1. U ka hlalosa motho ea mohau joang?

 HA RE nahana ka motho ea mohau re nahana ka motho ea mosa, ea pelo e ntle, ea nang le qenehelo le ea fanang. Re ka boela ra nahana ka pale eo Jesu a ileng a bua ka eona ea Mosamaria ea molemo. Monna eo oa Mosamaria o ile a “etsa ka mohau” Mojuda ea ileng a hlaseloa ke masholu. O ile “a susumetsoa ke khauho” ’me a lokisetsa hore Mojuda eo ea neng a lemetse a hlokomeloe. (Luka 10:​29-37) Makhabaneng ao Molimo a nang le ’ona, papiso ena e tl’o re ruta haholo ka mohau. Molimo o mohau hobane oa re rata ’me o re bontša mohau ka litsela tse ngata letsatsi le leng le le leng.

2. Motho a ka bontša mohau ka tsela efe e ’ngoe?

² Ho na le tsela e ’ngoe hape eo motho a ka bontšang mohau ka eona. A ka khetha ho se fane ka kotlo ho motho eo e mo tšoanelang. Ha e le hantle, haesale Jehova a re bontša mohau ntlheng eo. Mopesaleme o ile a re: “Ha aa re etsa ho ea ka libe tsa rona.” (Pes. 103:​10) Leha ho le joalo, ka linako tse ling Jehova a ka ’na a khalemela motho ea entseng sebe.

3. Re tl’o araba lipotso life?

³ Sehloohong sena re tl’o araba lipotso tsena tse tharo: Ke hobane’ng ha Jehova a re bontša mohau? Na hoa khoneha ho bontša mohau ha u khalemela motho ka thata? Le hore na ke’ng e ka re thusang hore re be mohau. A re boneng hore na Lentsoe la Molimo le araba lipotso tsena joang.

4. Ke hobane’ng ha Jehova a re bontša mohau?

⁴ Jehova o rata ho re bontša mohau. Moapostola Pauluse o ile a re Molimo ke ea “ruileng mohau.” Temaneng ena, Pauluse o ne a hlalosa hore Molimo o mohau hobane o file bahlanka ba hae ba sa phethahalang bao a ba tlotsitseng tšepo ea ho phela  leholimong. (Baef. 2:​4-7) Empa Jehova ha a mohau ho bahlanka ba hae ba tlotsitsoeng feela. Mopesaleme Davida o ile a re: “Jehova o molemo ho bohle, mehauhelo ea hae e holima mesebetsi eohle ea hae.” (Pes. 145:9) Kaha Jehova o rata batho, o ba bontša mohau nako e ’ngoe le e ’ngoe ha a bona ho hlokahala hore a etse joalo.

5. Jesu o ile a bona joang hore Jehova o mohau?

⁵ Jesu ke eena ea tsebang hantle kamoo Jehova a ratang ho re bontša mohau kateng ho feta mang kapa mang. Jehova le Jesu ba ne ba le leholimong hammoho ka nako e telele pele Jesu a tla lefatšeng. (Liprov. 8:​30, 31) Ka makhetlo a mangata, Jesu o ile a bona kamoo Ntate oa hae a bontšitseng mohau ho baetsalibe kateng. (Pes. 78:​37-42) Ha Jesu a ne a ruta, hangata o ne a rata ho bua ka botho bona ba Ntate oa hae bo ratehang.

6. Jesu o sebelisitse papiso efe ho re thusa hore re utloisise kamoo Ntate oa hae a leng mohau kateng?

⁶ Joalokaha re bone sehloohong se fetileng, Jesu o sebelisitse papiso ea mora ea lahlehileng ho re thusa ho utloisisa kamoo Jehova a ratang ho re bontša mohau kateng. Mora eo o ile a tsamaea ha habo ’me a “hafa thepa ea hae ka ho phela bophelo ba ho inehella litakatso tsa nama.” (Luka 15:​13) Hamorao o ile a baka boitšoarong ba hae bo bobe, a ikokobetsa eaba o khutlela hae. Ebe ntate oa hae o ne a tla etsa’ng? Mora eo o ne a tla tseba haufinyane. Jesu o ile a re: “Ha [mora] a sa ntse a le hole, ntat’ae a re heli! ’me a mo bona ’me a susumetsoa ke khauho, eaba oa matha o itihela molaleng oa hae ’me o mo aka ka lerato.” Ntate eo ha aa ka a hlabisa mora oa hae lihlong. Ho e-na le hoo, o ile a mo hauhela, a mo tšoarela le ho mo amohela lapeng. Mora eo o ne a entse libe tse tebileng empa kaha o ne a bakile, ntate oa hae o ile a mo tšoarela. Ntate ea mohau papisong ena o tšoantšetsa Jehova. Papisong ena e amang maikutlo, Jesu o ne a re bontša kamoo Ntate oa hae a ikemiselitseng ho tšoarela baetsalibe ba bakileng e le kannete.​—Luka 15:​17-24.

7. Tsela eo Jehova a bontšang mohau ka eona e bontša joang hore o bohlale?

⁷ Jehova o bontša mohau hobane o bohlale ka ho fetisisa. Liqeto tseo Jehova a li etsang kamehla li tsoela popo ea hae molemo. Ke kahoo Bibele e re’ng “bohlale bo tsoang holimo” bo “tletse mohau le litholoana tse molemo.” (Jak. 3:​17) Joaloka motsoali ea lerato, Jehova oa tseba hore ha a bontša bahlanka ba hae mohau  ntho eo e tla ba tsoela molemo. (Pes. 103:​13; Esa. 49:​15) Kaha Jehova o ba bontša mohau, ba na le tšepo ka bokamoso ho sa tsotellehe ho se phethahale ha bona. Jehova o bohlale haholo, kahoo o lula a re bontša mohau ha ho e-na le lebaka la hore a etse joalo. Ho ntse ho le joalo, Jehova oa tseba hore na ke neng moo ho sa hlokahaleng hore a bontše mohau. Ha ho mohla a bontšang mohau haeba ho etsa joalo ho tla etsa hore motho a tsoele pele ka lintho tse mpe tseo a li etsang.

8. Keng e hlokahalang ka linako tse ling, hona hobane’ng?

⁸ A re re mohlanka oa Molimo o khetha ho etsa libe tse tebileng ka boomo. Re lokela ho etsang? Molimo o ile a susumetsa Pauluse hore a re re “khaotse ho itsoakanya” le motho eo. (1 Bakor. 5:​11) Batho ba etsang libe ba sa bake baa khaoloa ka phuthehong. Ntho ena ea hlokahala e le hore ho sireletsoe bara le barali ba bo rona ba tšepahalang le ho bontša hore melao ea Jehova ea halalela. Leha ho le joalo, batho ba bang ba nahana hore ho khaoloa ho bontša hore Molimo ha a mohau. Empa na taba eo ke ’nete ? A re boneng.

9, 10. Ho ea ka Baheberu 12:​5, 6, ke hobane’ng ha re ka re ho khaoloa ho bontša mohau? Fana ka mohlala.

⁹ Ha re utloa tsebiso libokeng ea hore motho eo re mo ratang “ha e sa le e mong oa Lipaki Tsa Jehova” re utloa bohloko haholo. Re ka ’na ra ipotsa hore na ebe ho ne ho hlokahala hore motho eo a khaoloe. Na kannete ho khaoloa ho bontša mohau? Ho joalo. Ha se bohlale ho se khalemele motho haeba a hloka taeo ebile ha ho bontše mohau kapa lona lerato. (Liprov. 13:​24) Na ho khaoloa ho ka thusa motho hore a bake? Ho joalo. Bara le barali ba bo rona ba bangata ba ileng ba etsa sebe se tebileng ba re ho khaoloa ho ile ha ba thusa hore ba hlokomele hore na ba entse sebe se tebileng hakae, ba bake le ho fetola tsela eo ba phelang ka eona ’me ba khutlele ho Jehova.​—Bala Baheberu 12:​5, 6.

¹⁰ Nahana ka mohlala ona. Molisa oa hlokomela hore e ’ngoe ea linku tsa hae ea kula. Oa tseba hore boloetse boo e nang le bona bo hloka hore a e tlose ho tsena tse ling. Leha ho le joalo, linku li rata ho ba har’a mohlape ebile ha li thabele ho arohana le tse ling. Na ebe re ka re molisa o tšoara nku eo hampe haeba a e tlosa har’a tse ling? Ha ho joalo. Oa tseba hore haeba a lumella hore nku ena e be le linku tse ling e tla li tšoaetsa. Kahoo, ka ho tlosa nku ena e kulang, o sireletsa mohlape oohle.​—Bapisa le Levitike 13:​3, 4.

11. (a) Ke ka litsela life motho ea khaotsoeng a ka bapisoang le nku e kulang? (b) Batho ba khaotsoeng ba ka khona ho etsa’ng, hona ba ka thusoa joang?

¹¹ Ha Mokreste a khaoloa re ka ’na ra mo nka joalo ka nku eo e kulang. Oa kula hobane kamano ea hae le Jehova e senyehile. (Jak. 5:​14) Joalokaha motho ea kulang a ka khona ho tšoaetsa batho ba bang le motho eo kamano ea hae le Jehova e senyehileng a ka khona ho tšoaetsa batho ba bang hore ba etse lintho tse mpe. Kahoo, maemong a mang ho hlokahala hore motho ea entseng sebe se tebileng a tlosoe ka phuthehong. Khalemelo ena e bontša kamoo Jehova a ratang bahlanka ba hae ba tšepahalang kateng hape e thusa mofosi hore a hlokomele hore o entse sebe se tebileng hakae. Ha motho a ntse a khaotsoe a ka khona ho ea libokeng moo a tla ithuta ho eketsehileng ka Bibele le ho matlafatsa tumelo ea hae hape. A ka boela a fumana lingoloa tseo a ka ipallang tsona le ho shebella lenaneo la JW Broadcasting^®. Ha baholo ba hlokomela hore o ntse a etsa liphetoho, nako le nako ba ka ’na ba mo fa likeletso tse tla mo thusa hore a lokise kamano  ea hae le Jehova e le hore e ka ba Paki ea Jehova hape. *

12. Ke’ng e lerato le e bontšang mohau eo baholo ba ka e etsetsang moetsalibe ea sa bakeng?

¹² Ke ha bohlokoa hore re hopole hore ke baetsalibe ba sa bakeng feela ba tlosoang ka phuthehong. Baholo baa tseba hore taba ena ke ea bohlokoa ebile ha ba e nke ha bobebe. Baa tseba hore Jehova o khalemela ka “tekanyo e loketseng.” (Jer. 30:​11) Ba rata Bakreste-’moho le bona ebile ha ba batle ho etsa ntho leha e le efe e tla senya kamano ea bona le Jehova. Leha ho le joalo, ka linako tse ling moetsalibe o lokela ho tlosoa ka phuthehong ka nakoana e le ho bontša mohau le lerato.

13. Ke hobane’ng ha ho ne ho hlokahala hore Mokreste e mong phuthehong ea Korinthe a khaoloe?

¹³ Nahana kamoo moapostola Pauluse a ileng a sebetsana le moetsalibe ea sa bakang oa mehleng ea hae. Mokreste e mong phuthehong ea Korinthe o ne a etsa boitšoaro bo bobe le mosali oa ntate oa hae. Ena e ne e le ntho e mpe haholo. Pauluse o ne a tseba hore Jehova o ile a bolella Baiseraele a re: “Monna ea robalang le mosali oa ntat’ae o apotse bofeela ba ntat’ae. Ruri ka bobeli ba lokela ho bolaoa.” (Lev. 20:​11) Ke ’nete hore Pauluse o ne a ke ke a bolella phutheho hore e bolaee monna eo empa o ile a re o lokela ho khaoloa. Boitšoaro ba hae bo ne bo tšoaetsa ba bang ka phuthehong hoo ba neng ba nahana hore bo ne bo se bobe hakaalo.​—1 Bakor. 5:​1, 2, 13.

14. Pauluse o ile a bontša monna ea neng a khaotsoe Korinthe mohau joang, hona hobane’g? (2 Bakorinthe 2:​5-8, 11)

¹⁴ Ha nako e ntse e ea, Pauluse o ile a utloela hore monna eo o entse liphetoho tse kholo. Moetsalibe eo o ne a bakile e le kannete. Le hoja monna eo a ile a senya botumo ba phutheho, Pauluse o ile a bolella baholo hore ha a batle ho ba ea “sa utloeleng bohloko.” O ile a re ho bona ba mo ‘tšoarele ka mosa le ho mo tšelisa.’ Hlokomela hore na ke hobane’ng ha Pauluse a ile a cho joalo ho bona, o ile a re: “E le hore ka tsela e itseng motho ea joalo a se ke a sithabetsoa ke ho hlomoha ka ho fetisisa.” Moapostola Pauluse o ne a utloela monna enoa ea bakileng bohloko. O ne a sa batle ho bona monna eo a sithabetse ka lebaka la phoso eo a e entseng hoo a ka telang ho khutlela ka phuthehong.​—Bala 2 Bakorinthe 2:​5-8, 11.

15. Baholo ba ka khona joang ho khalemela ka thata le ho bontša mohau ka nako e le ’ngoe?

 ¹⁵ Joaloka Jehova baholo ba rata ho bontša mohau. Ba khalemela mofosi ka thata ha ho hlokahala empa ha ho khoneha ba bontša mohau ha ho e-na le lebaka la hore ba etse joalo. Haeba baholo ba sa khalemele mofosi, ba tla be ba mo lumella hore a tsoele pele ho etsa lintho tse mpe tseo a ntseng a li etsa. Empa na ke baholo feela ba hlokang ho bontša mohau?

16. Liproverbia 21:​13 e re Jehova o tla etsa’ng haeba batho ba sa bontše batho ba bang mohau?

¹⁶ Bakreste bohle ba batla ho etsisa Jehova ka hore ba bontše mohau. Hobane’ng? Lebaka le leng ke hore Jehova a ke ke a mamela batho ba sa bontšeng batho ba bang mohau. (Bala Liproverbia 21:​13.) Ha ho motho ea batlang hore Jehova a se ke a mamela lithapelo tsa hae, ke kahoo re lekang ka hohle hore re be batho ba mohau. Re lokela ho ipha nako ea ho mamela Bakreste-’moho le rona ba utloileng bohloko ’me re lule re mamela “mohoo o belaelang oa ea tlaase.” Ka ho tšoanang, re leka ka hohle ho mamela keletso ena e tsoang ka Bibeleng e re’ng: “Ea sa bontšeng mohau o tla ahloloa ntle ho mohau.” (Jak. 2:​13) Ho tla ba bonolo hore re bontše batho ba bang mohau haeba le rona re hopola hore re hloka ho bontšoa mohau. Re batla ho bontša mohau haholo-holo haeba moetsalibe ea bakileng a khutlela ka phuthehong.

17. Morena Davida o ile a bontša joang hore o mohau e le kannete?

¹⁷ Mehlala e ka Bibeleng e ka re thusa hore re be batho ba mohau ’me re se ke ra ba batho ba se nang kutloelo-bohloko. Ka mohlala, nahana ka Morena Davida, hangata o ne a bontša mohau. Le hoja Saule a ne a batla ho mo bolaea, Davida o ile a bontša mohau ho Morena enoa ea tlotsitsoeng ke Molimo ka hore a se ke a iphethetsa kapa ho mo ntša kotsi.​—1 Sam. 24:​9-12, 18, 19.

18, 19. Ke maemong afe a mabeli moo Davida a sa kang a bontša mohau?

¹⁸ Leha ho le joalo, Davida o ne a sa lule a bontša batho mohau. Ka mohlala, ha Nabale monna ea se nang kutloelo-bohloko a hlompholla Davida le ho hana ho mo fa lijo hammoho le banna bao a neng a e-na le bona, Davida o ile a koata haholo ’me a etsa qeto ea ho mo bolaea hammoho le banna bohle ba ntlo ea hae. Empa Abigaile e leng mosali oa Nabale ea neng a le mosa ebile a e-na le mamello o ile a etsa qeto kapele eaba o fa Davida lijo ’me Davida haa ka a bolaea Nabale.​—1 Sam. 25:​9-22, 32-35.

¹⁹ Ka nako e ’ngoe, moprofeta Nathane o ile a bolella Davida ka monna ea ruileng ea ileng a inkela nku ea moahisane ea neng a sotlehile. Davida o ile a koata haholo ’me a re: “Ka Jehova ea phelang, monna ea etsang sena o tšoaneloa ke ho shoa!” (2 Sam. 12:​1-6) Davida o ne a tseba molao oo Molimo a neng a o file Moshe. Ha lesholu le ne le utsoa nku le ne le lokela ho buseletsa ka tse ’nè. (Ex. 22:1) Empa na kannete le ne le hloka ho bolaoa? Eo e ne e le kahlolo  e sehloho. Ha e le hantle, Nathane o ne a bolella Davida mohlala ona e le ho mo thusa ho utloisisa hore o entse libe tse fetang tsa monna eo. Jehova o ile a bontša Davida mohau empa Davida eena o ne a sa ikemisetsa ho bontša mohau ho monna eo ea mohlaleng oa Nathane ea ileng a utsoa nku.​—2 Sam. 12:​7-13.

20. Re ka ithuta’ng mohlaleng oa Davida?

²⁰ Hlokomela hore ha Davida a ne a koatile haholo o ile a etsa qeto ea hore Nabale le banna bohle ba ntlo ea hae ba lokela ho bolaoa. Hamorao, Davida o ile a re monna ea ruileng ea mohlaleng oa Nathane o lokela ho bolaoa. Lekhetlong lena la bobeli, re ka ’na ra ipotsa hore na monna ea nang le kutloelo-bohloko joaloka Davida ke joang a ka ahlolang ka tsela e sehloho hakaale. A re boneng hore na Davida o ne a ikutloa joang ka nako eo. Davida o ne a e-na le letsoalo le molato. Ha e le hantle, haeba motho a ahlola batho ba bang ka sehloho, ntho eo e bontša hantle hore kamano ea hae le Jehova e senyehile. Jesu o ile a lemosa balateli ba hae a re: “Khaotsang ho ahlola e le hore le se ke la ahloloa; kaha kahlolo eo le ahlolang ka eona, le tla ahloloa ka eona.” (Mat. 7:​1, 2) Kahoo, a re lekeng ka hohle hore re se ke ra ba batho ba se nang kutloelo-bohloko empa re be ba “ruileng mohau” joaloka Molimo oa rona.

21, 22. Re ka bontša mohau ka litsela life?

²¹ Mohau ha se boikutlo feela boo motho a bang le bona. Ha e le hantle motho ea mohau o thusa batho ba bang. Kahoo, kaofela ha rona re lokela ho batla litsela tsa ho thusa batho ba bang ebang ke malapeng a bo rona, ka phuthehong kapa moo re lulang teng. Kannete re ka fumana menyetla e mengata ea ho bontša mohau. Na ho na le motho ea hlokang ho khothatsoa? Na re ka thusa ba bang mohlomong ka ho ba fa lijo kapa ho ba thusa ka tsela e ’ngoe? Mohlomong Mokreste ea khutliselitsoeng ka phuthehong o hloka motsoalle ea ka mo khothatsang. Na re ka bua le batho ba bang ka molaetsa o monate o ba tšelisang? Tsena ke tse ling tsa litsela tseo re ka bontšang batho bohle bao re kopanang le bona mohau ka tsona.​—Jobo 29:​12, 13; Bar. 10:​14, 15; Jak. 1:27.

²² Haeba re hlokomela hore na batho ba hloka eng, re tla bona hore ho na le menyetla e mengata ea hore re bontše mohau. Ha re bontša batho ba bang mohau re thabisa Ntate oa rona haholo hobane ke ea “ruileng mohau.”