Na lefatše le lintho tse ho lona li bopiloe ke Molimo kapa li bile teng ka mohlolo? Mantsoe a qotsitsoeng ka holimo a litsebi tse peli tsa saense le a hlahang bukeng e qalang ea Bibele a fana ka likarabo tse peli tse fapaneng. Batho ba bang ba lumellana le mantsoe a Bibele ha ba bang bona ba lumellana le litsebi tsa saense. Leha ho le joalo, batho ba bangata ha baa kholiseha ka seo ba se lumelang ebile ba ngangisana ka taba ena mananeong a TV le libukeng.

Ho ka ’na ha etsahala hore matichere a hao a u rutile hore leholimo, lefatše le lintho tsohle tse phelang li ikentse le hore ha ho na ’Mopi. Empa na ba ile ba u bontša bopaki ba hore ha ho na ’Mopi? Ka lehlakoreng le leng, ho ka ’na ha etsahala hore u kile oa utloa baeta-pele ba likereke ba ruta hore ho na le ’Mopi. Empa na ba ile ba u bontša bopaki ba seo ba se buang? Kapa na ba ile ba re haeba u na le tumelo u lokela ho lumela ntho e ’ngoe le e ’ngoe le hoja u se na bopaki?

Mohlomong u kile oa ipotsa potso ena ’me oa utloa eka ha ho na bopaki bo hlakileng ba hore ehlile ’Mopi o teng. E ka ’na eaba sena se ile sa etsa hore u utloe eka ha ho bohlokoa hakaalo hore u fumane karabo ea potso eo.

Makasine ena ea Tsoha! e tla u bontša lintlha le bopaki bo ileng ba etsa hore batho ba lumele hore ho na le ’Mopi. E tla boela e bontše hore na ke hobane’ng ha ho le bohlokoa ho fumana karabo ea hore na lintho tse phelang li bopiloe kapa che.