SEHLOOHO SE ITHUTOANG SA 7
PINA EA 15 Rorisang Letsibolo la Jehova
Re Rua Molemo Ofe ha Jehova a re Tšoarela?
“U tšoarela e le kannete.”—PES. 130:4.
NTLHA-KHOLO
Re tl’o ithuta ka lipapiso tseo Bibele e li sebelisang ho re thusa ho ananela hore ebe Jehova o re tšoarela ka pelo eohle re le batho ka bomong.
1. Ke hobane’ng ha ho le thata ho tseba hore na motho o bolela’ng ha a re o u tšoaretse?
“KE U TŠOARETSE.” Na ha ho thabise ho utloa mantsoe aa ka mor’a hore u utloise motho e mong bohloko? Empa ha e le hantle motho o bolela’ng ha a re: “Ke u tšoaretse”? Na o bolela hore le ka ba metsoalle hape, kapa o mpa feela a re ha a sa batla ho bua ka taba eo? Ho ka ba thata ho tseba hore na motho o bolela’ng ha a re o u tšoaretse.
2. Mangolo a re’ng ha a bua ka tsela eo Jehova a tšoarelang ka eona? (Sheba naletsana.)
2 Tsela eo Jehova a re tšoarelang ka eona re le batho ba sa phethahalang, e fapane hole le tsela eo re tšoarelanang ka eona. Ha ho na motho ea ka tšoarelang joaloka Jehova. Mopesaleme o ile a re ka Jehova: “U tšoarela e le kannete e le hore batho ba u hlomphe.” a (Pes. 130:4) Jehova o “tšoarela e le kannete.” Ke mohlala o motle oa kamoo re lokelang ho tšoarelana kateng. Litemaneng tse ling tsa mangolo a Seheberu, bangoli ba bang ba Bibele ba sebelisa lentsoe le sebelisoang feela ha ho buuoa ka tsela eo Jehova a tšoarelang ka eona.
3. Tsela eo Jehova a tšoarelang ka eona e fapane joang le eo batho ba tšoarelanang ka eona? (Esaia 55:6, 7)
3 Ha Jehova a re tšoarela, o hlakola libe tsa rona ka ho felletseng. Re ka boela ra ba metsoalle e haufi-ufi le eena. Kannete rea thaba hore ebe Jehova o re tšoarela ka pelo eohle leha re ntse re mo siteloa hangata.—Bala Esaia 55:6, 7.
4. Jehova o re thusa joang hore re utloisise tsela eo a re tšoarelang ka eona?
4 Haeba tsela eo Jehova a re tšoarelang ka eona e fapane le eo re tšoarelang ba bang ka eona, re ka thusoa ke eng ho utloisisa tsela eo a re tšoarelang ka eona? Sehloohong sena, re tl’o ithuta ka lipapiso tseo Jehova a li sebelisang ho tšoantšetsa tsela eo a re tšoarelang ka eona. Li tla re thusa ho bona kamoo Jehova a hlakolang libe tsa rona kateng le ho etsa hore re boele re be metsoalle ea hae. Ha re ntse re hlahloba lipapiso tsena, re tla rata Ntate oa rona le ho feta, ea re bontšang mosa le mohau ka ho re tšoarela ka litsela tse ngata.
JEHOVA O TLOSA LIBE TSA RONA
5. Ho etsahala eng ha Jehova a re tšoarela?
5 Hangata ka Bibeleng, libe li tšoantšoa le mojaro o boima. Ha Morena Davida a bua ka libe tsa hae o ile a re: “Liphoso tsa ka li bokellane ka holim’a hlooho ea ka. Li nkimetse joaloka mojaro o boima haholo.” (Pes. 38:4) Jehova o tšoarela baetsalibe ba bakileng. (Pes. 25:18; 32:5) Lentsoe la Seheberu le sebelisitsoeng bakeng sa “ho tšoarela” le bolela “ho imolla” kapa “ho tlosa.” Ha Jehova a re tšoarela libe, ho joalokaha eka o tlosa mojaro o boima mahetleng a rona ’me oa re imolla.
“U tšoarela libe” (Pes. 32:5)
6. Jehova o suthisetsa libe tsa rona hole hakae?
6 Mohlala o mong o re thusang ho bona hore na Jehova o suthisetsa libe tsa rona hole hakae le rona o hlaha ho Pesaleme ea 103:12, e reng: “Feela joalokaha bochabela bo le hole le bophirimela, ka ho tšoanang o suthiselitse liphoso tsa rona hole le rona.” Bochabela bo hole le bophirimela ’me ha ho mohla libaka tseo tse peli li ka kopanang. Ka mantsoe a mang, Jehova o suthisetsa libe tsa rona hole le rona. Re kholisehile hore Jehova o re tšoarela ka pelo eohle.
“Feela joalokaha bochabela bo le hole le bophirimela” (Pes. 103:12)
7. Mikea 7:18, 19 e re Jehova o etsa’ng ka libe tsa rona?
7 Le hoja ka tsela ea tšoantšetso Jehova a suthisetsa libe tsa rona hole le rona, na o tla lula a li hopola? Che. Ha Morena Ezekiase a bua ka Jehova o ile a re: “U lahletse libe tsohle tsa ka ka mor’a hao,” kapa joalokaha naletsana e re: “U tlositse libe tsohle tsa ka mahlong a hao.” (Esa. 38:9, 17; nal.) Mantsoe ana a ka boela a fetoleloa tjena: “U entse eka ha kea ka ka etsa sebe ho hang.” Sena se bolela hore Jehova o lahlela libe tsa batho ba bakileng hole moo a ke keng a hlola a li bona. Bibele e sebelisa papiso e ’ngoe ho re thusa hore re utloisise taba ena hantle, papiso eo e hlaha ho Mikea 7:18, 19. (E bale.) Litemana tsena li bontša hore Jehova o lahlela libe tsa rona botebong ba leoatle. Mehleng ea khale, ho ne ho ke ke ha khoneha ho fumana ntho e neng e oetse botebong ba leoatle.
“U lahletse libe tsohle tsa ka ka mor’a hao” (Esa. 38:17)
“U tla lahlela libe tsohle tsa bona botebong ba leoatle” (Mik. 7:19)
8. Re se re ithutile eng ho fihlela hajoale?
8 Lipapisong tsena, re ithutile hore ha Jehova a re tšoarela o re imolla ka ho felletseng e le hore re se ke ra hlola re ikutloa re le molato. ’Nete ea taba ena e ile ea hatisoa ke Davida ha a re: “Ho thaba bao liketso tsa bona tse sa eeng ka molao li tšoaretsoeng le bao libe tsa bona li koahetsoeng. Ho thaba motho eo Jehova a ke keng a hopola sebe sa hae ho hang.” (Bar. 4:6-8) Jehova o tšoarela e le kannete.
JEHOVA O HLAKOLA LIBE TSA RONA
9. Jehova o sebelisa papiso efe ho bontša hore na o re tšoarela haholo hakae?
9 Jehova o sebelisa papiso e ’ngoe ho re thusa ho ananela kamoo a sebelisang sehlabelo sa Jesu kateng ho hlakola libe tsa batho ba bakileng. Bibele e re Jehova o hlatsoa le ho tlosa libe e le hore moetsalibe a ka hloeka. (Pes. 51:7; Esa. 4:4; Jer. 33:8) Jehova o re: “Le hoja libe tsa lona li le khubelu, li tla ba tšoeu joaloka lehloa. Le hoja li le khubelu tlere! li tla ba tšoeu joaloka boea.” (Esa. 1:18) Le hoja ho le thata ho tlosa letheba le lekhubelu leseleng le lesoeu, Jehova eena o sebelisa papiso ena ho re kholisa hore a ka tlosa libe tsa rona, a li hlatsoa ka ho felletseng ha e-ba joalokaha eka ha rea ka ra li etsa.
“Le hoja libe tsa lona li le khubelu, li tla ba tšoeu joaloka lehloa” (Esa. 1:18)
10. Bibele e sebelisa papiso efe ho re thusa ho bona kamoo Jehova a re tšoarelang ka bolokolohi kateng?
10 Sehloohong se fetileng, re ithutile hore Bibele e tšoantša sebe le “sekoloto.” (Mat. 18:32-35) Kahoo, nako le nako ha re siteloa Jehova, ho tšoana le ha re ntse re ikenya sekolotong le ho feta. Re mo kolota haholo! Empa ha Jehova a re tšoarela ho tšoana le ha eka o hlakola sekoloto seo. Le ka mohla Jehova a ke ke a batla hore re patale sekoloto seo a se hlakotseng. Kannete re ikutloa re imolohile ha Jehova a re tšoarela.
“U re tšoarele liphoso tsa rona” (Mat. 6:12)
11. Bibele e bolela’ng ha e re libe tsa rona li ‘hlakotsoe’? (Liketso 3:19)
11 Ha Jehova a hlakola likoloto tsa rona kapa libe tsa rona, o li hlakola ka ho felletseng. (Bala Liketso 3:19.) Ha re bua ka ho hlakoloa ha sekoloto, re ka nahana ka motho ea nang le buka eo a ngolang mabitso a batho ba mo kolotang ho eona. Ha motho a mo patala, o hlakola lebitso la hae le sekoloto seo ka pene. Leha ho le joalo, re ntse re ka bona lebitso le sekoloto seo. Empa e le hore re utloisisa tsela eo Jehova a hlakolang libe tsa rona ka eona, re ka nahana ka enke e neng e sebelisoa mehleng ea pele e neng e ka hlakoloa ka seponche se metsi. Kahoo, ha sekoloto se ne se ‘hlakoloa,’ re ne re ke ke ra khona ho bona se neng se ngotsoe. Re ananela haholo hore ebe ha Jehova a re tšoarela, o hlakola libe tsa rona ka ho felletseng joalokaha eka ha re e-s’o li etse.—Pes. 51:9.
“Libe tsa lona li tle li hlakoloe” (Lik. 3:19)
12. Re ithuta’ng papisong ea leru le leholo?
12 Jehova o sebelisa papiso e ’ngoe ho hlalosa tsela eo a koahelang libe ka eona. O re: “Ke tla koahela liphoso tsa hao joalokaha eka li koahetsoe ka leru le libe tsa hao joalokaha eka li koahetsoe ka leru le leholo.” (Esa. 44:22) Ha Jehova a re tšoarela, ho joalokaha eka o koahela liphoso tsa rona ka leru le leholo e le hore a se ke a hlola a li bona ’me le rona re se ke ra hlola re li bona.
“Ke tla koahela liphoso tsa hao joalokaha eka li koahetsoe ka leru” (Esa. 44:22)
13. Re ikutloa joang ha Jehova a re tšoarela?
13 Re ithuta’ng lipapisong tsee? Ha Jehova a se a re tšoaretse, ha rea lokela ho ikutloa eka re tla jara molato oo bophelo bohle ba rona. Sehlabelo sa Jesu Kreste se entse hore libe tsa rona li tšoareloe ka ho felletseng. Ha Jehova a re tšoarela, ho ba feela joalokaha eka ha re e-s’o etse libe tseo ho hang. Ena ke tsela eo Jehova a re tšoarelang ka eona haeba re baka e le kannete.
JEHOVA O RE ETSA METSOALLE EA HAE E HAUFI HAPE
Tsela eo Ntate oa rona ea leholimong a re tšoarelang ka eona e re fa monyetla oa hore re be le kamano e ntle le eena (Sheba serapa sa 14)
14. Ke hobane’ng ha re ka kholiseha hore Jehova o re tšoarela e le kannete? (Sheba litšoantšo.)
14 Re ka ba metsoalle ea Jehova hape hobane o re tšoarela ka pelo eohle ’me sena se re thusa hore re se ke ra lula re ikutloa re le molato. Re ka kholiseha hore Jehova ha a re jare ka pelo ebile ha a batle menyetla ea hore a re fe kotlo. Ho hang sena se ke ke sa etsahala. Ke hobane’ng ha re ka kholiseha hore Jehova oa re tšoarela? Hobane o ile a re ho moprofeta Jeremia: “Ke tla tšoarela liphoso tsa bona ’me ha ke sa tla hlola ke hopola libe tsa bona.” (Jer. 31:34) Moapostola Pauluse o ne a qotsa mantsoe ao ha a re: “Ha ke sa tla hlola ke hopola libe tsa bona.” (Baheb. 8:12) Mantsoe aa a bolela’ng?
“Ha ke sa tla hlola ke hopola libe tsa bona” (Jer. 31:34)
15. Jehova o bolela’ng ha a re a ke ke a hlola a hopola libe tsa rona?
15 Ka Bibeleng, ha se ka linako tsohle poleloana “ho hopola” e sebelisoang ha ho buuoa ka motho ea nahanang ka ntho e ’ngoe e etsahetseng khale. Ho e-na le hoo, e ka boela ea sebelisoa ha ho buuoa ka hore motho a etse ketso e itseng. Monna oa setlokotsebe ea neng a khokhothetsoe pel’a Jesu o ile a re ho eena: “Jesu, u nkhopole ha u kena ’Musong oa hao.” (Luka 23:42, 43) O ne a sa re feela Jesu a tle a mo nahane ha a kena ’Musong oa hae. Tsela eo Jesu a ileng a mo araba ka eona, e bontša hore o ne a sa tl’o nahana ka eena feela empa o ne a tl’o mo etsetsa ntho e ’ngoe ho bontša hore oa mo hopola, e leng ho mo tsosa bafung. Kahoo, ha Jehova a re a ke ke a hlola a hopola libe tsa rona, o bolela hore o se a ntse a re tšoaretse ’me ha ho le ka mohla a tla re ahlola ka lebaka la tsona.
16. Bibele e sebelisa papiso efe ho hlalosa hore na motho o ikutloa a lokolohile hakae ha a tšoaretsoe e le kannete?
16 Bibele e sebelisa papiso e ’ngoe ho re thusa ho utloisisa hore na motho o ikutloa a lokolohile hakae ha a tšoaretsoe e le kannete. E re kaha ha rea phethahala, re “makhoba a sebe.” Empa re leboha Jehova hore ebe oa re tšoarela, kaha seo se etsa hore re be makhoba a ‘lokolotsoeng sebeng.’ (Bar. 6:17, 18; Tšen. 1:5) Kannete ho tseba hore Jehova oa re tšoarela, ho etsa hore re ikutloe re thabile haholo joalokaha eka re lokollotsoe bokhobeng.
“Le ile la lokolloa sebeng” (Bar. 6:18)
17. Ke joang re ikutloang eka re folile ha Jehova a re tšoarela? (Esaia 53:5)
17 Bala Esaia 53:5. Papiso ea ho qetela eo re tl’o bua ka eona e bontša hore re tšoana le motho ea nang le boloetse bo bolaeang. Kaha Jehova o fane ka Mora oa hae e le sehlabelo, ho joalokaha eka o re folisitse. (1 Pet. 2:24) Ha re etsa sebe, re senya setsoalle sa rona le Jehova. Leha ho le joalo, Jehova a ka re tšoarela ra boela ra ba metsoalle ea hae ka lebaka la sehlabelo sa Jesu. Feela joalokaha motho ea neng a kula hampe a thaba haholo ha ngaka e mo folisa, le rona re thaba haholo ha Jehova a re amohela ’me re boela re e-ba metsoalle ea hae hobane a re tšoaretse.
“Re folisitsoe ka lebaka la maqeba a hae” (Esa. 53:5)
TSELA EO JEHOVA A RE TŠOARELANG KA EONA E RE AMA JOANG?
18. Re ithutile eng lipapisong tse fapaneng tse hlahang ka Bibeleng, tse buang ka tsela eo Jehova a re tšoarelang ka eona? (Sheba lebokose le reng “Tsela eo Jehova a re Tšoarelang ka Eona.”)
18 Re ithutile’ng lipapisong tse ka Bibeleng tse buang ka tsela eo Jehova a re tšoarelang ka eona? Ha Jehova a re tšoarela libe, ho joalokaha eka ha re e-s’o li etse ho hang hape re ka kholiseha hore a ke ke a re ahlola ka lebaka la tsona nakong e tlang. Taba ena e etsa hore re be le setsoalle se matla le Ntate oa rona ea leholimong. Leha ho le joalo, rea tseba hore taba ea hore Jehova oa re tšoarela ke mpho eo a re fang eona hobane a re rata a bile a le mosa, eseng hobane a tlamehile ho re fa eona.—Bar. 3:24.
19. (a) Re thabisoa ke eng? (Baroma 4:8) (b) Re tl’o bua ka eng sehloohong se latelang?
19 Bala Baroma 4:8. Kannete rea thaba hore ebe Jehova ke Molimo ‘ea tšoarelang e le kannete.’ (Pes. 130:4) Empa ho na le ntho ea bohlokoa eo re lokelang ho e etsa haeba re batla hore Jehova a re tšoarele. Jesu o ile a re: “Haeba le sa tšoarele batho liphoso tsa bona, Ntate oa lona le eena a ke ke a le tšoarela.” (Mat. 6:14, 15) Kahoo, ho hlakile hore ke habohlokoa hore re etsise Jehova ka hore re tšoarele batho ba bang. Empa re ka etsa seo joang? Re tl’o bua ka taba ena sehloohong se latelang.
PINA EA 46 Rea U Leboha, Jehova
a Ka Seheberu, poleloana e sebelisitsoeng lengolong lena e buang ka “ho tšoarela” e bolela ho tšoarela e le kannete ’me tsela ena eo Jehova a tšoarelang ka eona e fapane le eo batho ba tšoarelanang ka eona. Libibele tse ngata ha li bontše phapang ena empa Phetolelo ea Lefatše le Lecha ea Mangolo a Halalelang e bontša hore ho tšoarela ho hlahang ho Pesaleme ea 130:4, hoa ikhetha.
