ Re ka finyella lipelo tsa batho ba sa rateng ho bua ka Molimo ka hore re bue le bona ka lintho tse ba amang. Mohlala, batho ba bangata ba rata ho bua ka lintho tsa tlhaho. Kahoo, u ka ’na oa re: “Mohlomong oa tseba hore lintho tse ngata tseo bo-rasaense ba li entseng ba li kopilitse linthong tsa tlhaho. Mohlala, batho ba qapileng sebuela-hole ba ne ba shebile tsebe, ha ba neng ba qapa k’hamera bona ba ne ba shebile leihlo. Ebe ho tla’ng kelellong ea hao ha u nahana ka lintho tsa tlhaho? Na u nahana hore ke matla a tlhaho, motho kapa ntho e ’ngoe e itseng?” Ka mor’a ho mamela ka hloko, u ka ’na oa botsa: “Ha lienjiniere li ntse li ithuta tsela eo mahlo le litsebe li entsoeng ka eona, ha e le hantle li ntse li ithuta ho tsoa ho mang? Ke ile ka khahloa ke mantsoe a seroki se seng ha se re: ‘Ea hlomang tsebe, na a ke ke a utloa? Kapa ea etsang leihlo, na a ke ke a talima? . . . Ke eena ea rutang batho tsebo!’ Bo-rasaense ba bang ba lumellana le mantsoe ana hape baa lumela hore ho na le motho ea bopileng lintho tsohle.” (Pes. 94:​9, 10) Ka mor’a moo, u ka ’na oa mo bontša video ea Na Lintho Tse Phelang li Bopiloe?​—Selelekela. e hlahang ho jw.org/st. (Kena ho LINGOLILOENG > LIVIDEO.) Kapa u ka ’na oa mo fa bukana ea Na Lintho Tse Phelang li Bōpiloe?

10. Re ka qalisa moqoqo le batho ba sa rateng ho bua ka Molimo joang?

¹⁰ Batho ba bangata ba labalabela ho ba le bokamoso bo molemo. Leha ho le joalo, ba bang ba nahana hore lefatše le tl’o felisoa kapa ho be le maemo a tla etsa hore ho be thata ho phela ho lona. Mopotolohi e mong oa Norway o re hangata batho ba sa rateng  ho bua ka Molimo ba thabela ho bua ka lintho tse etsahalang lefatšeng. Ka mor’a hore a lumelise batho, o re: “U nahana hore re lokela ho etsa’ng e le hore re be le bokamoso bo molemo? Na re lokela ho beha tšepo ea rona ho bo-ralipolotiki, bo-rasaense kapa motho e mong ea itseng?” Ka mor’a hore a ba mamele ka hloko, o bala temana ea Bibele e hlalosang hore na bokamoso ba rona bo tl’o ba joang. Batho ba bang baa thaba ha ba utloa tšepiso ea Bibele ea hore lefatše le tla lula le le teng le hore batho ba lokileng ba tla lula ho lona ka ho sa feleng.​—Pes. 37:​29; Moek. 1:4.

11. Ke hobane’ng ha re lokela ho qala moqoqo ka litsela tse fapaneng ha re bua le batho, hona re ka etsisa mohlala oa Pauluse o ho Baroma 1:​14-16 joang?

¹¹ Re lokela ho qala moqoqo ka litsela tse fapaneng ha re bua le batho ka Bibele. Hobane’ng? Hobane batho ha ba tšoane. Motho e mong a ka thabela ho bua ka taba e itseng eaba e mong eena ha a e thabele. Batho ba bang ha ba na bothata ba ho bua ka Molimo kapa ka Bibele, ha ba bang bona ba rata ho bua ka lintho tse itseng pele. Ho sa tsotellehe hore na maemo ke afe, re lokela ho ikemisetsa ho bua le batho ba mefuta eohle. (Bala Baroma 1:​14-16.) Re lokela ho lula re hopola hore Jehova ke eena ea melisang peo eo re e jalang.​—1 Bakor. 3:​6, 7.

12. Re ka etsa’ng ho thusa batho ba tsoang linaheng tsa Asia ba sa tsebeng letho ka ’Mopi?

¹² Lefatšeng lohle, bahoeletsi ba bangata ba kopana le batho ba tsoang linaheng tsa Asia, ho akareletsa le bao linaheng tsa habo bona litaba tsa bolumeli li thibetsoeng. Linaheng tse ling tsa Asia, batho ba bangata ha ba e-s’o nahane hakaalo ka hore na ’Mopi o teng. Ba bang baa hle ba amohele ho ithuta Bibele hang-hang, ha ba bang bona ba le lesisitheho hore ba qale ho ithuta. Re ka ba thusa joang? Bahoeletsi ba bang ba nang le boiphihlelo ba khona ho qalisa moqoqo le batho ka lintho tse bontšang hore baa ba thahasella, ebe ha maemo a ba lumella ba phetela batho bao hore na Bibele e ile ea ba thusa joang bophelong.

13. Ke’ng e ka etsang hore batho ba bang ba thahaselle ho ithuta Bibele? (Sheba setšoantšo se sekoahelong.)

¹³ Qalong, batho ba bangata ba thabela ho ithuta Bibele hobane ba khahliloe ke Mangolo a ba thusang hore na ba phele joang. (Moek. 7:​12) Morali’abo rona e mong oa New York ea atisang ho etela batho ba buang Sechaena o re: “Ke leka ka hohle ho ba bontša hore kea ba thahasella hape ke ba mamela ka hloko. Ha ke hlokomela hore ba sa tsoa fihla koano, ke ee ke re: ‘Ho joang moo? Na u se u fumane mosebetsi? Baahisane ba hao ba u tšoere joang?’ ” Ka linako tse ling, moqoqo oo o mo thusa hore a bue le bona ka Bibele. Ha maemo a mo lumella, morali’abo rona o ee a re: “U nahana hore ke’ng e ka re thusang hore re phelisane hantle le batho ba bang? Na nka u bontša maele a mang a Bibele? A re: ‘Tšimoloho ea ho hloka kutloano e joaloka ea bulelang metsi; kahoo pele qabang e qhoma, u itsamaele.’ Na u nahana hore keletso ee e ka re thusa hore re phelisane hantle le batho ba bang?” (Liprov. 17:​14) Meqoqo ena e ka re thusa ho fumana batho ba batlang ho ithuta ka ho eketsehileng.

14. Mor’abo rona e mong oa Asia o thusa batho ba sa lumeleng hore Molimo o teng joang?

¹⁴ Re ka re’ng ho batho ba reng ha ba lumele hore Molimo o teng? Mor’abo rona ea nang le nako e telele a pakela batho ba Asia bao e seng balumeli o re: “Ha e le hantle, sebakeng sena ha motho a re, ‘ha ke lumele hore Molimo o teng,’ o bolela hore ha a rapele melimo e rapeloang ke batho ba mona.  Kahoo, maemong a mangata ke ee ke lumellane le bona hore melimo e mengata ke e iketselitsoeng ke batho ebile ha se ea ’nete. Ebe ke ba balla Jeremia 16:​20 e reng: ‘Na motho oa lefatše a ka iketsetsa melimo le hoja e se melimo?’ Ka mor’a moo, ke ee ke ba botse: ‘Re ka tseba joang eo e leng molimo oa ’nete le ea iketselitsoeng ke batho?’ Ke ba mamela ka hloko ha ba araba ebe ke ba balla Esaia 41:​23 e reng: ‘Bolelang lintho tse tlang ka mor’a moo, e le hore re tsebe hore le melimo.’ Ebe ke qetella ka ho ba bontša mohlala oa lintho tseo Jehova a ileng a li bolela esale pele.”

15. Re ithuta’ng mohlaleng oa mor’abo rona e mong oa Asia Bochabela?

¹⁵ Mor’abo rona e mong oa Asia Bochabela eena o sebelisa mokhoa o latelang ha a etsa maeto a ho boela. O re: “Ke ba bontša mehlala ea Mangolo a Bibele a ka ba thusang bophelong, boprofeta ba Bibele bo ileng ba phethahala le melao ea tlhaho e laolang bokahohle. Ebe kea ba bontša hore lintho tsena kaofela li paka hore ho na le ’Mopi ea bohlale ea li entseng. Ha motho a se a lumela hore Molimo o teng, kea mo bontša hore na Bibele e re’ng ka Jehova.”

16. Ho ea ka Baheberu 11:​6, ke hobane’ng ha re lokela ho thusa liithuti tsa Bibele hore li be le tumelo ho Jehova le lentsoeng la hae, hona re ka li thusa joang hore li be le eona?

¹⁶ Ha re ithuta Bibele le batho ba sa lumeleng hore Molimo o teng, re lokela hore nako le nako re ba thuse ho tiisa tumelo ea bona ea hore Molimo o teng. (Bala Baheberu 11:6.) Hape re lokela ho ba thusa hore ba tšepe Bibele. Ho ka ’na ha hlokeha hore re pheta-phete lithuto tse ling tsa Bibele. Nako eohle ha re ithuta Bibele le bona, re ka ’na ra lokela ho hlahloba bopaki ba hore Bibele ke Lentsoe la Molimo. Bopaki bona bo akareletsa boprofeta ba Bibele bo ileng ba phethahala, hore na Bibele e lumellana joang le saense le histori kapa hore na e ka re thusa joang bophelong.

17. Haeba re rata batho re ka ba thusa hore ba etse’ng?

¹⁷ Re thusa batho hore ebe barutuoa ba Kreste ka hore re ba rate ho sa tsotellehe hore na ke balumeli kapa che. (1 Bakor. 13:1) Ha re ntse re ba ruta, sepheo sa rona ke ho ba bontša hore Molimo oa ba rata le hore le eena o batla hore re mo rate. Selemo le selemo, batho ba likete bao pele ba neng ba se na thahasello ea bolumeli baa kolobetsoa hobane ba thusitsoe hore ba rate Molimo. Kahoo, e-ba le mamello ’me u bontše batho ba mefuta eohle hore oa ba tsotella. Ba mamele ka hloko. Leka ho utloisisa hore na ba ikutloa joang. Ba behele mohlala o motle e le hore u ba thuse hore ebe balateli ba Kreste.