Haufinyane ’Muso oa Molimo oo re o letetseng, o tla etsa hore ho be le khotso lefatšeng. “Khotso e tla ba ngata” joalokaha Pesaleme ea 72:7 e boletse. Empa ’Muso oo o tla busa lefatšeng neng? O tla le busa joang? Re tla fumana melemo efe ’Musong oo?

Bibele e boletse esale pele matšoao a tla bontša ha ’Muso oa Molimo o se o atametse. Matšoao ao a akarelletsa lichaba tse loantšanang, tlala, mafu, litšisinyeho tsa lefatše le tlolo ea molao.​—Matheu 24:​3, 7, 12; Luka 21:​11; Tšenolo 6:​2-8.

Boprofeta bo bong bo re: “Matsatsing a ho qetela ho tla ba le linako tse mahlonoko tseo ho leng thata ho sebetsana le tsona. Etsoe batho e tla ba baithati, ba ratang chelete, . . . ba sa mameleng batsoali, ba se nang teboho, ba sa tšepahaleng, ba se nang lerato la tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, . . . ba ikhohomosang ka boikakaso, ba ratang menyaka ho e-na le ho rata Molimo.” (2 Timothea 3:​1-4) Ke ’nete hore esale batho ba le tjena, empa mehleng ena ba babe le ho feta.

Boprofeta bona bo qalile ho phethahala ka 1914. Bo-rahistori, bo-ralipolotiki le bangoli le bona ba re lintho li qalile ho senyeha ka selemo seo. Mohlala, rahistori oa Denmark ea bitsoang Peter Munch o ile a re: “Ntoa ea lefatše ea 1914 e bile qaleho ea matšoenyeho ’ohle a batho. Pele ho selemo seo, batho ba ne ba nahana hore maphelo a bona a tla ntlafala empa e ile ea e-ba lillo le litsikitlano tsa meno, likoluoa, lehloeo hape batho ba lula ba tšohile.”

Lintho tsena tse bohloko tse etsahalang li bontša hore ’Muso oa Molimo o atametse. Letšoao le khothatsang leo Jesu a buileng ka lona ke le hlahang mantsoeng a reng: “Litaba tsena tse molemo tsa ’Muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle, joale e ntan’o ba hona bofelo bo tla tla.”​—Matheu 24:14.

Ho bolela litaba tse molemo ke mosebetsi o ka sehloohong oo Lipaki Tsa Jehova li o etsang. Ebile makasine ea bona e tsebahalang haholo e bitsoa Molula-Qhooa o Tsebahatsa ’Muso oa Jehova. Hona joale e fumaneha ka lipuo tse fetang 338 ebile hangata e bua ka lintho tse tla etsahala ’Musong oa Molimo.

Karabo re tla e fumana lintlheng tsena tse ’nè:

1. ’Musong oo, ho ke ke ha e-ba le babusi ba lipolotiki.

2. Babusi ba lipolotiki ka booatla bohle ba tla leka ho thibela ’Muso ona ho busa.​—Pesaleme ea 2:​2-9.

3. Ka nako eo, Molimo o tla felisa mebuso eohle ebe ho busa oa hae feela. (Daniele 2:​44; Tšenolo 19:​17-21) O tla e felisa ka ntoa ea Armagedone.​—Tšenolo 16:​14, 16.

4. Batho bohle ba ratang ’Muso oa Molimo ba tla pholoha ntoeng ea Armagedone ebe ba phela ka khotso lefatšeng le lecha. E tla ba batho ba limilione bao Bibele e reng ke “bongata bo boholo.”​—Tšenolo 7:​9, 10, 13, 14.

Ntho ea pele eo u lokelang ho e etsa e le hore u be mofo oa ’Muso oa Molimo, ke ho ithuta ka eena. Jesu o ile a rapela a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.”​—Johanne 17:3.

Ha batho ba ithuta ka Jehova, ba mo nka e le motsoalle oa bona ’me ba fumana melemo e mengata. Mehlala e seng mekae ke ena: Molemo oa pele ke ho ba le tumelo ho Jehova. Batho bana ha ba lumele feela ka hlooho e ntšo empa ba na le mabaka a ho lumela hore ’Muso oa Jehova o atametse. (Baheberu 11:1) Molemo o mong ke oa ho rata Jehova le batho ba bang. Lerato leo ba ratang Jehova ka lona le etsa hore ba mo mamele. Ba mamela taelo ea Jesu Kreste ea hore re tšoare batho ba bang ka tsela e nepahetseng. Jesu o ile a re: “Kamoo le batlang hore batho ba le etse kateng, le ba etse ka tsela e tšoanang.”​—Luka 6:31.

Kaha Jehova ke ntate oa rona hape oa re rata, o re batlela se molemo. O batla hore re phele “bophelo ba sebele.” (1 Timothea 6:​19) Kannete hona joale ha re phele bophelo bo monate. Batho ba bangata ba phela ka thata ebile ba sotlehile. E le hore u utloisise hore na “bophelo ba sebele” bo tla ba joang, ithute lintho tseo Molimo a tla li etsetsa bafo ba ’Muso oa hae.