KOKONYANA e bitsoang bohloa ba Sahara (Cataglyphis bombycina) ke e ’ngoe ea likokonyana tse khonang ho mamella mocheso. Ha likokonyana tse jang bohloa li ipatela letsatsi le bataolang har’a mpa ea motšehare lehoatateng la Sahara, bohloa bona bo tsoa mokoting oa bona e le hore bo il’o batla lijo ’me bo ja le likokonyana tse ling tse bolailoeng ke mocheso.

Ak’u nahane: Letlalo la bohloa ba Sahara le khonang ho bo sireletsa letsatsing le bataolang, le na le boea bo ka holimo le bo ka mahlakoreng bo entsoeng ka tsela e khethehileng ’me karolo e ka tlaase ea mpa ea bona ha e na boea. Boea ba teng, bo etsang hore bo be ’mala o phatsimang oa silivera, ha e le hantle bo tšoana le liphaephe tse nyenyane tse bopehileng joaloka khutlotharo. Ha u ka sheba bohloa bona u sebelisa microscope u tla bona hore karolo e ka holimo le e ka mahlakoreng e na le boea bo bolelele ’me karolo e ka tlaase ea bona ha e na boea. Tsela ena eo bohloa bo entsoeng ka eona e na le melemo e ’meli. Molemo oa pele ke hore e etsa hore boea ba bohloa bo khutlisetse mahlaseli a letsatsi sepakapakeng. Oa bobeli, e thusa hore bohloa bo ntše mocheso o ’meleng oa bona. Karolo e ka tlaase e se nang boea e bo thusa hore bo khutlisetse mocheso o tsoang fatše sepakapakeng. *

Letlalo la bohloa ba Sahara bo le sireletsang mochesong o bataolang, le bo thusa hore bo khone ho mamella mocheso o matla o ka etsang 53.6°C. Bafuputsi ba batla ho etsisa tsela ena eo bohloa bo entsoeng ka eona ka hore ba etse pente e tla etsa hore ho se ke ha chesa haholo ka tlung ntle le ho sebelisa sesebelisoa leha e le sefe sa motlakase.

U nahanang ka see? Na letlalo la bohloa ba Sahara bo le sireletsang mochesong o bataolang le bile teng ka ho iphethola ha lintho kapa le entsoe?