NA U kile oa utloa eka u tlameha ho itjarela mathata a hao u le mong? Re phela nakong eo ‘bophelo bo leng thata’ ’me ka lebaka leo re ka ikutloa re nyahame ebile eka ha ho na motho eo re ka llelang ho eena. (2 Tim. 3:1) Leha ho le joalo, nakong eo re nang le mathata hona le batho bao re ka llelang ho bona. Bibele e bontša kamoo ho leng bohlokoa kateng ho ba le motsoalle oa ’nete “linakong tsa mahlomola.”—Liprov. 17:17.

Moapostola Pauluse o ile a rua molemo ho metsoalle ea hae e ileng ea mo thusa ka litsela tse ngata ha a ntse a le tšebeletsong ea hae. (Bakol. 4:​7-11) Ha Pauluse a ne koalletsoe teronkong e Roma, metsoalle ea hae e ile ea mo thusa ka mesebetsi eo a neng a sa khone ho iketsetsa eona. Ka mohlala, Epafroditase o ile a isetsa Pauluse lintho tseo a neng a li hloka tse tsoang ho Bakreste-’moho le eena ba phutheho ea Filipi. (Bafil. 4:18) Tikikase eena, o ile a isa mangolo a tsoang ho Pauluse liphuthehong tse fapaneng. (Bakol. 4:7) Ka lebaka la thuso ea metsoalle ea hae, Pauluse o ile a khona ho khothatsa liphutheho leha a ne a fuoe taelo ea hore a se ke a tsoa ka tlung kapa a koalletsoe teronkong. Uena u ka ba motsoalle oa ’nete joang mehleng ee?

Ho na le mehlala ea kajeno e re bontšang hore na re ka ba metsoalle ea ’nete joang. Nahana ka mohlala oa morali oa bo rona e mong, ea ileng a bontša hore ke motsoalle oa ’nete ho Morali oa bo rona Elisabet eo e leng pula-maliboho ea kamehla e Spain. Morali eo oa bo rona, o ile a romella Elisabet melaetsa e khothatsang e tsoang litemaneng tsa Bibele nakong eo ’mè oa Elisabet a neng a kulela lefu a tšoeroe ke kankere. Elisabet o re, “Ha ke bona melaetsa eo ke ile ka ikutloa ke tsotelloa ebile ke se mong.”—Liprov. 18:24.

Re ka matlafatsa setsoalle sa rona le Bakreste-’moho ka hore re batle litsela tsa ho ba tšehetsa ka mesebetsi e amanang le phutheho. Ka mohlala, u ka ithaopela ho felehetsa ba holileng ka koloi ea hao, mohlomong ho ea le bona libokeng kapa tšimong. Haeba u ba thusa ka litsela tseo, u tla be u ba khothatsa ’me le bona ba tla u khothatsa. (Bar. 1:12) Leha ho le joalo, ho na le bana ba bo rona ba bang bao maemo a ba qobellang ho lula ba le ka tlung. U ka ba motsoalle oa ’nete joang ho bona?

Ho na le Bakreste-’moho le rona ba bang bao ka lebaka la ho kula kapa maemo a mang ba sa khoneng ho ea libokeng ka seqo. Nahana ka mohlala oa Mor’abo rona David ea ileng a tšoaroa ke kankere. Lingaka li ile tsa mo thusa ka likhoeli tse tšeletseng ka mokhoa oa phekolo o bitsoang chemotherapy. Nakong eo ea phekolo, Mor’abo rona David le mosali oa hae Lidia ba ne ba kena liboka ka marang-rang.

Ba ile ba fumana tšehetso efe ho tsoa ho metsoalle ea bona ka phuthehong? Ka mor’a seboka se seng le se seng, bara le barali ba bo rona ba neng ba ile  libokeng ka seqo, ba ne ba etsa boiteko ba ho bua le Mor’abo rona David le Lidia ka marang-rang. Ho ekelletsa moo, ha Mor’abo rona David le mosali oa hae ba ba ne ba arabile libokeng, hamorao ba ne ba fumana melaetsa e khothatsang ho tsoa ho bara le barali ba bo rona. Mor’abo rona David le mosali oa hae Lidia ba ile ba ikutloa joang ka tšehetso eo? Ba ile ba ikutloa ba sa lahloa.

Na le rona re ka leka ho sebetsa le ba sa khoneng ho tsoa ka tlung mosebetsing oa boboleli? Re ka etsa liphetoho tse itseng tse nyenyane bakeng sa ho sebetsa le bona, e leng se tla etsa hore ba ikutloe ba sa lahloa. (Liprov. 3:27) Mohlomong re ka ipha nako le bona ea ho etsa mosebetsi oa boboleli ka ho ngola mangolo kapa ka ho paka ka fono. Bakreste-’moho le rona ba sa khoneng ho tsoa ka tlung ba ka khona ho kena sebokeng sa tšimo ba sebelisa marang-rang. Mor’abo rona David le mosali oa hae Lidia ba ile ba ananela tokisetso ena haholo. Ha Mor’abo rona David a hlalosa o re: “Ho ba le bara le barali ba bo rona ba sehlopha sa rona sa tšimo sebokeng se sekhutšoaane sa tšimo le ha ho etsoa thapelo, ho ne ho re khothatsa haholo.” Hape, ha maemo a lumela ebile ho bolokehile ho etsa joalo, nako le nako u ka kopa motho eo u ithutang Bibele le eena hore u e’o mo khannela thuto ea Bibele ha mohoeletsi ea sa khoneng ho tsoa ka tlung.

Ha re sebetsa hammoho le bara le barali ba bo rona ba sa khoneng ho tsoa ka tlung, re tla bona makhabane a bona ’me seo se tla etsa hore re be metsoalle ea bona e haufi. Ka mohlala, ha u sebetsa le bahoeletsi ba joalo tšimong ’me u bona bokhoni boo ba nang le bona ba ho sebelisa Lentsoe la Molimo ho finyella pelo ea motho, seo se tla etsa hore u atamelane haufi le bona le ho feta. Ha re tšehetsa Bakreste-’moho le rona ka hore re ba thuse ho ea libokeng le tšimong, seo se tla etsa hore re eketse metsoalle ea rona.—2 Bakor. 6:13.

Pauluse o ile a ikutloa a khothetse ha motsoalle oa hae Tite a ne a il’o mo bona. (2 Bakor. 7:​5-7) Tlaleho ena e re hopotsa hore ha hoa lekana ho tšelisa batho ka mantsoe feela empa re boetse re lokela ho ba le bona le ho etsa sohle seo re ka se khonang ho ba tšehetsa.—1 Joh. 3:18.

Bara le barali ba bo rona ba Russia ba behile mohlala o motle oa ho tšehetsana. Nahana ka se ileng sa etsahalla Mor’abo rona Sergey le mosali oa hae Tatyana. Ka mor’a hore mapolesa a phenyekolle ntlo ea bona, ba ile ba nkoa ba il’o hlonngoa lipotso mapoleseng. Morali oa bo rona Tatyana ke eena ea ileng a lokolloa pele ’me a khutlela hae. Mor’abo rona Sergey o re: “Hang ha Tatyana a fihla lapeng, morali oa bo rona e mong ea sebete o ile a kokota monyako. Metsoalle ea rona e meng e ile ea fihla ’me ea re thusa ho hloekisa le ho beha lintho hantle ka tlung.”

Mor’abo rona Sergey o eketsa ka ho re: “Haesale ke rata lengolo la Liproverbia 17:17 le reng: ‘Motsoalle oa ’nete o lerato ka linako tsohle ’me ke ngoan’eno eo u ka mo tšepang linakong tsa mahlomola.’ Mantsoe ana ebile a sebele ho ’na nakong ena ea ha ke hlorisoa ’me ke sa khone ho iketsetsa lintho tse ling. Jehova o mphile metsoalle e sebete hore e ntšehetse.”

Ha re ntse re feta maemong a boima tjena, re hloka metsoalle ea ’nete e ka re tšehetsang. Re tl’o e hloka le ho feta nakong ea mahlomola a maholo. Kahoo, a re etseng sohle se matleng a rona ho ba metsoalle ea ’nete hona joale.—1 Pet. 4:​7, 8.